വീണ്ടും ബ്ലാക്ക് മാൻ ഭീഷണി; ഇത്തവണ കോഴിക്കോട് പന്തീരങ്കാവിൽ

കോഴിക്കോട് പന്തീരാങ്കാവിനടുത്തുള്ള പുത്തൂര്‍മഠത്താണ് ബ്ലാക്ക് മാന്‍റെ ശല്യം പതിവായത്. ഇരുട്ടിലെത്തുന്ന അജ്ഞാതന്‍ വീടുകളുടെ ചില്ലെറിഞ്ഞുടയ്ക്കുന്നുവെന്നാണ് പരാതി. പുത്തൂര്‍മഠത്തെ സന്തോഷിന്‍റെ വീടിന് നേരെ ആറ് തവണ ആക്രമണമുണ്ടായി.

ഏഴ് ജനല്‍ചില്ലുകള്‍ തകര്‍ന്നു. ചില്ലുകഷ്ണങ്ങള്‍ കൊണ്ട് വീട്ടില്‍ ഉറങ്ങിക്കിടക്കുകയായിരുന്ന കുട്ടികള്‍ക്ക് പരിക്കേറ്റു. അടുത്തുള്ള മൂന്ന് വീടുകള്‍ക്ക് നേരെയും സമാനമായ ആക്രമണമുണ്ടായി. നാട്ടുകാര്‍ ജാഗ്രതാ സമിതി രൂപീകരിച്ച് കാവല്‍ നിന്നിട്ടും ഫലമുണ്ടായില്ല.

കാവല്‍ ഇല്ലാത്ത നേരം നോക്കിയാണ് ഇപ്പോഴത്തെ ആക്രമണം. പൊലീസിന്‍റെ നിര്‍ദേശത്തെത്തുടര്‍ന്ന് വീടുകളില്‍ സിസിടിവി സ്ഥാപിച്ചിട്ടുണ്ടെങ്കിലും അതിലൊന്നും അക്രമി പതിഞ്ഞിട്ടില്ല. ആക്രമണം പതിവായിട്ടും ബ്ലാക്ക് മാനെ പിടിക്കാന്‍ കഴിയാതായതോടെ നാട്ടുകാരും അസ്വസ്ഥരാണ്.

സംഭവത്തിൽ പന്തീരാങ്കാവ് പൊലീസ് അന്വേഷണം തുടങ്ങി. പ്രദേശത്ത് തന്നെയുള്ള ആരെങ്കിലുമാവും ആക്രമണങ്ങള്‍ക്ക് പിന്നിലെന്നാണ് നാട്ടുകാരുടെ നിഗമനം. ലോക്ക്ഡൗണിന്‍റെ തുടക്കം മുതല്‍ കോഴിക്കോട് ജില്ലയിലെ പല ഭാഗങ്ങളിലും ബ്ലാക് മാന്‍ ശല്യം രൂക്ഷമായിരുന്നു.

പലയിടത്തും ശല്യക്കാരെ പൊലീസ് പിടികൂടുകയും ചെയ്തു. മയക്കുമരുന്ന് കച്ചവടവും മറ്റു സാമൂഹ്യവിരുദ്ധപ്രവര്‍ത്തനങ്ങളും നടത്താനുള്ള മറയായിരുന്നു പലയിടത്തും ബ്ലാക്ക് മാന്‍ ഭീഷണി.