പ്രായപൂർത്തിയാകാത്ത പെൺകുട്ടികളെ പീഡിപ്പിച്ചു; 11കാരൻ ഉൾപ്പെടെ ആറ് പേര്‍ അറസ്റ്റിൽ

കൊല്‍ക്കത്ത: പ്രായപൂർത്തിയാകാത്ത രണ്ട് പെണ്‍കുട്ടികൾ പീഡിപ്പിക്കപ്പെട്ട സംഭവത്തിൽ പതിനൊന്നുകാരൻ ഉൾപ്പെടെ ആറു കൗമാരക്കാർ അറസ്റ്റിൽ. പശ്ചിമ ബംഗാളിലെ ബിർഭം ജില്ലയില്‍ ആദിവാസി വിഭാഗത്തിൽപ്പെട്ട പെണ്‍കുട്ടികളാണ് പീഡനത്തിനിരയായത്

ഝാർഖണ്ഡ് അതിർത്തി മേഖലയോട് ചേർന്ന് റാംപുർഹത് പൊലീസ് സ്റ്റേഷൻ പരിധിയിൽ ഇക്കഴിഞ്ഞ ശനിയാഴ്ചയാണ് സംഭവം. പ്രദേശത്ത് ഒരു പ്രാദേശിക ഉത്സവം നടന്നുവരികയാണ്.

ഇതിനിടെ ശനിയാഴ്ച വൈകിട്ടോടെ കടയിൽ പോയി മടങ്ങിവരികയായിരുന്ന പെൺകുട്ടികളെ ആറംഗ സംഘം ബലം പ്രയോഗിച്ച് സമീപത്തെ വനപ്രദേശത്ത് കൊണ്ടുപോയി പീഡിപ്പിക്കുകയായിരുന്നു എന്നാണ് പൊലീസ് പറയുന്നത്.

തങ്ങൾക്കു നേരെയുണ്ടായ അതിക്രമത്തെക്കുറിച്ച് പെൺകുട്ടികൾ വീട്ടിൽ അറിയിച്ചിരുന്നില്ല. എന്നാൽ ശാരീരിക അസ്വസ്ഥതതകളെ തുടർന്ന് ഇവരെ ആശുപത്രിയിലെത്തിച്ചപ്പോൾ സംശയം തോന്നിയ ഡോക്ടർമാരാണ് പൊലീസിനെ വിവരം അറിയിച്ചത്.

പെണ്‍കുട്ടികളിൽ നിന്ന് വിവരം ശേഖരിച്ച റാംപുർഹത് സബ് ഡിവിഷണൽ പൊലീസ് ഓഫീസർ ഷയാൻ അഹമ്മദിന്‍റെ നേതൃത്വത്തിലുള്ള പൊലീസ് സംഘം ഗ്രാമത്തിലെത്തി പ്രതികളെ അറസ്റ്റ് ചെയ്യുകയായിരുന്നു.

പ്രതികളിലൊരാൾക്ക് വെറും പതിനൊന്ന് വയസ് മാത്രമാണ് പ്രായമെന്ന് പൊലീസ് തന്നെയാണ് അറിയിച്ചത്. ജുവനൈൽ കോടതിയിൽ ഹാജരാക്കിയ പ്രതികളെ ജനുവരി 26 വരെ റിമാൻഡ് ചെയ്തിരിക്കുകയാണ്.

ഇരയാക്കപ്പെട്ട പെൺകുട്ടികളെ വിദഗ്ധ പരിശോധനയ്ക്കായി ആശുപത്രിയിൽ പ്രവേശിപ്പിച്ചിട്ടുണ്ട്.