ക്രിക്കറ്റ്‌ ഇന്ത്യയും സൗദി അറേബ്യയും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുമോ?

വിദേശ ലീഗുകളിൽ നിക്ഷേപം നടത്തിയിട്ടുള്ള ഐപിഎൽ ഫ്രാഞ്ചൈസികളൊന്നും ഇതുവരെ ഈ വിഷയത്തിൽ യാതൊരു പ്രതികരണവും നടത്തിയിട്ടില്ല. ബിസിസിഐയും ഇത്തരമൊരു കാര്യം ഇതുവരെ ഔ​ദ്യോ​ഗികമായി ചർച്ച ചെയ്തിട്ടില്ല. എന്നാൽ, കഴിഞ്ഞ കുറച്ച് വർഷങ്ങളായി, ഐപിഎല്ലുമായി സഹകരിക്കാൻ സൗദി അറേബ്യ അതീവ താൽപര്യം കാണിക്കുന്നുണ്ട്. കഴിഞ്ഞ വർഷം, ലോകത്തിലെ ഏറ്റവും വലിയ എണ്ണക്കമ്പനിയായ അരാംകോ, ഐപിഎല്ലിലെ ഓറഞ്ച് ക്യാപും പർപ്പിൾ ക്യാപ്പും സ്പോൺസർ ചെയ്തിരുന്നു. ഇത്തവണത്തെ ഐപിഎൽ സ്പോൺസർമാരുടെ പട്ടികയിലും അരാംകോ ഉണ്ട്. ഇതിനെല്ലാം പുറമേ, ഇത്തവണ യുഎൻഅക്കാഡമിക്ക് (Unacademy) പകരമായി, ഐപിഎല്ലിന്റെ ഔദ്യോഗിക പങ്കാളികളിൽ ഒരാളായി ബിസിസിഐ സൗദി ടൂറിസവുമായി കരാറിൽ ഒപ്പിട്ടിരുന്നു. ഈ ഡീൽ വരും വർഷങ്ങളിലും നീളാൻ സാധ്യതയുണ്ട്.

”ഇന്ത്യൻ പ്രീമിയർ ലീഗ് ആഗോള കായിക ഭൂപടത്തിൽ തന്നെ വളരെ വലിയൊരു ടൂർണമെന്റായി ഉയർന്നുവരുന്നത് ഞങ്ങൾ ശ്രദ്ധിച്ചിട്ടുണ്ട്. രാജ്യങ്ങളെ ഒരുമിപ്പിക്കാനുള്ള ഐപിഎല്ലിന്റെ ശക്തിയിൽ സൗദി ടൂറിസം അതോറിറ്റിക്ക് വലിയ വിശ്വാസമുണ്ട്. ഞങ്ങളെ സംബന്ധിച്ചിടത്തോളം ഐപിഎൽ ഒരു പ്രതീക്ഷയാണ്”, സൗദി ടൂറിസം വകുപ്പ് പറഞ്ഞു.

‌

‌”സൗദി അറേബ്യയിലെ അതുല്യവും വൈവിധ്യ പൂർണവുമായ നിരവധി കാര്യങ്ങൾ പ്രോത്സാഹിപ്പിക്കുന്നതിനും ലോകത്തെ പ്രമുഖ വിനോദ സഞ്ചാര കേന്ദ്രങ്ങളിൽ ഒന്നായി സൗദിയെ വളർത്തുന്നതിനും ഈ പങ്കാളിത്തം വളരെയധികം സഹായിക്കുമെന്ന് ഞങ്ങൾ വിശ്വസിക്കുന്നു. ഇത്തരമൊരു പങ്കാളിത്തം സൗദിയിൽ ക്രിക്കറ്റ് എന്ന കായിക വിനോദത്തിന് പുതിയ അവസരങ്ങൾ സൃഷ്ടിക്കുകയും ഈ മേഖലയിലെ കായിക താരങ്ങൾക്ക് ഉണർവേകുകയും ചെയ്യും”, ബിസിസിഐ സെക്രട്ടറി ജയ് ഷാ പറഞ്ഞു.