ഭർതൃ വീട്ടുകാർ മർദിച്ചു, വസ്ത്രങ്ങൾ വലിച്ചു കീറി; യുവതി നഗ്നയായെത്തി പൊലീസിൽ പരാതി നൽകി

ചുരു: ഭർതൃവീട്ടുകാർ മർദിക്കുകയും വസ്ത്രങ്ങൾ വലിച്ച് കീറുകയും ചെയ്തതിനെ തുടർന്ന് യുവതി നഗ്നയായെത്തി പൊലീസിൽ പരാതി നൽകി.

രാജസ്ഥാനിലെ ചുരുവിലാണ് സംഭവം. യുവതി തുടർച്ചയായി ഭര‍തൃ വീട്ടുകാരുടെ പീഡനത്തിന് ഇരയായിക്കൊണ്ടിരിക്കുകയായിരുന്നു. ഭർത്താവിന്റെ അസാന്നിധ്യത്തിലായിരുന്നു പീഡനം.

ഞായറാഴ്ചയും ഭർത്താവില്ലാതിരുന്നപ്പോൾ അമ്മായിയും നാത്തൂനും യുവതിയുമായി വാക്കേറ്റം നടത്തിയിരുന്നു. ഇതിനു പുറമെ അവർ യുവതിയുടെ വസ്ത്രങ്ങൾ വലിച്ച് കീറുകയും ചെയ്തു.

സംഭവം ഉടൻ തന്നെ പൊലീസിൽ അറിയിക്കാനാണ് യുവതി സ്റ്റേഷനിലെത്തിയത്. അതേസമയം ആക്രമണത്തിനിരയായ യുവതിയെ സഹായിക്കുന്നതിന് പകരം അവരുടെ ചിത്രങ്ങൾ മൊബൈലിൽ പകർത്താനാണ് ആളുകൾ തിടുക്കം കാട്ടിയതെന്ന് പൊലീസ് പറ‍ഞ്ഞു.

ഭർത്താവിന്റെ വീട്ടുകാർ വസ്ത്രങ്ങൾ വലിച്ച് കീറിയതിനെ തുടർന്ന് നഗ്നയായി എത്തി യുവതി പരാതി നൽകിയതായി പൊലീസ് പറഞ്ഞു.

യുവതി ഇപ്പോൾ പൊലീസ് സംരക്ഷണത്തിലാണ്. സംഭവത്തിൽ എഫ്ഐആർ രജിസ്റ്റർ ചെയ്തിട്ടുണ്ട്. അതേസമയം യുവതിയുടെ ചിത്രങ്ങൾ പകർത്തിയവർക്കെതിരെയും കേസെടുക്കാൻ തീരുമാനിച്ചതായി പൊലീസ് വ്യക്തമാക്കിയതായി എഎൻഐ റിപ്പോർട്ട് ചെയ്യുന്നു.