കാടിളക്കിയ സെമി ഫൈനലിന് ശേഷം ഫൈനലിലേക്ക് മുന്നണികൾക്ക് നിലമ്പൂർ നൽകുന്ന പാഠങ്ങൾ

മറിച്ചൊരു ഫലമാണ് ഉണ്ടായതെങ്കിൽ അൻവറിൻ്റെ കാര്യത്തിൽ സതീശൻ സ്വീകരിച്ച നിലപാട് വിചാരണ ചെയ്യപ്പെട്ടുമായിരുന്നു എന്നത് ഉറപ്പാണ്. കുഞ്ഞാലിക്കുട്ടിയും സംസ്ഥാനത്തെ ഒട്ടേറെ കോൺഗ്രസ് നേതാക്കളും അൻവറിനെ മുന്നണിയിൽ എത്തിക്കാൻ ആവുന്നത് ശ്രമിച്ചു എന്നത് പരസ്യമാണ്. വലിയ ലക്ഷ്യങ്ങളുമായി സിപിഎമ്മിനോടും പിണറായിയോടും യുദ്ധം പ്രഖ്യാപിച്ച് അൻവർ സൃഷ്ടിച്ചെടുത്ത ഉപതിരഞ്ഞെടുപ്പായിരുന്നല്ലോ ഇത്. എങ്ങനെയും യുഡിഎഫിൽ എത്തുക എന്ന അൻവറിൻ്റെ നീക്കത്തിന് തടയിട്ട് പാറ പോലെ നിന്നു പ്രതിപക്ഷ നേതാവ്. ഒരു ഘട്ടത്തിൽ കെ സി വേണുഗോപാൽ പോലും അൻവറിൻ്റെ മുന്നണി പ്രവേശനത്തിൽ അനുകൂല നിലപാടെടുത്തതാണ്. എന്നാൽ ഡിമാൻ്റുകൾ അംഗീകരിച്ച് അൻവറിനെ മുന്നണിയിൽ എടുക്കാനാവില്ലെന്ന് സതീശൻ തറപ്പിച്ചു. അപ്പുറത്തായിരുന്നപ്പോഴും അപ്പുറം വിട്ടപ്പോഴും തന്നെക്കുറിച്ച് അൻവർ പറഞ്ഞതൊന്നും അത്രവേഗം മറക്കാവുന്നതല്ലല്ലോ സതീശന്. അൻവറിനെ അസോസിയേറ്റ് അംഗമാക്കാനുള്ള യുഡിഎഫ് യോഗതീരുമാനം പോലും സതീശൻ നടപ്പാക്കിയില്ല. മനസില്ലാ മനസോടെയെങ്കിലും മുന്നണി അൻവറിൻ്റെ കാര്യത്തിൽ സതീശനാപ്പം നിന്നു. രണ്ട് കാര്യങ്ങളാണ് സതീശൻ ഇതിലൂടെ നേടിയെടുത്തത്.അൻവറിനെ പ്രകോപിപ്പിച്ച് നിലമ്പൂരിൽ മത്സരത്തിനിറക്കി. അൻവറില്ലാതെ യുഡിഎഫിന് ജയിക്കാനാക്കുമെന്ന് തെളിയിച്ചു. അൻവറിന് മത്സരമല്ലാതെ മറ്റ് വഴികൾ ഇല്ലെന്ന അവസ്ഥയിലേക്ക് എത്തിച്ചു. കരുത്ത് തെളിയിക്കേണ്ട ബാധ്യത അൻവറിനുണ്ടായി.

ഇവിടെയോണ് അൻവറിനെ പ്രകോപിപ്പിച്ച് മത്സരത്തിനിറക്കിയതിന് പിന്നിലെ തന്ത്രം വെളിവാകുന്നത്. 2021 ൽ വിവി പ്രകാശ് നേടിയതിനേക്കാൾ എണ്ണൂറിൽ താഴെ വോട്ടുകളാണ്, കൃത്യമായി പറഞ്ഞാൽ 2021 ലേക്കാൾ 790 വോട്ടുകൾ ആണ് ഷൗക്കത്ത് നേടിയത്. എൽ ഡി എഫിനാകട്ടെ പതിനാലായിരം വോട്ടുകൾ കുറഞ്ഞു. സ്വന്തം നിലയ്ക്കുള്ള വോട്ടുകൾക്ക് പുറമേ ഷൗക്കത്തിനോട് വിയോജിപ്പുള്ള യുഡിഎഫ് വോട്ടുകൾ ചെയ്യാൻ അൻവർ എന്ന ഓപ്ഷൻ ഉണ്ടായി. ആ വോട്ടുകൾ സ്വരാജിലേക്ക് പോയില്ല. ഷൗക്കത്തിന് വോട്ട് ചെയ്യാൻ മടിയുള്ള ഇടത് അനുകൂലികൾക്കും അത് രേഖപ്പെടുത്താൻ അൻവറെന്ന ഓപ്ഷൻ ഉണ്ടായി. മേൽക്കൈ കിട്ടുമെന്ന് ഇടത്പക്ഷം കരുതിയ ഇടങ്ങളിൽ വോട്ട് കുറഞ്ഞതിൻ്റെ കാരണം അതാണ്. മുഖ്യമന്ത്രിയേയും പ്രതിപക്ഷ നേതാവിനേയും വിമർശിക്കുന്നതിനൊപ്പം അൻവർ ഉയർത്തിയ ജനകീയ വിഷയങ്ങളും കത്രികയിൽ വോട്ട് കൊണ്ടു വന്നു.

ഒരു കാര്യം ഉറപ്പാണ്, അൻവറിൻ്റെ മുന്നണി പ്രവേശം. അൻവർ കൂടി ഉണ്ടായിരുന്നെങ്കിൽ എന്നോർത്ത രമേശ് ചെന്നിത്തലയും, വാതിൽ അടച്ചോ ഇല്ലയോ എന്ന് സംശയിക്കുന്ന സണ്ണി ജോസഫും, അൻവർ മിടുക്കനാണെന്ന സർട്ടിഫിക്കറ്റ് കൊടുത്ത കെ സുധാകരനും അൻവറിനോട് മതിപ്പുള്ള ലീഗും എല്ലാം ചേർന്ന് ഉടനെ അൻവറിനെ മുന്നണിയുടെ ഭാഗമാക്കും. സമസ്താപരാധം ഏറ്റുപറഞ്ഞ് ഡിമാൻ്റുകൾ ഇല്ലാതെ വരുന്ന അൻവറിനെ മുന്നണിയുടെ ഭാഗമാക്കാൻ സതീശനും എതിർപ്പുണ്ടാകാൻ ഇടയില്ല. കാരണം വരാൻ പോകുന്നത് വലിയൊരു ഫൈനലാണ്.

തുടർച്ചയായ മൂന്നാം വട്ടവും കേരളം ഭരിക്കണമെന്ന് ആഗ്രഹിക്കുന്ന ഇടത് മുന്നണിക്ക്, പ്രത്യേകിച്ച് സി പി എമ്മിന്, ഒരുപാട് ചിന്തിക്കാൻ നൽകുന്നുണ്ട് ഈ ഫലം. ചെറിയ ഭൂരിപക്ഷത്തിനെങ്കിലും ജയിച്ച് കേറുമെന്ന കണക്കുകൾ അമ്പേ പാളി. അല്ലെങ്കിലും കൃത്യതയുടെ അടയാളമായിരുന്ന സിപിഎമ്മിൻ്റെ തിരഞ്ഞെടുപ്പ് കണക്കുകൾ ഈയിടെയായി ഒരു കണക്കാണ്. പാർട്ടിക്ക് സ്വാധീനമുള്ള സ്ഥലങ്ങളിൽ പോലും പ്രതീക്ഷിച്ച നേട്ടം ഉണ്ടാക്കാൻ കഴിയാതെ പോയി. നിലമ്പൂരിൽ കിട്ടാവുന്നതിൽ ഏറ്റവും മികച്ചു സ്ഥാനാർത്ഥിയെ നിർത്തി. കാലങ്ങൾക്ക് ശേഷം പാർട്ടി ചിഹ്നത്തിൽ വോട്ടിടാൻ അവസരം കിട്ടിയ പ്രവാസികളായ പാർട്ടിക്കാർ വിമാനം പിടിച്ചെത്തി വോട്ട് ചെയ്തു. എതിരാളികൾക്ക് പോലും എതിരഭിപ്രായം പറയാനില്ലാത്ത സ്വരാജ്. മുഖ്യമന്ത്രിയും മന്ത്രിമാരും നിലമ്പൂരിനെ ഇളക്കി മറിച്ച് പ്രചാരണം നടത്തി. എന്നിട്ടും പറഞ്ഞുനിൽക്കാൻ ആവാത്ത വിധം തോറ്റു.

സത്യത്തിൽ ഭരണവിരുദ്ധ വികാരം നിലമ്പൂരിൽ പ്രകടമായിരുന്നോ? നിലമ്പൂരിൽ റിപ്പോർട്ടിംഗിന് പോയ സുഹൃത്തുക്കളുടെ അഭിപ്രായത്തിൽ അങ്ങനെ കാര്യമായ ഭരണവിരുദ്ധ വികാരം ഉണ്ടായിരുന്നില്ല. അതിന് തെളിവായി ചൂണ്ടിക്കാണിക്കുന്നത് ഷൗക്കത്തിന് കഴിഞ്ഞ തവണത്തേക്കാൾ വോട്ടു കുറഞ്ഞതാണ്. പിന്നെന്താണ് കാരണം?