കേരളത്തിന്റെ ആരോഗ്യമേഖല ഇങ്ങനെ തുടർന്നാൽ മതിയോ ? എങ്ങനെയൊക്കെ മാറണം ?

ഈ നേട്ടങ്ങളിൽ ആഹ്ളാദിക്കുമ്പോഴും, കേരളത്തിൻ്റെ ആരോഗ്യമേഖല നേരിടുന്ന വെല്ലുവിളികളെ കണക്കിലെടുക്കേണ്ടതുണ്ട്. വർധിച്ചുവരുന്ന പകർച്ച -പകർച്ചേതര, മാനസിക രോഗങ്ങൾ, വയോജനങ്ങളുടെ ആരോഗ്യപ്രശ്നങ്ങൾ, പാർശ്വവൽക്കരിക്കപ്പെട്ട സമൂഹങ്ങൾ നേരിടുന്ന സവിശേഷ ആരോഗ്യപ്രതിസന്ധികൾ എന്നിവയെല്ലാം ഇന്ന് വലിയ വെല്ലുവിളികളാണ്. പൊതുജനാരോഗ്യ സംവിധാനങ്ങൾ ശക്തിപ്പെട്ടിട്ടുണ്ടെങ്കിലും, ജനങ്ങൾ നേരിട്ട് മുടക്കുന്ന സ്വകാര്യ ആരോഗ്യചെലവിലുണ്ടായ (Out of Pocket Health Expenditure) വർദ്ധനവ് ഒരു പ്രധാന പ്രതിസന്ധിയായി തുടരുന്നു.

കേരളം കൈവരിച്ച നേട്ടങ്ങളെ ഒട്ടും കുറച്ചുകാണാതെ തന്നെ, ഈ പ്രതിസന്ധികളെ വസ്തുനിഷ്ഠമായി വിലയിരുത്തിക്കൊണ്ട് ഭാവിയിലേക്കുള്ള പരിഹാരമാർഗങ്ങൾ കണ്ടെത്താൻ കൂട്ടായ ശ്രമങ്ങൾ ആവശ്യമാണ്.

ജൂൺ മാസമാദ്യം, ഉപകരണങ്ങളുടെ ക്ഷാമം കാരണം നിരവധി ശസ്ത്രക്രിയകൾ മാറ്റിവെച്ചതോടെ, ഒട്ടനവധി വകുപ്പ് മേധാവികൾ ഡയറക്ടർക്ക് നടപടി ആവശ്യപ്പെട്ട് കത്ത് നൽകിയതോടെയാണ് ശ്രീ ചിത്രയിലെ പ്രതിസന്ധി പുറത്തുവന്നത്. സങ്കീർണ്ണമായ ശസ്ത്രക്രിയകൾ നടക്കുന്ന ഇൻ്റർവെൻഷണൽ റേഡിയോളജി വിഭാഗത്തെ ഉപകരണങ്ങളുടെ ക്ഷാമം ഗുരുതരമായി ബാധിച്ചു. പത്തോളം ശസ്ത്രക്രിയകളാണ് രണ്ട് ദിവസത്തിനിടെ മുടങ്ങിയത്. പുറം കരാറുകൾ നൽകിയാണ് ശ്രീ ചിത്ര ഇൻസ്റ്റിറ്റ്യൂട്ട് ശസ്ത്രക്രിയാ ഉപകരണങ്ങൾ വാങ്ങുന്നത്. കഴിഞ്ഞ രണ്ടു വർഷമായി ഇത് പുതുക്കിയിട്ടില്ലായിരുന്നു. ശ്രീ ചിത്രയിലെ പർച്ചേസ് വിഭാഗത്തിനായിരുന്നു ഇതിൻ്റെ ചുമതല. പിന്നീട് വിവിധ സംഘടനകൾ സമരത്തിനിറങ്ങുകയും രാഷ്ട്രീയ നേതാക്കൾ ഇടപെടുകയും ചെയ്തതോടെയാണ് പ്രശ്നം ഒരുവിധം പരിഹരിച്ച് ശസ്ത്രക്രിയകൾ പുനരാരംഭിച്ചത്.

മറ്റ് ശാസ്ത്ര-സാങ്കേതിക വിദ്യകളുടെ കാര്യത്തിലെന്ന പോലെ, ആരോഗ്യമേഖലയും കഴിഞ്ഞ ഏതാനും വർഷക്കാലമായി വലിയ കുതിച്ചുചാട്ടത്തിന് വിധേയമായിരിക്കുകയാണ്. രോഗനിർണ്ണയ ഉപാധികളും ശസ്ത്രക്രിയാ ഉപകരണങ്ങളും വമ്പിച്ച നവീകരണത്തിൻ്റെ പാതയിലാണ്.

സ്വകാര്യമേഖലയിലുള്ളതുപോലെ ഏറ്റവും ആധുനിക സാങ്കേതികവിദ്യകൾ നമ്മുടെ സർക്കാർ ആശുപത്രികളിൽ പലതിലും ഇപ്പോൾ ലഭ്യമാണ്. നമ്മുടെ മൂന്ന് മെഡിക്കൽ കോളേജുകളും (തിരുവനന്തപുരം, കോഴിക്കോട്, കോട്ടയം), എറണാകുളം, പാലക്കാട്‌ പോലുള്ള ജില്ലാ ആശുപത്രികളും ഏതൊരു സ്വകാര്യ സൂപ്പർ സ്പെഷ്യാലിറ്റി ആശുപത്രികളോടും കിടപിടിക്കാവുന്ന അത്യാധുനിക ചികിത്സാ സൗകര്യങ്ങൾ ലഭ്യമാക്കിയിട്ടുണ്ട്.

സർക്കാർ മെഡിക്കൽ കോളേജുകളിലെയും മറ്റും ചികിത്സാസൗകര്യങ്ങൾ വിപുലീകരിക്കുകയും ആധുനികവൽക്കരിക്കുകയും ചെയ്തതിനനുസരിച്ച് ഇവ കാര്യക്ഷമതയോടെ പ്രവർത്തിപ്പിക്കാനാവശ്യമായ ഭരണനടപടിക്രമങ്ങൾ ആധുനികവൽക്കരിച്ച് മെച്ചപ്പെടുത്താൻ നമുക്ക് കഴിഞ്ഞിട്ടില്ല എന്നതാണ് പ്രധാന വെല്ലുവിളി. തിരുവനന്തപുരം മെഡിക്കൽ കോളേജിലും ശ്രീ ചിത്ര മെഡിക്കൽ സെൻ്ററിലും നടന്ന സംഭവങ്ങൾ ആശുപത്രി ഭരണക്രമത്തിൽ കാലോചിതമായ പരിഷ്കാരങ്ങൾ വരുത്തേണ്ടതിൻ്റെ അടിയന്തിരാവശ്യകതയിലേക്ക് വിരൽചൂണ്ടുന്നു.

ദേശീയ ഹെൽത്ത് അക്കൗണ്ട്സ് കമ്മിറ്റിയുടെ കണക്കനുസരിച്ച്, ജനങ്ങൾ നേരിട്ട് മുടക്കുന്ന സ്വകാര്യചെലവ് (Out Of Pocket Expenditure: OOPE) ഏറ്റവും കൂടുതലുള്ള സംസ്ഥാനങ്ങളിലൊന്നാണ് കേരളം. അടുത്തിടെ പ്രസിദ്ധീകരിച്ച നാഷണൽ ഹെൽത്ത് അക്കൗണ്ട്സ് റിപ്പോർട്ട് (2021-22) പ്രകാരം, കേരളത്തിൻ്റെ മൊത്തം ആരോഗ്യചെലവ് 48,034 കോടി രൂപയാണ്. ഇതിൽ സർക്കാർ ചെലവ് 15,618 കോടി രൂപ (മൊത്തം ചെലവിൻ്റെ 32.5%; പ്രതിശീർഷം 4338 രൂപ) ആണെങ്കിൽ, സ്വകാര്യ ചെലവ് 28,400 കോടി രൂപയാണ് (മൊത്തം ചെലവിൻ്റെ 59.1%; പ്രതിശീർഷം 13,343 രൂപ). ആശ്വാസകരമായ ഒരു വസ്തുത, സ്വകാര്യചെലവിൻ്റെ ശതമാനം 2013-14-ലെ 76.0% ൽ നിന്ന് 2018-19-ൽ 68.6%, 2020-21-ൽ 65.7%, 2021-22-ൽ 59.1% എന്നിങ്ങനെ കുറഞ്ഞുവരുന്നു എന്നതാണ്. അതേസമയം, സർക്കാർ ചെലവിൻ്റെ ശതമാനം 2013-14-ൽ മൊത്തം ചെലവിൻ്റെ 24% (6000 കോടി) ആയിരുന്നത് 2021-22-ൽ 32.5% (15,618 കോടി) ആയി ആനുപാതികമായി വർദ്ധിക്കുകയും ചെയ്തു. എന്നാൽ, ശതമാനക്കണക്കിൽ ആശ്വസിക്കാമെങ്കിലും, ഇതേ കാലയളവിൽ പ്രതിശീർഷ സ്വകാര്യ ആരോഗ്യ ചെലവ് 2013-14-ലെ 7636 രൂപയിൽ നിന്ന് 2021-22-ൽ 13,343 രൂപയായി വർദ്ധിച്ചിരിക്കുന്നത് അവഗണിക്കാനാവാത്ത വസ്തുതയാണ്.

ചികിത്സാചെലവ് കുറയ്ക്കുന്നതിനുള്ള താത്കാലിക നടപടികൾ സ്വീകരിക്കുന്നതോടൊപ്പം, ദീർഘകാല പദ്ധതികൾ ആവിഷ്കരിക്കുന്നതിനുള്ള വിശദമായ പഠനം ആരോഗ്യ-സാമ്പത്തിക വിദഗ്ദ്ധരുടെ സഹായത്തോടെ അടിയന്തിരമായി ആരംഭിക്കേണ്ടതാണ്. ഉചിതമായ നടപടികൾ സ്വീകരിച്ചില്ലെങ്കിൽ, സ്വകാര്യ-സർക്കാർ ആരോഗ്യ സംവിധാനങ്ങൾ മെച്ചപ്പെട്ടിരിക്കുമ്പോൾ തന്നെ, സാമ്പത്തികമായി പിന്നാക്കം നിൽക്കുന്ന ജനവിഭാഗങ്ങളെ കൂടുതൽ ദരിദ്രവൽക്കരിക്കുന്നതിലേക്ക് വർദ്ധിച്ചുവരുന്ന ആരോഗ്യചെലവുകൾ കാരണമാകാൻ സാധ്യതയുണ്ട്.