Oscar Rajnikanth| 'പോയി ഓസ്കർ കൊണ്ടുവാ'; തലൈവർ രജനികാന്ത് ജൂഡ് ആൻ്റണിയോട്

പുതിയ ചിത്രം തലൈവര്‍ 170ന്റെ ഷൂട്ടിങ്ങിന്റെ ഭാഗമായി തിരുവനന്തപുരത്താണ് രജനീകാന്ത്. ംതാരത്തെ ഒന്നു കാണാനായി നിരവധി ആരാധകരാണ് വഴികളിലും ഷൂട്ടിങ് സെറ്റിലും കാത്തുനില്‍ക്കുന്നത്.

ഇതിനിടെയിൽ രജനികാന്തിനെ നേരിട്ട് കണ്ട സന്തോഷ വാർത്ത പങ്കുവച്ച് സംവിധായകൻ ജൂഡ് ആന്തണി ജോസഫ്. നേരിട്ട് കണ്ട് സംസാരിക്കുന്നതിന്റെയും അനുഗ്രഹം വാങ്ങുന്നതിന്റെയും ചിത്രം സമൂഹ മാധ്യമങ്ങളിൽ വൈറലാവുകയാണ്.

കേരളം നേരിട്ട പ്രളയത്തെ ആസ്പദമാക്കി ജൂഡ് ആന്റണി ജോസഫ് ഒരുക്കിയ 2018 സിനിമയെ വിവരിക്കാൻ വാക്കുകളില്ല എന്നാണ് രജനികാന്ത് പറഞ്ഞത്. 2018 സിനിമയ്ക്ക് ഓസ്കർ ലഭിക്കാൻ തന്റെ പ്രാർഥനകളും അനുഗ്രഹങ്ങളും ഉണ്ടാകുമെന്നും താരം പറഞ്ഞു.

എന്തൊരു സിനിമയാണിത് ജൂഡ്, നിങ്ങൾ എങ്ങനെ ഷൂട്ട് ചെയ്തു? അദ്ഭുതകരമായ പ്രവൃത്തി തന്നെ. പോയി ഓസ്കർ കൊണ്ട് വാ, എന്റെ അനുഗ്രഹങ്ങളും പ്രാർഥനകളും നിങ്ങളോടൊപ്പമുണ്ട് എന്ന് തലൈവർ പറഞ്ഞുവെന്ന് കുറിച്ചാണ് ജൂഡ് ചിത്രങ്ങൾ പങ്കുവച്ചത്.

ഈ അവിസ്മരണീയമായ അവസരത്തിന് ദൈവത്തിന് നന്ദി. ഇത് സാധ്യമാക്കിയതിന് എന്റെ പ്രിയ സുഹൃത്ത് സൗന്ദര്യയ്ക്കും (സൗന്ദര്യ രജനികാന്ത്) നന്ദി.’’ ജൂഡ് ആന്തണി കുറിച്ചു.

രജനികാന്തിനെ സന്ദർശിക്കാൻ എത്തിയ ജൂഡ് ആന്തണിയോടൊപ്പം 2018 സിനിമയുടെ നിർമാതാക്കളായ വേണു കുന്നപ്പള്ളിയും ആന്റോ ജോസഫും എത്തിയിരുന്നു. തലൈവർ 170 എന്ന ചിത്രത്തിന്റെ ഷൂട്ടിങ്ങിനായി തിരുവനന്തപുരത്ത് എത്തിയ താരത്തെ കാണാൻ നിരവധി പേരാണ് എത്തുന്നത്.

സൂര്യ നായകനായ 'ജയ്‌ ഭീം' എന്ന സൂപ്പർഹിറ്റ് ചിത്രത്തിന് ശേഷം ജ്ഞാനവേൽ സംവിധാനം ചെയ്യുന്ന ചിത്രമാണിത്. നായിക മഞ്ജു വാരിയർ ആയിരിക്കുമെന്നാണ് റിപ്പോർട്ടുകൾ. ഫഹദ് ഫാസിലും പ്രധാന വേഷത്തിലെത്തുന്നുണ്ട്. ചിത്രീകരണത്തിനായി പത്ത് ദിവസം അദ്ദേഹം തിരുവനന്തപുരത്തുണ്ടാകും.