'ഞാനില്ലെങ്കിലും എന്റെ ഹൃദയം എപ്പോഴും അമ്മയോടൊപ്പമുണ്ട്'; ഒരുപാട് മിസ് ചെയ്യുന്നുവെന്ന് അമൃത സുരേഷ്

'ഞാനില്ലെങ്കിലും എന്റെ ഹൃദയം എപ്പോഴും അമ്മയോടൊപ്പമുണ്ട്, അമ്മയെ ഒരുപാട് മിസ് ചെയ്യുന്നു' അമൃത സുരേഷ് തന്റെ അമ്മയ്ക്ക് പിറന്നാൾ ആശംസകൾ നേര്‍ന്ന് പങ്കുവെച്ച കുറിപ്പാണിത്. ഇന്ന് അമൃതയുടെ അമ്മയുടെ ഷഷ്ഠിപൂർത്തിയാണ്.

‘ഉയിരും നീയേ ഉടലും നീയേ’ എന്ന പാട്ട് പാടിയാണ് അമൃത ആശംസകൾ നേർന്നത്. സംഗീതപരിപാടിയുമായി ബന്ധപ്പെട്ട് വിദേശത്ത് ആയതിനാൽ ഗായികയ്ക്ക് അമ്മയുടെ പിറന്നാളിന് വീട്ടിലെത്താനായില്ല. അകലെയായിരിക്കുന്നതിന്റെ സങ്കടവും അമൃത പങ്കുവച്ചിട്ടുണ്ട്.

‘അമ്മാ... അറുപതാം ജന്മദിനാശംസകൾ. അമ്മേ... ഞാനില്ലെങ്കിലും എന്റെ ഹൃദയം എപ്പോഴും അമ്മയോടൊപ്പമുണ്ട്. അമ്മയെ ഒരുപാട് മിസ് ചെയ്യുന്നു. ഉമ്മ’ എന്നാണ് അമൃതയുടെ ഹൃദ്യമായ കുറിപ്പ്. ഗായികയുടെ പോസ്റ്റിനു പിന്നാലെ നിരവധി പേരാണ് ലൈലയ്ക്കു പിറന്നാൾ മംഗളങ്ങൾ നേർന്ന് രംഗത്തെത്തുന്നത്.

അമൃതയുടെ സഹോദരിയും ഗായികയുമായ അഭിരാമി സുരേഷ് അമ്മയ്ക്ക് ആശംസകൾ അറിയിച്ച് പങ്കുവച്ച കുറിപ്പും ശ്രദ്ധേയമായിരുന്നു. 'എത്രയൊക്കെ വേദനകളുണ്ടെങ്കിലും തങ്ങളെ ചിരിപ്പിക്കാനും ചിന്തിപ്പിക്കാനും താങ്ങായും തണലായും കൂടെ നിൽക്കുന്നയാളാണ് അമ്മയെന്നായിരുന്നു അഭിരാമിയുടെ കുറിപ്പ്. അമൃത അടുത്തില്ലാത്തതിന്റെ വിഷമവും ഗായിക പ്രകടിപ്പിച്ചു.

അമൃതയുടെയും അഭിരാമിയുടെയും സംഗീതജീവിതത്തിൽ വലിയ സ്വാധീനം ചെലുത്തിയവരാണ് മാതാപിതാക്കളായ സുരേഷും ലൈലയും. സ്ട്രോക്കിനെ തുടർന്ന് കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കവെ കഴിഞ്ഞ വർഷം സുരേഷ് അന്തരിച്ചു.