Nayanthara | ഉയിരിനും ഉലഗത്തിനും പിറന്നാൾ ആഘോഷം കൊട്ടാരത്തിലോ? ചിത്രവുമായി വിഗ്നേഷ് ശിവൻ

നയൻ‌താരയുടെയും (Nayanthara)വിഗ്നേഷ് ശിവന്റെയും (Vignesh Shivan) ജീവിതത്തിൽ കുഞ്ഞിക്കാലുകളും കൈകാലുമിളക്കി, പല്ലില്ലാത്ത മോണ കാട്ടി ചിരിച്ച് ഉയിരും ഉലഗവും ഒരു വലിയ ലോകം പടുത്തുയർത്താൻ തുടങ്ങിയിട്ട് വർഷം ഒന്നായി. ഇക്കഴിഞ്ഞ ദിവസം കുഞ്ഞ് താരപുത്രന്മാർക്ക് ഒരു വയസ്സ് തികഞ്ഞു. ഗംഭീര ആഘോഷമാണ് വിക്കിയും നയൻസും മക്കൾക്കായി ഒരുക്കിയത്. ആ ആഘോഷ ചിത്രമാണിത്

മക്കളുടെ പ്രിയപ്പെട്ട കാർട്ടൂൺ കഥാപാത്രങ്ങളും, അവരുടെ ഇഷ്‌ട വിനോദങ്ങളും എന്തെല്ലാം എന്ന് മനസിലാകും ആ പിറന്നാൾ കേക്കിലും തീമിലും ഒരു നോട്ടം പായിച്ചാൽ. നാട്ടിലല്ല, വിദേശത്തു വച്ചാണ് ഉയിരും ഉലഗവും ഒന്നാം പിറന്നാൾ ആഘോഷമാക്കിയത് (തുടർന്ന് വായിക്കുക)

സ്വപ്നം പോലൊരു പിറന്നാൾ ആഘോഷം എന്നാണ് വിക്കി ചിത്രത്തിനൊപ്പം ക്യാപ്‌ഷനിൽ കുറിച്ചത്. മലേഷ്യയുടെ തലസ്ഥാനമായ ക്വലാലംപൂരിൽ വച്ചാണ് ജന്മദിനാഘോഷം നടത്തിയത്. വേണ്ടപ്പെട്ട ചിലർക്കൊപ്പമാണ് ജന്മദിനാഘോഷം കെങ്കേമമായത്

ദൈവിക് എൻ. ശിവൻ, രുദ്രോനീൽ എൻ. ശിവൻ എന്നാണ് ഇരട്ടകളുടെ പേരുകൾ. രണ്ടുപേരെയും വാടക ഗർഭധാരണത്തിലൂടെയാണ് നയൻ‌താരയും വിഗ്നേഷ് ശിവനും ജീവിതത്തിലേക്ക് സ്വീകരിച്ചത്. വിവാഹം കഴിഞ്ഞ് അധികനാൾ കഴിയും മുൻപായിരുന്നു മക്കളുടെ ജനനം

പിറന്നാൾ ആഘോഷത്തിന്റെ ചിത്രത്തിനൊപ്പം നൽകിയ ക്യാപ്‌ഷനാണ് മറ്റൊരു ശ്രദ്ധാകേന്ദ്രം. ആഘോഷം സംഘടിപ്പിച്ച സെന്റ്. റെജിസ് ക്വലാലംപൂർ കൊട്ടാരം എന്നാണ് വിക്കി ക്യാപ്‌ഷനിൽ വിശേഷിപ്പിച്ചിരിക്കുന്നത്

അതോ ഇനി പ്ലെയ്സ് എന്ന് ഇംഗ്ലീഷിൽ കുറിച്ചപ്പോൾ അത് പാലസ് എന്ന് മാറിപ്പോയതാകാനും സാധ്യതയുണ്ട്. സ്‌പെഷൽ ദിവസത്തിന് ഇത് ഏറ്റവും ചേരുന്ന ഇടമാണ് എന്ന് വിക്കി കുറിച്ചിട്ടുണ്ട്. മാരിയറ്റ് ഗ്രൂപ്പിന് കീഴിൽ പ്രവർത്തിക്കുന്ന ലക്ഷുറി ഹോട്ടലാണിത് എന്നാണ് വിവരം

പിറന്നാളിനാണ് ഉയിരിന്റെയും ഉലഗത്തിന്റെയും മുഖം പൂർണമായി സോഷ്യൽ മീഡിയയിൽ എത്തിച്ചേർന്നത്. അതിനു മുൻപ് നയൻ‌താര ആദ്യമായി ചെയ്ത ഇൻസ്റ്റഗ്രാം റീലിലാണ് അവരുടെ കൂളിംഗ് ഗ്ലാസ് ധരിച്ചുകൊണ്ടുള്ള മുഖം എല്ലാപേരും കണ്ടത്