യുകെയില്‍ ഏറ്റവും മികച്ച വസ്ത്രം ധരിക്കുന്നത് ഒരു ഇന്ത്യാക്കാരിയാണെന്ന് പറഞ്ഞാല്‍ വിശ്വസിക്കുമോ ?

ലോകരാജ്യങ്ങളില്‍ നിര്‍ണായക സ്ഥാനത്തുള്ള ബ്രിട്ടനില്‍ ഏറ്റവും മികച്ച വസ്ത്രം ധരിക്കുന്നവരുടെ പട്ടിക അടുത്തിടെ പുറത്തുവിട്ടിരുന്നു. ടാറ്റ്ലര്‍ മാഗസിന്‍ തിരഞ്ഞെടുത്ത ബ്രിട്ടനിലെ ഏറ്റവും നന്നായി വസ്ത്രം ധരിക്കുന്നവരുടെ കൂട്ടത്തില്‍ ഒന്നാമതത്തെത്തിയത് ഒരു ഇന്ത്യാക്കാരിയാണ്. 

ബ്രിട്ടിഷ് പ്രധാനമന്ത്രി ഋഷി സുനകിന്‍റെ ഭാര്യയും ഇന്‍ഫോസിസ് സ്ഥാപകന്‍ നാരായണ മൂര്‍ത്തിയുടെ മകളുമായ അക്ഷതാ മൂര്‍ത്തിയാണ് ബ്രിട്ടനില്‍ ഏറ്റവും മികച്ച വസ്ത്രം ധരിക്കുന്നവരുടെ പട്ടികയില്‍ ഒന്നാമതത്തെത്തിയത്. 

നടന്‍ ബില്‍ നൈഗി, ബിയാട്രിസ് രാജകുമാരിയുടെ ഭര്‍ത്താവ് എഡ്വാര്‍ഡോ മാപ്പെല്ലി മോസി എന്നിവരാണ് ഫാഷന്‍ ഡിസൈനറും ബിസിനസുകാരിയുമായ അക്ഷതക്കൊപ്പം പട്ടികയില്‍ ഇടം നേടിയ മറ്റ് പ്രമുഖര്‍. 

ഫാഷനും സ്റ്റൈലും ഒട്ടും കുറയാത്ത കൂള്‍ ലുക്കാണ് അക്ഷതയുടെ വസ്ത്രധാരണത്തിന്‍റെ പ്രത്യേകത. 'ഫസ്റ്റ് ലേഡി ഫാബുലസ്' എന്ന വിശേഷണം നല്‍കിയാണ് ടാറ്റ്ലര്‍ മാഗസിന്‍ ഈ 43കാരിയായ ബിസിനസുകാരിയെ തെരഞ്ഞെടുത്തത്. 

ബ്രിട്ടീഷ് പ്രധാനമന്ത്രി ഋഷി സുനകിനൊപ്പം പൊതുവേദികള്‍ പതിവായി പ്രത്യക്ഷപ്പെടാറുള്ള അക്ഷത ഉയര്‍ന്ന നിലവാരമുള്ള ബ്രാന്‍ഡഡ് വസ്ത്രങ്ങളും ഉല്‍പ്പന്നങ്ങളുമാണ് ഉപയോഗിക്കാറുള്ളത്. 

കുട്ടികളെ സ്കൂളില്‍ നിന്ന് കൂട്ടിക്കൊണ്ടുപോകാനെത്തിയപ്പോള്‍  അക്ഷത ധരിച്ചിരുന്ന ജെഡബ്ല്യു ആൻഡേഴ്‌സണ്‍ എന്ന കമ്പനിയുടെ 570 പൗണ്ട് (60,218 രൂപ) വില വരുന്ന  സ്ലിപ്പറുകൾ വാര്‍ത്തകളില്‍ ഇടം നേടിയിരുന്നു. 

ഗൂച്ചി ബ്രാന്‍ഡിന്റെ 445 പൗണ്ട് (47,023 രൂപ) വിലയുള്ള സ്‌നീക്കറുകള്‍ ധരിച്ചതും ഒരു ലക്ഷത്തോളം രൂപ വിലമതിക്കുന്ന സ്‌കര്‍ട്ട് അണിഞ്ഞതുമെല്ലാം അക്ഷതയെ ഫാഷന്‍ ലോകത്ത് അടയാളപ്പെടുത്തിയിരുന്നു.