Malaika Arora Arjun Kapoor| മലൈക അറോറയും അർജുൻ കപൂറും വിവാഹിതരാകുന്നു; ഈ വർഷം അവസാനമെന്ന് റിപ്പോർട്ടുകൾ

ബോളിവുഡിലെ അറിയപ്പെടുന്ന കമിതാക്കളാണ് മലൈക അറോറയും (Malaika Arora)അർജുൻ കപൂറും (Arjun Kapoor). ഇരുവരും വാർത്തകളിൽ ഇടംപിടിക്കാത്ത ഒരു ദിവസം പോലും ഇല്ലെന്നു തന്നെ പറയാം.

ഇപ്പോഴിതാ ആരാധകർക്കും പാപ്പരാസികൾക്കും ആവശേകരമായ മറ്റൊരു വാർത്ത പുറത്തു വന്നിരിക്കുന്നു. താരങ്ങൾ വിവാഹിതരാകാൻ തീരുമാനിച്ചുവെന്നതാണ് വാർത്ത. ഈ വർഷം തന്നെ വിവാഹം ഉണ്ടാകുമെന്നും റിപ്പോർട്ടുകൾ പറയുന്നു.

2019 ലാണ് ഇരുവരും പ്രണയത്തിലാണെന്ന് പരസ്യപ്പെടുത്തിയത്. ഏറെ കാലത്തെ പ്രണയത്തിനൊടുവിലാണ് ഇരുവരും വിവാഹിതരാകാൻ തീരുമാനിച്ചിരിക്കുന്നത്. ബോളിവുഡ് ലൈഫ് ആണ് താരങ്ങളുടെ വിവാഹ വാർത്ത റിപ്പോർട്ട് ചെയ്തിരിക്കുന്നത്.

വാർത്ത അനുസരിച്ച് ഈ വർഷം നവംബറിലോ ഡിസംബറിലോ വിവാഹമുണ്ടാകും. മുംബൈയിൽ വെച്ചായിരിക്കും വിവാഹമെന്നും റിപ്പോർട്ടിൽ പറയുന്നു. ഇതിനിടയിൽ ഇരുവരും വേർപിരിഞ്ഞെന്ന തരത്തിലും വാർത്തകൾ പ്രചരിച്ചിരുന്നു.

എന്നാൽ അത്തരം ഗോസിപ്പുകളെയെല്ലാം തള്ളി രണ്ടുപേരും ഒന്നിച്ച് വീണ്ടും പൊതു ഇടങ്ങളിൽ പ്രത്യക്ഷപ്പെട്ടു തുടങ്ങി. അടുത്ത ബന്ധുക്കളും സുഹൃത്തുക്കളും മാത്രം പങ്കെടുക്കുന്ന സ്വകാര്യ ചടങ്ങിലായിരിക്കും വിവാഹം.

വിവാഹം രജിസ്റ്റർ ചെയ്തതിനു ശേഷം ഏറ്റവും അടുത്ത ബന്ധുക്കൾക്കും സുഹൃത്തുക്കൾക്കായി വിവാഹ വിരുന്ന് നടത്തുമെന്നും റിപ്പോർട്ടിൽ പറയുന്നു. മലൈകയുടെ മാതാപിതാക്കളും സഹോദരിയും കപൂർ കുടുംബവുമായിരിക്കും വിവാഹ വിരുന്നിൽ ഉണ്ടാകുക.

സൽമാൻ ഖാന്റെ സഹോദരൻ അർബാസ് ഖാനുമായുള്ള വിവാഹ ബന്ധം മലൈക നേരത്തേ വേർപെടുത്തിയിരുന്നു. ഈ ബന്ധത്തിൽ ഒരു മകനുമുണ്ട്. അർജുൻ കപൂറുമായുള്ള പ്രണയത്തിന്റെ പേരിൽ നിരവധി തവണ മലൈക സൈബർ ആക്രമണങ്ങൾക്ക് ഇരയായിട്ടുണ്ട്.

ഇരുവരും തമ്മിലുള്ള പ്രായവ്യത്യാസമായിരുന്നു ആക്രമണങ്ങൾക്ക് കാരണം. 48 വയസ്സാണ് മലൈകയ്ക്ക്. അർജുൻ കപൂറിന് 36 വയസ്സും. പ്രായവ്യത്യാസത്തിന്റെ പേരിൽ അനാവശ്യമായി ആക്രമിക്കപ്പെട്ട സമയത്ത് മലൈക തനിക്കൊപ്പം ഉറച്ചു നിന്നതിനെ കുറിച്ച് അർജുൻ കപൂർ നേരത്തേ പറഞ്ഞിരുന്നു.

എന്തായാലും ആലിയ ഭട്ട്-റൺബീർ കപൂർ വിവാഹത്തിനു ശേഷം വീണ്ടുമൊരു താരവിവാഹത്തിനുള്ള കാത്തിരിപ്പിലാണ് ബോളിവുഡ് ആരാധകർ.