പിറന്നാൾ ആഘോഷത്തിനിടയിൽ അഹാനയുടെ ബെല്ലി ഡാൻസ്; കയ്യടിച്ച് കാണികൾ

അബുദാബിയിൽ 29-ാം പിറന്നാൾ ആഘോഷിക്കുന്ന അഹാന കൃഷ്ണയുടെ ചിത്രങ്ങളും വീഡിയോകളുമാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്. പിറന്നാൾ ആഘോഷിക്കാൻ അബുദാബിയിലെത്തിയ താരം കടലിൽ ജെറ്റ് കാർ ഓടിക്കുന്നതിന്റെ ചിത്രങ്ങളും വീഡിയോകളും കഴിഞ്ഞ ദിവസം പങ്കുവച്ചിരുന്നു.

താരത്തിന്റെ സാഹസികത നിറഞ്ഞ പിറന്നാൾ ആഘോഷ വീഡിയോയിൽ രസകരമായ നിരവധി കമന്റുകളും നിറഞ്ഞിരുന്നു. കടലിലെ രസകരമായ പിറന്നാൾ ആഘോഷത്തിന് പിന്നാലെ, അബുദാബിയിലെ മരുഭൂമിയിലെ സായാഹ്നവും സൂര്യാസ്തമയം കാണുന്നതിന്റെയും ചിത്രങ്ങളാണ് താരം പങ്കുവച്ചിരിക്കുന്നത്.

അബുദാബിയിലെ പിറന്നാൾ ആഘോഷം കടലിൽ മാത്രമല്ല, മരുഭൂമിയിലും അഹാന അടിച്ചുപൊളിക്കുകയാണെന്ന തരത്തിലാണ് ചിത്രങ്ങൾക്കും വീഡിയോകൾക്കും താഴെ വരുന്ന കമന്റുകൾ. സ്ലീവ്‌‍ലെസ് ഫ്രോക്കിൽ അതീവ സുന്ദരിയായിട്ടാണ് താരം ചിത്രങ്ങളിലുള്ളത്. താരം പങ്കുവച്ചിരിക്കുന്ന വീഡിയോയിൽ, ബെല്ലി ഡാൻസ് കളിക്കുന്ന നർത്തികിയ്ക്കൊപ്പം അഹാനയും ഡാൻസ് ചെയ്യുന്നുണ്ട്. അഹാനയുടെ ഡാൻസ് കണ്ട് കാണികൾ കയ്യടിക്കുന്നതും കാണാം.

'മാലാഖയെ പോലെയുണ്ട്, ഡാൻസ് കളിക്കുന്ന ചേച്ചി കേരളത്തിൽ നിന്ന് വന്ന ഇവൾ എനിക്കൊരു വെല്ലുവിളി ആകുമോ..., മലയാളി ആണെന്ന് പറയില്ല.' ഇത്തരത്തിൽ നിരവധി കമന്റുകളാണ് നിറയുന്നത്.

അബുദാബിയിൽ പിറന്നാൾ ആഘോഷിക്കാൻ അമ്മ സിന്ധുമാത്രമാണ് അഹാനയോടൊപ്പം ഉണ്ടായിരുന്നത്. കടലിലെയും മരുഭൂമിയിലെയും സുന്ദര നിമിഷങ്ങൾക്ക് പുറ‌മെ, താമസിച്ച സ്റ്റാർ ഹോട്ടലിലും അഹാനയ്ക്ക് ഒരു സർപ്രൈസ് പിറന്നാൾ വിരുന്ന് ഉണ്ടായിരുന്നു. റൂമിനുള്ളിൽ അതെല്ലാം ഒരുക്കി വെക്കാൻ ഹോട്ടലുകാരാണ് തയാറെടുപ്പുകൾ നടത്തിയത്.