'പച്ചക്കറിക്കൊപ്പം കഞ്ചാവ്'; 300 കിലോ കഞ്ചാവുമായി മലപ്പുറത്ത് അഞ്ചു പേർ പിടിയിൽ

മലപ്പുറത്ത് വൻ കഞ്ചാവ് വേട്ട. 300 കിലോ കഞ്ചാവുമായി 5 പേരെ പൊലീസ് പിടികൂടി. സംഘത്തിലെ 3 പേര് ഓടി രക്ഷപ്പെട്ടു.

ആന്ധ്രയിലെ വിശാഖപട്ടണത്ത് നിന്ന് ആണ് കഞ്ചാവ് കൊണ്ട് വന്നത്. ഇന്നോവ കാറിലും, മിനി ലോറിയിലുമായാണ് കഞ്ചാവ് കടത്തിയത്.

അരീക്കോട് സ്വദേശി ഷാഹുൽ ഹമീദ്, മഞ്ചേരി സ്വദേശി അക്ബർ അലി, കോട്ടക്കല് ഇന്ത്യനൂർ സ്വദേശി അബ്ദുറഹിമാൻ , ഇരുമ്പുഴി സ്വദേശി നജീബ് , കരിപ്പൂർ സ്വദേശി മുഹമ്മദ് ഇർഷാദ് എന്നിവരെ ആണ് അറസ്റ്റ് ചെയ്തത്.

സംഭവത്തെ പറ്റി പോലീസ് നൽകുന്ന വിശദീകരണം ഇങ്ങനെ. നജീബും അബ്ദുറഹ്മാനും ആണ് മുഖ്യ ആസൂത്രകർ. ഇവർ ഓ.എൽ.എക്സ് വഴി വാഹനങ്ങൾ വാടകക്ക് എടുത്ത് ആണ് കഞ്ചാവ് കൊണ്ടുവരാൻ നിശ്ചയിച്ചത്.

ഈ മാസം 17 ന് ഇവർ മഞ്ചേരി സ്വദേശിയുടെ മിനി ട്രക്കും ഒരു ഇന്നോവയും വാടകക്ക് എടുത്ത് ഇവർ ആന്ധ്രയിലേക്ക് പോകുക ആയിരുന്നു. അവിടെ നിന്നും ഉള്ളി ചാക്കുകൾക്ക്‌ ഒപ്പം ആണ് കഞ്ചാവ് കടത്തിയത്.

8 ചാക്കുകളിൽ ആയി 318 കിലോ കഞ്ചാവ് ആണ് കൊണ്ടുവന്നത്. ഇതിന് വിപണി വില 25 ലക്ഷം വരും. മിനിട്രക്ക് വാടകക്ക് നൽകിയ ആൾ , ലോറി മറ്റൊരു സംസ്ഥാനത്ത് ആണെന്ന് അറിഞ്ഞതിനെ തുടർന്ന് ജിപിഎസ് വഴി ട്രാക്ക് ചെയ്യുക ആയിരുന്നു.

തുടർന്ന് ഇദ്ദേഹം പോലീസിന്റെ സഹായം തേടി..അങ്ങനെ ആണ് ചാപ്പ പ്പടിയിൽ വച്ച് വാഹനം പോലീസ് തടഞ്ഞതും കഞ്ചാവ് കണ്ടെത്തിയതും.

മിനി ട്രക്കിൽ ഉള്ളി ചാക്കുകൾക്ക് അടിയിൽ ആണ് 7 ചാക്ക് കഞ്ചാവ് ഉണ്ടായിരുന്നത്. ഒരു ചാക്ക് ഇന്നോവയിലും.

ഇവരുടെ കൂടെ ഉണ്ടായിരുന്ന 3 പേര് രക്ഷപ്പെട്ടു. ഇവർക്ക് വേണ്ടി അന്വേഷണം ഊർജ്ജിതം ആണ്.

മലപ്പുറം സി ഐ പ്രേജിത്തിന്റെ നേതൃത്വ ത്തിൽ എസ് ഐ സംഗീത് പുനത്തിലും സംഘവുമാണ് പ്രതികളെ അറസ്റ്റ് ചെയ്തത്. ഇവരെ മഞ്ചേരി കോടതിയിൽ ഹാജരാക്കി