ലോകാരോഗ്യ ദിനം; കേരളീയർ ലജ്ജിച്ച് തലതാഴ്ത്തേണ്ട ദിവസം

ഇന്ന് ഏപ്രിൽ 7 ലോകാരോഗ്യദിനം. 1948 ൽ ലോകാരോഗ്യസംഘടന രൂപീകരിക്കപ്പെട്ട ദിനമാണ് ലോകാരോഗ്യദിനമായി ആചരിക്കുന്നത്. ലോകാരോഗ്യദിനത്തിൽ ചർച്ചചെയ്യാൻ എല്ലാ വർഷവും ഒരു സമകാലിക പ്രസക്തിയുള്ള വിഷയം ലോകാരോഗ്യ സംഘടന നിർദ്ദേശിക്കാറുണ്ട്. "ആരോഗ്യകരമായ തുടക്കങ്ങൾ, പ്രത്യാശയുള്ള ഭാവികൾ!" (Healthy Beginnings, Hopeful Futures" ) എന്ന ആഹ്വാനമാണ് ഈ വർഷത്തെ ലോകാരോഗ്യ ദിനം മുന്നോട്ട് വക്കുന്നത്. ഒഴിവാക്കാവുന്ന മാതൃ-ശിശു മരണങ്ങൾക്കെതിരായ പോരാട്ടത്തിന്റെ പ്രാധാന്യമാണ് ഈ ദിനം ലോകരാജ്യങ്ങളെ ഓർമ്മപ്പെടുത്തുന്നത്. അമ്മമാരുടെയും കുഞ്ഞുങ്ങളുടെയും ജീവനും ആരോഗ്യവും സംരക്ഷിക്കേണ്ടത് നമ്മുടെ അടിയന്തിര ദൗത്യമാണെന്നും ഈ ലക്ഷ്യം നടപ്പാക്കുന്നതിലൂടെ മാത്രമേ ശോഭനമായ ഒരു ഭാവി തലമുറ ഉറപ്പാക്കാൻ കഴിയൂ എന്നും ലോകാരോഗ്യസംഘടന ജാഗ്രതപ്പെടുത്തുന്നു.

മാതൃ-ശിശു മരണനിരക്ക് ഏതാണ്ട് വികസിത രാജ്യങ്ങൾക്കൊപ്പം നേടിക്കഴിഞ്ഞ സംസ്ഥാനമാണു കേരളം എന്നതിൽ നമുക്കഭിമാനിക്കാം. കേരളത്തിൽ ശിശുമരണക്ക് ഇപ്പോൾ കേവലം 6 ഉം (ആയിരം കുട്ടികളിൽ ഒരു വയസ്സിനുമുൻപ് മരണമടയുന്നവർ), മാതൃമരണനിരക്ക് 19 ഉം (ഒരു ലക്ഷം സ്ത്രീകളിൽ ഗർഭാവസ്ഥയും പ്രസവവുമായി ബന്ധപ്പെട്ട് സംഭവിക്കുന്ന മരണനിരക്ക്) ആണെങ്കിൽ രാജ്യത്ത് ഈ നിരക്ക് യാഥാക്രമം 28, 97 എന്ന നിലയിൽ ഉയർന്ന് നിൽക്കുന്നു. കേരളത്തിൽ ശിശുമരണനിരക്ക് വികസിത രാജ്യങ്ങളുടെ നിലവാരത്തിലെത്തിയിട്ടുണ്ട്. മാതൃമരണനിരക്ക് വർഷം തോറും കുറഞ്ഞും വരികയാണ് വൈകാതെ ലോകനിലവാവാരം കൈവരിക്കും എന്ന് ഉറപ്പാണ്.

സ്ത്രീകളൂടെ ഉയർന്ന വിദ്യാഭ്യാസ നിലവാരം , തുടങ്ങിയ സാമൂഹിക ഘടകങ്ങളും സ്ത്രീകൾക്കും കുട്ടികൾക്കും ലഭിക്കുന്ന മികച്ച ആരോഗ്യ പരിരക്ഷയും ഏതാണ്ട് നൂറുശതമാനം പ്രസവവും ആശുപത്രികളിൽ നടക്കുന്നതും കുറഞ്ഞിരിക്കുന്നതിൻ്റെ കാരണങ്ങളാണ്.

നിർഭാഗ്യവശാൽ കുറഞ്ഞ മാതൃ-ശിശു മരണനിരക്കിന്റെ കാര്യത്തിൽ അഭിമാനിക്കുന്ന കേരളീയർ മാതൃ-ശിശു മരണങ്ങൾക്കെതിരായ പോരാട്ടത്തിന്റെ ദിനമായ ഇന്നത്തെ ലോകാരോഗ്യദിനത്തിൽ പത്രങ്ങളിൽ മുൻപേജിൽ വന്ന “വീട്ടിൽ പ്രസവം, യുവതി മരിച്ചു” എന്ന ഞെട്ടിപ്പിക്കുന്ന വാർത്തയാണ് വായിക്കേണ്ടിവന്നത്. കേരള ആരോഗ്യമാതൃകയിൽ അഭിമാനിക്കുന്ന കേരളീയർ ലജ്ജിച്ച് തലതാഴ്ത്തേണ്ട ദിവസമായി ഈ വർഷത്തെ ലോകാരോഗ്യ ദിനം മാറിയതിൽ അതീവ ദുഃഖവും രോഷവുമുണ്ട്.

ഇതൊരു ഒറ്റപ്പെട്ട സംഭവുമല്ലെന്ന് ഓർക്കണം. 2019 മുതൽ 2024 സെപ്തംബർ വരെ 2931 വീട്ടു പ്രസവങ്ങളൂം തുടർന്ന് 19 ശിശുമരണങ്ങളൂം 2 മാതൃമരണങ്ങളും സംഭവിച്ചതായി രേഖപ്പെടുത്തപ്പെട്ടിട്ടുണ്ട്. രേഖപ്പെടുത്താതെ പോവുന്ന നിരവധി സംഭവങ്ങൾ വേറെയുമുണ്ട്. പലിടത്തും പുരുഷ പങ്കാളികളുടെ അന്ധവിശ്വാസത്തിനു സ്തീകൾ ബലിയാടുകളാവുകയാണുണ്ടായതെന്നും അറിയാൻ കഴിഞ്ഞിട്ടുണ്ട്. ‌ഇതൊരു മുന്നറിയിപ്പായി കണ്ട് ഇത്തരം പ്രവണതകൾ മുളയിലേ നുള്ളിക്കളയാനുള്ള ബോധവൽക്കരണത്തിനു പുറമേ കർശനമായ നിയമനിർമ്മാണവും നടത്തേണ്ടതാണ്.