'സിക്സ് പാക്കി‌ലും സ്റ്റാർ ആകുന്നതിലുമല്ല കാര്യം; നല്ല അഭിനേതാവാകുകയാണ് പ്രധാനം': കരീന കപൂർ

സിക്സ് പാക്കി‌ലും വലിയ 'സ്റ്റാർ' ആകുന്നതിലുമല്ല കാര്യമെന്നും നല്ല അഭിനേതാവാകുകയാണ് പ്രധാനമെന്നും ബോളിവുഡ് താരം കരീന കപൂർ. ബോളിവുഡിൽ നല്ല നടൻ എന്ന പേരു വേണമെങ്കിൽ നല്ല അഭിനയ പാടവം വേണമെന്നും കരീന എടുത്തുപറഞ്ഞു.

നല്ല നടനാകാൻ സിക്സ് പാക്ക് മാത്രം പോരാ എന്നും കരീന പറഞ്ഞു. ആരുടെയും പേര് പരാമർശിക്കാതെയായിരുന്നു താരത്തിന്റെ പ്രതികരണം.

എന്നാൽ, നല്ല നടൻമാരെക്കുറിച്ചു പറയുന്നതിനിടെ, തന്റെ ബന്ധുവായ രൺബീർ കപൂറിന്റെ പേരും കരീന പരാമർശിച്ചു. രൺബീർ ഒരു മികച്ച നടനാണെന്നും നല്ല 'താരം' നല്ല 'നടൻ' ആകണമെന്നില്ല എന്നും കരീന കൂട്ടിച്ചേർത്തു.

''നിങ്ങൾക്ക് കഴിവുണ്ടെങ്കിൽ ആളുകൾ നിങ്ങളെ ഇഷ്ടപ്പെടുകയും നിങ്ങളോട് അടുപ്പം തോന്നുകയും ചെയ്യും. എന്നാൽ, താരപദവി ലഭിക്കുക എന്നാൽ ഇതല്ല അർത്ഥമാക്കുന്നത്. അവന് സിക്സ് പാക്ക് ഉണ്ട്, അവൻ ഹോട്ട് ആണ്, അവൻ ഒരു വലിയ താരമാണ് എന്നൊക്കെ പറയുന്നതിൽ കാര്യമില്ല.

''ദയവായി നിങ്ങളുടെ ടീ ഷർട്ട് എടുത്തു ധരിക്കൂ. എനിക്ക് നിങ്ങളെ നോക്കാൻ പോലും തോന്നുന്നില്ല'' എന്നാണ് അവരോടൊക്കെ പറയാൻ തോന്നാറ്'', കരീന കപൂർ കൂട്ടിച്ചേർത്തു.

ബോളിവുഡ് താരം ബോബി ഡിയോളിനെയും കരീന പ്രശംസിച്ചു. ''നിങ്ങൾ ഒരു നല്ല അഭിനേതാവാണെങ്കിൽ, വളരെക്കാലം ഈ ഇൻഡസ്ട്രിയിൽ നിലനിൽക്കും. വ്യത്യസ്തമായ കഥാപാത്രങ്ങളാണ് ഇപ്പോൾ ബോബി ചെയ്യുന്നത്. അദ്ദേഹം തന്റെ കഴിവുകൾ കൂടുതൽ പരീക്ഷിക്കുകയാണ്. ഒരു നല്ല നടനെ നിങ്ങൾക്ക് തിരസ്കരിക്കാനാകില്ല'', കരീന കൂട്ടിച്ചേർത്തു.

ഒരു അഭിനേതാവിനെ സംബന്ധിച്ചിടത്തോളം ഏറ്റവും വെല്ലുവിളി നിറഞ്ഞ വേഷങ്ങൾ അവതരിപ്പിക്കുക എന്നത് ഏറെ പ്രധാനപ്പെട്ട കാര്യമാണെന്നും കരീന പറഞ്ഞു.