Kajol | ഇങ്ങനെ തരംതാഴരുത് കാജോൾ, നിങ്ങളെ എങ്ങനെ വിശ്വസിക്കും എന്നാരാധകർ; നടിയുടെ സോഷ്യൽ മീഡിയ 'പിന്മാറ്റത്തിന്' പിന്നിൽ

കഴിഞ്ഞ ദിവസം രാവിലെയാണ് താൻ സോഷ്യൽ മീഡിയ വിടുന്നതായി ദുരൂഹത നിറഞ്ഞ ഒരു പോസ്റ്റിലൂടെ നടി കാജോൾ (actor Kajol) അറിയിച്ചത്. ഔദ്യോഗിക ഇൻസ്റ്റഗ്രാം ഹാൻഡിലിൽ ഒരു പോസ്റ്റിലൂടെ കടുത്ത തീരുമാനം അറിയിക്കുകയായിരുന്നു. 'എന്റെ ജീവിതത്തിലെ ഏറ്റവും കഠിനമായ പരീക്ഷണങ്ങളിലൊന്ന് അഭിമുഖീകരിക്കുന്നു' എന്ന അടിക്കുറിപ്പോടെയാണ് അവർ പോസ്റ്റ് പങ്കിട്ടത്. തീരുമാനത്തിന് പിന്നിലെ കാരണം കാജോൾ വെളിപ്പെടുത്തിയില്ല

ഒന്നൊഴികെ, എല്ലാ പോസ്റ്റുകളും നീക്കം ചെയ്യുകയും ചെയ്തു. എന്നിരുന്നാലും, താരത്തിന്റെ തീരുമാനത്തെ പിന്തുണച്ച് നിരവധി ആരാധകർ അഭിപ്രായം രേഖപ്പെടുത്തി (തുടർന്ന് വായിക്കുക)

“ഇടവേള നിങ്ങൾക്ക് വലിയ ഗുണം ചെയ്യുമെന്ന് ഞാൻ പ്രതീക്ഷിക്കുന്നു, ജീവിതത്തിന്റെ കാഠിന്യമേറിയ കാലത്തിലൂടെ സഞ്ചരിക്കുമ്പോൾ നിങ്ങൾക്ക് നല്ലത് മാത്രം ആശംസിക്കുന്നു. പ്രാർത്ഥനകളും സ്നേഹവും," ഒരു ആരാധകൻ എഴുതി. "ഞങ്ങൾ നിങ്ങളെ സ്നേഹിക്കുന്നു. സുരക്ഷിതമായും ആരോഗ്യത്തോടെയും ഇരിക്കുക," മറ്റൊരാൾ കൂട്ടിച്ചേർത്തു. “ഏത് പ്രശ്‌നവും നേരിടാൻ നിങ്ങൾ ശക്തയാണ്. ഇതും നിങ്ങൾ തരണം ചെയ്യും,” എന്ന് വേറൊരു ആരാധകൻ

ശേഷം കാജോൾ മാധ്യമങ്ങളിൽ നിന്ന് ഒഴിഞ്ഞുമാറുന്ന ഒരു വീഡിയോ പാപ്പരാസികളുടെ പേജുകളിലൂടെ പുറത്തുവന്നു. ഒരു കെട്ടിടത്തിൽ നിന്ന് പുറത്തുവരുമ്പോൾ ഫോട്ടോ എടുക്കാനായി പാപ്പുകൾ പിന്തുടർന്നപ്പോൾ, കാജോൾ അവരെ ഗൗനിക്കാതെ കാറിൽ കയറിപ്പോയി

പോരെങ്കിൽ, ഇടവേള എടുക്കുന്നു എന്ന് പറഞ്ഞ ശേഷം സോഷ്യൽ മീഡിയയിലും നടി നിശബ്ദയായി തിരിച്ചെത്തി. ഒരു OTT പ്ലാറ്റ്‌ഫോമുമായി ചേർന്നുള്ള സഹകരണ പോസ്റ്റിൽ, 'ദി ഗുഡ് വൈഫ്' എന്ന ഷോയുടെ ടീസർ കാജോൾ പോസ്റ്റ് ചെയ്തു

സോഷ്യൽ മീഡിയയിൽ നിന്നും ഇടവേളയെടുക്കുന്നു എന്ന് പറഞ്ഞ അതേ വാചകം തന്നെ ഈ ടീസറിന്റെ ക്യാപ്‌ഷനിലും കാണാം. ഇത് കണ്ടതും ഇനി ആര് നിങ്ങളെ വിശ്വസിക്കും, പ്രൊമോഷന് വേണ്ടി ഇത്രയും തരംതാണല്ലോ എന്നെല്ലാം വിമർശിച്ച് അവരുടെ ആരാധകർ തന്നെ രംഗത്തെത്തി. തന്റെ പ്രൊമോഷൻ പരിപാടിയെക്കുറിച്ച് കാജോൾ ഒരക്ഷരം മിണ്ടിയിട്ടില്ല

നടി കാജോളിന്റെ ഏറ്റവും പുതിയ 'മടങ്ങിവരവ്' പോസ്റ്റ്. ഡിസ്‌നി പ്ലസ് ഹോട്ട്സ്റ്റാറിലെ ഷോയാണിത്. നടിയുടെ ശാരീരിക, മാനസിക ആരോഗ്യത്തെക്കുറിച്ച് വേവലാതിപ്പെട്ട ആരാധകർ പലരും അവരുടെ അമർഷം ഇതിനോടകം രേഖപ്പെടുത്തിക്കഴിഞ്ഞു