Mammootty | 'ഓരോ വര്‍ഷവും നിങ്ങളുടെ സ്നേഹം കൂടി വരുന്നു'; ജന്മദിനാശംസകള്‍ക്ക് നന്ദി പറഞ്ഞ് മമ്മൂട്ടി

72-ാം പിറന്നാളിന്‍റെ നിറവിലാണ് മലയാളത്തിന്‍റെ മഹാനടന്‍ മമ്മൂട്ടി. അഭിനയത്തില്‍ ഇന്നും മധുര പതിനേഴിന്‍റെ യുവത്വം തുളുമ്പുന്ന ഈ പ്രതിഭാശാലിക്ക് കലാലോകം ഒന്നടങ്കം ആശംസകളുമായെത്തി. അതില്‍ മുഖ്യമന്ത്രി പിണറായി വിജയന്‍ തൊട്ട് ബോളിവുഡ് താരങ്ങള്‍ വരെയുണ്ട്.

ഇപ്പോഴിതാ തനിക്ക് പിറന്നാള്‍ ആശംസകള്‍ അറിയിച്ച എല്ലാവര്‍ക്കും സോഷ്യല്‍ മീഡിയയിലൂടെ നന്ദി പറഞ്ഞിരിക്കുകയാണ് താരം. ഒരു ഗ്ലാസ് കട്ടന്‍ ചായയുമായി കിടിലന്‍ ഒരു ഷര്‍ട്ടും ധരിച്ച് സോഫയിലിരിക്കുന്ന ചിത്രത്തൊടൊപ്പമാണ് മമ്മൂട്ടി നന്ദി പറഞ്ഞിരിക്കുന്നത്.

എന്‍റെ ജന്മദിനം ഇത്രയധികം സ്പെഷ്യലാക്കി മാറ്റിയതിന് എല്ലാവര്‍ക്കും ഒരുപാട് നന്ദി. നിങ്ങള്‍ അയച്ച മെസേജുകള്‍ക്കും കാര്‍ഡുകള്‍ക്കും ഫോണ്‍ കോളുകള്‍ക്കും വീഡിയോകള്‍ക്കും വീട്ടില്‍ നേരിട്ടെത്തിയവര്‍ക്കും എല്ലാത്തിനും നന്ദി. ഓരോ വർഷവും നിങ്ങളുടെ സ്നേഹം വളരുന്നു. എല്ലാവിധത്തിലും ഞാന്‍ വിനയാന്വിതനായി.- മമ്മൂട്ടി കുറിച്ചു.

വ്യക്തി ജീവിതത്തില്‍ പല നഷ്ടങ്ങള്‍ ഉണ്ടായിട്ടും നടനെന്ന നിലയില്‍ ഒരു മികച്ച വര്‍ഷമാണ് മമ്മൂട്ടി പൂര്‍ത്തിയാക്കിയത്. ഏറെ നാളുകള്‍ക്ക് ശേഷം മികച്ച നടനുള്ള സംസ്ഥാന പുരസ്കാരം ഇത്തവണ മമ്മൂട്ടിയെ തേടിയെത്തിയിരുന്നു.

ചിത്രീകരണം പൂര്‍ത്തിയായി റിലീസിനൊരുങ്ങുന്ന കണ്ണൂര്‍ സ്ക്വാഡ്, കാതല്‍, ബ്രസൂക്ക, ഭ്രമയുഗം തുടങ്ങി ഗംഭീര പ്രൊജക്ടുകളാണ് മമ്മൂട്ടിയുടേതായി വരും നാളുകളില്‍ പ്രേക്ഷകരിലേക്ക് എത്തുന്നത്.

മമ്മൂട്ടിയുടെ ജന്മദിനത്തോട് അനുബന്ധിച്ച് മമ്മൂട്ടി ഫാൻസ്‌ ആൻഡ് വെൽഫെയർ അസോസിയേഷൻ ഇന്റർനാഷണൽ സംഘടിപ്പിക്കുന്ന കാല്‍ ലക്ഷം പേരുടെ രക്തദാന യജ്ഞം ശ്രദ്ധിക്കപ്പെട്ടിരുന്നു.

പുതിയ ചിത്രങ്ങളായ കണ്ണൂര്‍ സ്ക്വാഡിന്‍റെ ട്രെയിലറും ഭ്രമയുഗത്തിന്‍റെ ഫസ്റ്റ് ലുക്ക് പോസ്റ്ററും പിറന്നാളിനോട് അനുബന്ധിച്ച് പുറത്തുവന്നിരുന്നു.