വിദേശിയായ അമ്മയുമായി പിരിഞ്ഞ അച്ഛൻ പുനർവിവാഹിതനായി; സുരേഷ് ഗോപിയുടെ നായികയുടെ ജീവിതത്തിലെ ആരും അറിയാത്ത കാലം

മലയാള സിനിമയിൽ ഉൾപ്പെടെ അഭിനയിച്ച് തകർത്ത യുവ സുന്ദരിയുടെ മുഖം കണ്ട പലർക്കും വർഷങ്ങൾക്ക് മുൻപേ തോന്നിയ ഒരു സംശയമുണ്ട്. അവർക്ക് ഒരു ഇന്ത്യക്കാരിയുടെ ഛായയെക്കാൾ കൂടുതൽ ഒരു വിദേശിയുടെ ലുക്കാണ്. ആ തോന്നൽ സത്യമായിരുന്നു. ആ നായിക പിറന്നത് ഇന്ത്യക്കാരനായ പിതാവിനും അയർലൻഡ് സ്വദേശിനിയായ അമ്മയ്ക്കുമാണ്. മലയാള സിനിമയിൽ സുരേഷ് ഗോപിയുടെ നായികയായി അഭിനയിക്കുമ്പോൾ അവർക്ക് ആകെ പ്രായം 23 വയസ്. പിന്നീട് ഈ നടി തെന്നിന്ത്യൻ സിനിമയുടെ ഒഴിച്ചുകൂടാനാവാത്ത ഘടകമായി. പ്രമുഖ തെന്നിന്ത്യൻ നായകന്റെ ഭാര്യയും അദ്ദേഹത്തിന്റെ മകന്റെ അമ്മയുമായി. വർഷങ്ങൾക്ക് ശേഷം തന്റെ ജീവിതത്തിലെ ചർച്ച ചെയ്യപ്പെടാതെ പോയ ഏട് അവർ തുറക്കുന്നു

ആ നടിയുടെ പേര് അമല, ഇന്ന് അമല അക്കിനേനി. 'എന്റെ സൂര്യപുത്രിക്ക്' എന്ന സിനിമയിൽ നായികയായി അഭിനയിച്ച താന്തോന്നി പെണ്ണിനെ കണ്ട അന്നത്തെ സാമൂഹിക ചുറ്റുപാടിലെ പ്രേക്ഷകർ പലരും നെറ്റിചുളിച്ചു. അത്രയേറെ തന്റേടമുള്ള പെൺകുട്ടിയായാണ് അമല അക്കിനേനി മായ വിനോദിനി എന്ന കഥാപാത്രത്തെ അവതരിപ്പിച്ചത്. ശ്രീവിദ്യയുടെ വസുന്ധര ദേവി എന്ന കഥാപാത്രത്തിന്റെ മകളായാണ് അമല വേഷമിട്ടത്. അച്ഛനും അമ്മയും ആരെന്നറിയാതെ വളരേണ്ടി വരുന്ന ഒരു യുവതിയുടെ മാനസിക സംഘര്ഷങ്ങളും ജീവിതവും ഒപ്പിയെടുത്ത ചിത്രമായിരുന്നു 'എന്റെ സൂര്യപുത്രിക്ക്' (തുടർന്ന് വായിക്കുക)

അമലയുടെ വ്യക്തിജീവിതത്തെ സംബന്ധിച്ച് പ്രചരിക്കുന്ന വിവരങ്ങളിൽ അവരുടെ വിവാഹജീവിതത്തെക്കുറിച്ചുള്ള കാര്യങ്ങളാണ് ഏറെയും. നടൻ നാഗാർജുനയുടെ ഭാര്യയായ അമലയ്ക്ക് അഖിൽ അക്കിനേനി എന്ന മകനുണ്ട്. നാഗാർജുനയുടെ രണ്ടാം വിവാഹമായിരുന്നു ഇത്. ആദ്യവിവാഹത്തിലെ മകനാണ് നടൻ നാഗചൈതന്യ. വിദേശിയായ അമ്മയുടെയും ബംഗാൾ സ്വദേശിയായ അച്ഛന്റെയും ജീവിതത്തെ കുറിച്ച് അമല അടുത്തിടെ തുറന്നു പറഞ്ഞ ചില കാര്യങ്ങൾ സോഷ്യൽ മീഡിയയിൽ ശ്രദ്ധ നേടുന്നു

'അവൾ വികടൻ' എന്ന യൂട്യൂബ് ചാനലിലെ അഭിമുഖത്തിലാണ് അമല അക്കിനേനിയുടെ വെളിപ്പെടുത്തൽ. തന്റെ അച്ഛനമ്മമാർ വിവാഹമോചിതരായി എന്ന് അമല വ്യക്തമാക്കി. അച്ഛൻ മറ്റൊരു വിവാഹം ചെയ്തു. ഉത്തർപ്രദേശിൽ പഠിച്ചുവളർന്ന വ്യക്തിയാണ് അമല അക്കിനേനിയുടെ നേവി ഉദ്യോഗസ്ഥനായ പിതാവ്. വിവാഹമോചനം നടന്നുവെങ്കിലും അമ്മ മകൾ അമലയുടെ കൂടെക്കൂടി. അമ്മയെ നോക്കണം എന്ന ബോധ്യം അമലയുടെ മനസിലുണ്ട്. അമ്മയ്ക്ക് വേണ്ടി അമല ഒരു വീട് സമ്മാനിച്ചിരുന്നു

അമ്മ തനിക്ക് ഏറെ പ്രിയപ്പെട്ടതാണ്. ഇപ്പോൾ തനിക്കും ഭർത്താവ് നാഗാർജുനയ്ക്കും ഒപ്പമാണ് അമ്മയുടെ ജീവിതം. അമ്മയ്ക്ക് ഇപ്പോൾ 88 വയസ് പ്രായമുണ്ട്. ഒട്ടേറെ വസ്തുവകകൾ സ്വന്തമായുണ്ടെങ്കിലും, അമ്മയ്ക്കായൊരു വീട് ഏറെ സന്തോഷം പകരുന്നതായിരുന്നു. എല്ലാവരും അവരുടെ അമ്മയ്ക്കായി ഒരു വീട് നൽകണം എന്ന് ആഗ്രഹിക്കുന്നതായി അമല. ഇപ്പോൾ അച്ഛനെയും അമ്മയേയും താൻ പരിപാലിക്കുന്നു. അച്ഛൻ ഉത്തരാഖണ്ഡിൽ ഹിമാലയത്തിലാണുള്ളത്. പോയാൽ പത്തു ദിവസം അവിടെ ചിലവഴിച്ച ശേഷം മാത്രമേ മടങ്ങൂ. അവിടെ ഒരു കെയർടേക്കറുമുണ്ട് എന്ന് അമല

മലയാളത്തിൽ അമല അക്കിനേനി വളരെ കുറച്ചു സിനിമകളിൽ മാത്രമേ അഭിനയിച്ചിട്ടുള്ളൂ. രണ്ടാമത് ചിത്രം 'ഉള്ളടക്കം'. ഇതിൽ മോഹൻലാലിന്റെ ഒപ്പം അഭിനയിച്ചുവെങ്കിലും, ശോഭനയാണ് അദ്ദേഹത്തിന് നായികയായത്. അതിനു ശേഷം 2017ൽ 'കെയർ ഓഫ് സൈറ ഭാനു' എന്ന ചിത്രത്തിൽ അമല മടങ്ങിവന്നു. തമിഴ്, തെലുങ്ക്, കന്നഡ, ഹിന്ദി ഭാഷകളിലെ ചിത്രങ്ങളിൽ അമല അക്കിനേനി വേഷമിട്ടിട്ടുണ്ട്