'ദീപാവലിക്ക് പടക്കം വാങ്ങിച്ച് പണം കളയില്ല, ജീവകാരുണ്യ പ്രവർത്തനങ്ങൾക്ക് നൽകാൻ അന്ന് ഞാൻ തീരുമാനിച്ചു'; അമീഷ പട്ടേൽ

കാരുണ്യ പ്രവർത്തനങ്ങൾ ചെയ്തുകൊണ്ടാണ് ദീപാവലി ആഘോഷിക്കേണ്ടതെന്ന് നടി അമീഷ പട്ടേൽ. താൻ ചെറുപ്പത്തിൽ എടുത്ത തീരുമാനമാണ് ഇതെന്നും നടി പറഞ്ഞു. തന്റെ വീട്ടിൽ പ്രിയപ്പെട്ടവർക്കായി ഒരുക്കിയ ദീപാവലി ആഘോഷത്തിന് ശേഷം എഎൻഐയോട് സംസാരിക്കുകയായിരുന്നു അമീഷ പട്ടേൽ.

'എല്ലാവർക്കും ദീപാവലി ആശംസകൾ നേരുന്നു. എല്ലാവരുടെയും നല്ല ആരോഗ്യം, സമൃദ്ധി, സ്നേഹം, വിജയം, സന്തോഷം, സമാധാനം എന്നിവയ്ക്കായി ഞാൻ പ്രാർത്ഥിക്കുന്നു. ചെറുപ്പത്തിൽ ഞാനൊരു തീരുമാനം എടുത്തിരുന്നു. . ദീപാവലിക്ക് പടക്കം വാങ്ങി പണം കളയാതെ സമ്പാദ്യം കാരുണ്യ പ്രവര്‍ത്തനങ്ങള്‍ക്കുവേണ്ടി മാറ്റിവക്കണമെന്ന്. എന്റെ ഈ തീരുമാനത്തിൽ മുത്തശ്ശി വളരെ അധികം അഭിമാനിച്ചു. അതിനുശേഷം എല്ലാ വർഷവും ദീപാവലിക്ക് പണം സംഭാവന ചെയ്യാറുണ്ട്.'- അമീഷ പട്ടേൽ പറഞ്ഞു.

തന്റെ വീട്ടിൽ ഒരുക്കിയ ദീപാവലി ആഘോഷത്തിൽ ​ഗോൾഡൻ നിറത്തിലെ സാരിയാണ് അമീഷ ധരിച്ചിരുന്നത്. ദീപാവലി ആഘോഷത്തിന് നിരവധി പേരാണ് അമീഷയുടെ വസിതിയിൽ എത്തിയത്.

'ഗദർ2' എന്ന ചിത്രത്തിലാണ് അമീഷ പട്ടേൽ അവസാനമായി അഭിനയിച്ചത്. സണ്ണി ഡിയോൾ നായകനായെത്തിയ ചിത്രം 500 കോടി ക്ലബില്‍ ഇടം നേടിയിരുന്നു. അനിൽ ശർമ്മ സംവിധാനം ചെയ്ത 'ഗദർ 2' 2001ൽ തിയേറ്ററുകളിൽ റിലീസ് ചെയ്ത ഹിറ്റ് ചിത്രത്തിൻ്റെ തുടർച്ചയായിരുന്നു.

വിഭജന കാലത്തെ സംഭവങ്ങളെ ആസ്പദമാക്കി ചിത്രീകരിച്ച ചിത്രത്തിൽ സണ്ണി ഡിയോൾ താര എന്ന ട്രക്ക് ഡ്രൈവറായി അഭിനയിച്ചപ്പോൾ അമീഷ പട്ടേൽ സക്കീനയായി അഭിനയിച്ചു.