ചെന്നൈയിലെ പ്രമുഖ ഡോക്ടർ കോവിഡ് ബാധിച്ച് മരിച്ചു; മൃതദേഹവുമായെത്തിയ ആംബുലന്‍സിന് കല്ലെറിഞ്ഞ് ജനങ്ങൾ

ചെന്നൈയിൽ കോവിഡ് ബാധിച്ച് മരിച്ച പ്രമുഖ ഡോക്ടറുടെ മൃതദേഹവുമായെത്തിയ ആംബുലൻസിന് നേരെ കല്ലേറ്

ന്യൂഹോപ്പ് പ്രൈവറ്റ് ഹോസ്പിറ്റൽ സ്ഥാപകനും ആരോഗ്യ സംരഭകനുമായ ഡോ. സൈമൺ ഹെർക്കുലിസിന്റെ മൃതദേഹവുമായെത്തിയ ആംബൂലന്‍സിന് നേരെയാണ് ആക്രമണം ഉണ്ടായത്.

ചെന്നൈ അപ്പോളോ ആശുപത്രിയിൽ ചികിത്സയിലിരുന്ന ഡോക്ടർ ഇക്കഴിഞ്ഞ ദിവസമാണ് മരിച്ചത്.

സംസ്കാര ചടങ്ങുകൾക്കായി മൃതദേഹവുമായെത്തിയ ആംബുലൻസിന് നേർക്ക് ശ്മശാനത്തിന് സമീപം കാത്തു നിന്ന പ്രദേശവാസികൾ കല്ലെറിയുകയായിരുന്നു

ആംബുലൻസ് ഡ്രൈവർക്കും ഒപ്പമുണ്ടായിരുന്ന ശുചീകരണ തൊഴിലാളിക്കും ആക്രമണത്തിൽ പരിക്കേറ്റു

കോവിഡ് സംശയിക്കുന്ന ആളെ അവിടെ അടക്കുന്നത് വഴി വൈറസ് വ്യാപിക്കുമെന്ന ഭയത്താൽ പ്രദേശവാസികൾ അവിടെ പ്രതിഷേധവുമായി എത്തുകയായിരുന്നു.

അധികൃതരുടെ അനുമതി വാങ്ങിയാണ് സംസ്കാര ചടങ്ങുകൾക്ക് എത്തിയതെന്നാണ് ഡോക്ടറുടെ ബന്ധുക്കൾ പറയുന്നത്

കോവിഡ് രോഗിയെ പരിചരിച്ചതിലൂടെ രോഗബാധിതനായി മരിച്ച ഒരു ഡോക്ടർക്ക് മാന്യമായ സംസ്കാര ചടങ്ങുകൾക്ക് പോലും അവകാശമില്ലേയെന്നായിരുന്നു ഒപ്പമുണ്ടായിരുന്ന ഒരു ഡോക്ടറുടെ പ്രതികരണം.

ഇതാദ്യമായല്ല ചെന്നൈയിൽ സംസ്കാര ചടങ്ങിനെത്തിയ ആരോഗ്യ പ്രവർത്തകര്‍ക്ക് നേരെ ആക്രമണം ഉണ്ടാകുന്നത്.

നേരത്തെ വാനഗരം മേഖലയിൽ ദഹിപ്പിക്കാനായെത്തിച്ച ഡോക്ടറുടെ മൃതദേഹം പ്രദേശവാസികളുടെ പ്രതിഷേധത്തെ തുടർന്ന് തിരികെ കൊണ്ടു പോയിരുന്നു.