ആ വെടിയുണ്ടകൾക്ക് ഒരു വയസ്: ഗൗരി ലങ്കേഷ് കൊലക്കേസ് - ചുരുളഴിഞ്ഞത് ഇങ്ങനെ

ബംഗളുരു: 2017 സെപ്റ്റംബർ അഞ്ച് വൈകുന്നേരം. പ്രമുഖ മാധ്യമപ്രവർത്തക ഗൗരി ലങ്കേഷ്, എഡിറ്ററായ 'ഗൗരി ലങ്കേഷ് പത്രികെ' വാരികയുടെ എഡിറ്റിങ് ജോലികൾ പൂർത്തിയാക്കി കാറിൽ വീട്ടിലേക്ക് പോകുന്നു. മൈസുരു റോഡിലെ രാജേശ്വരി നഗരയിലെ വീട്ടിൽ ഒറ്റയ്ക്കാണ് അവർ താമസിച്ചിരുന്നത്. നഗരത്തിലെ പൊതുപരിപാടികളിലും ഫാസിസ്റ്റ് വിരുദ്ധ കൂട്ടായ്കളിലെയും സജീവ സാന്നിദ്ധ്യമായിരുന്ന ഗൗരി ലങ്കേഷ് അന്ന് പ്രത്യേകിച്ച് പരിപാടികളൊന്നും ഇല്ലാതിരുന്നതിനാലാണ് നേരെ വീട്ടിലേക്ക് തിരിച്ചത്. എന്നാൽ അത് തന്റെ അവസാനദിവസമായിരിക്കുമെന്ന് അവർ അറിഞ്ഞിരുന്നില്ല. ഹിന്ദുത്വ രാഷ്ട്രീയത്തിനെതിരെ ശക്തമായ നിലപാടുകൾ ഗൗരി ലങ്കേഷിന് ഒരുപാട് ശത്രുക്കളെ നേടിക്കൊടുത്തിരുന്നു. നക്സൽ പ്രവർത്തകരോടുള്ള അവരുടെ അനുകമ്പയും പലർക്കും അവരോടുള്ള എതിർപ്പിന് കാരണമായിരുന്നു.