ഹിറ്റ് ലിസ്റ്റിലാണെന്ന് അറിഞ്ഞിട്ടും ഗൗരി ലങ്കേഷ് ചിരിച്ചുതള്ളിയെന്ന് സഹോദരി കവിത

ബംഗളുരു- ചിലരുടെ ഹിറ്റ് ലിസ്റ്റിൽ ഉൾപ്പെട്ടുവെന്ന വിവരം തമാശയായി ചിരിച്ചുതള്ളുകയാണ് ചേച്ചി ചെയ്തതെന്ന് ഗൗരി ലങ്കേഷിന്‍റെ ഇളയ സഹോദരിയും ചലച്ചിത്ര പ്രവർത്തകയുമായ കവിത ലങ്കേഷ്. അതിന്‍റെ ഗൌരവം മനസിലാക്കാൻ തങ്ങൾക്കും കഴിഞ്ഞില്ലെന്ന് കവിത പറഞ്ഞു. കർണാടക പൊലീസിന്‍റെ അന്വേഷണത്തിൽ തനിക്കും അമ്മയ്ക്കും സന്തോഷമുണ്ട്. അവർ കേസ് തെളിയിച്ചു. മുമ്പ് ആഴ്ചയിൽ ഒരുതവണയെങ്കിലും താൻ അന്വേഷണ ഉദ്യോഗസ്ഥരെ കാണുമായിരുന്നു. ഈ ആഴ്ച അവരെ കാണാൻ താനും കുടുംബവും പോകുന്നുണ്ട്. പൻസാരെ, ധബോൽക്കർ എന്നിവരുടെ ഘാതകരെ ഇനിയും കണ്ടെത്താനാകാത്ത സിബിഐയേക്കാൾ ഫലപ്രദമായി കേസ് അന്വേഷിക്കാൻ കർണാടക പൊലീസിന് സാധിച്ചുവെന്ന് കവിത ലങ്കേഷ് പറയുന്നു. ഗൗരി ലങ്കേഷിന്‍റെ ഇളയ സഹോദരിയായ കവിത ലങ്കേഷ് കർണാടകയിലെ അറിയപ്പെടുന്ന ചലച്ചിത്ര പ്രവർത്തകയാണ് കവിത ലങ്കേഷ്. ചേച്ചിയുമാണ് ഹൃദ്യമായ ആത്മബന്ധമായിരുന്നു കവിതയ്ക്ക് ഉണ്ടായിരുന്നത്. ഗൗരി ലങ്കേഷ് കൊല്ലപ്പെട്ട് ഒരുവർഷം തികയുമ്പോൾ ന്യൂസ്18നോട് സംസാരിക്കുകയായിരുന്നു കവിത.

ചേച്ചിക്ക് ഏറ്റവുമധികം അടുപ്പമുണ്ടായിരുന്നത് തന്‍റെ ഏക മകളുമായിട്ടായിരുന്നു. കർണാടകയിൽ സ്നേഹത്തോടെ അമ്മമാരെ വിളിക്കുന്ന 'അവ്വാ' എന്ന വിശേഷണത്തോടെയാണ് മകൾ ചേച്ചിയെ അഭിസംബോധന ചെയ്തിരുന്നത്. ചേച്ചിയുടെ മരണത്തിന്‍റെ ഞെട്ടലിൽനിന്ന് മകൾ ഇപ്പോഴും മുക്തയായിട്ടില്ല. ചേച്ചിയെ ഓർത്ത് ഇപ്പോഴും അവൾ കരയാറുണ്ട്. രാത്രിയിൽ ഉറക്കത്തിൽനിന്ന് ഞെട്ടിയുണർന്ന് ചേച്ചിയെ അന്വേഷിക്കുമ്പോൾ ഒന്നും പറയാനാകാതെ നിൽക്കാനെ തനിക്ക് സാധിക്കുന്നുള്ളു- കവിത പറയുന്നു.