Tamannaah Bhatia |അത് കോടികൾ വിലയുള്ള വജ്രമോതിരമല്ല; രാം ചരണിന്റെ ഭാര്യ നൽകിയ സമ്മാനത്തെ കുറിച്ച് തമന്ന

തമന്ന ഭാട്ടിയയ്ക്ക് തെന്നിന്ത്യൻ സൂപ്പർതാരം രാം ചരണിന്റെ ഭാര്യ ഉപാസന കോടികൾ വിലയുള്ള വജ്രമോതിരം സമ്മാനമായി നൽകിയോ? വലിയൊരു വജ്രമോതിരം വിരലിലണിഞ്ഞുള്ള തമന്നയുടെ ഫോട്ടോയ്ക്കൊപ്പം ഇന്റർനെറ്റിൽ വൈറലായ വാർത്തയായിരുന്നു ഇത്.

2019 ൽ തമന്ന അഭിനയിച്ച സെയ് റാ നരസിംഹ റെഡ്ഡി എന്ന ചിത്രത്തിൽ തമന്ന അഭിനയിച്ചിരുന്നു. ചിരഞ്ജീവി പ്രധാന വേഷത്തിൽ അഭിനയിച്ച ചിത്രത്തിന്റെ നിർമാതാക്കൾ രാംചരണും ഉപാസനയുമായിരുന്നു.

ചിത്രത്തിന്റെ റിലീസിനു ശേഷമാണ് ഉപാസന തമന്നയ്ക്ക് വിലപിടിപ്പുള്ള സമ്മാനം നൽകിയത്. ഇതിന്റെ ചിത്രം അന്ന് ഉപാസനയും തമന്നയും സോഷ്യൽമീഡിയയിൽ പങ്കുവെക്കുകയും ചെയ്തിരുന്നു.

ഉപാസന നൽകിയത് ലോകത്തിലെ അഞ്ചാമത്തെ വലിയ വജ്രമാണെന്നും രണ്ട് കോടിക്ക് മുകളിലാണ് ഇതിന്റെ വില എന്നുമായിരുന്നു ഇപ്പോൾ സോഷ്യൽമീഡിയയിൽ പ്രചരിച്ചത്. ഇതിനൊരു വ്യക്തത വരുത്തിയിരിക്കുകയാണ് തമന്നയിപ്പോൾ.

യഥാർത്ഥത്തിൽ ലോകത്തിലെ വലിയ വജ്രങ്ങളിൽ അ‍ഞ്ചാമത്തേത് എന്ന് പറയപ്പെടുന്ന ഈ സമ്മാനം വജ്രമോതിരം പോലുമല്ലെന്നാണ് തമന്ന തന്റെ ഇൻസ്റ്റഗ്രാം പോസ്റ്റിലൂടെ രസകരമായി പറഞ്ഞിരിക്കുന്നത്. മാത്രമല്ല, മോതിരം പോയിട്ട്, അതൊരു വജ്രം പോലുമല്ലെന്നും തമന്ന വ്യക്തമാക്കുന്നു.

വജ്രത്തിന്റെ ആകൃതിയിലുള്ള ഒരു ബോട്ടിൽ ഓപ്പണർ ആണ് ഉപാസന തമന്നയ്ക്ക് സമ്മാനിച്ചത്. ഇത് വിരലിലണിഞ്ഞുള്ള ചിത്രമാണ് തമന്ന സോഷ്യൽമീഡിയയിൽ പങ്കുവെച്ചത്. ഇതുകണ്ട് വജ്രമോതിരമെന്ന് തെറ്റിദ്ധരിക്കപ്പെടുകയായിരുന്നുവെന്നതാണ് വാസ്തവം.