ആഗോള ബോക്സ് ഓഫീസില്‍ മൂന്നാഴ്ച കൊണ്ട് 'കണ്ണൂര്‍ സ്ക്വാഡ്' നേടിയ കളക്ഷന്‍ അവിശ്വസനീയം; യഥാര്‍ഥ കണക്ക് പുറത്തുവിട്ട് മമ്മൂട്ടി കമ്പനി

മമ്മൂട്ടിയെ കേന്ദ്രകഥാപാത്രമാക്കി റോബി വർഗീസ് രാജ് ഒരുക്കിയ കണ്ണൂർ സ്ക്വാഡ് തിയറ്ററുകളിൽ എത്തിയിട്ട് മൂന്നാഴ്ച് പിന്നിടാന്‍ ഒരുങ്ങുമ്പോള്‍ ആഗോള ബോക്സ് ഓഫീസില്‍ നിന്ന് ചിത്രം എത്ര നേടി എന്ന് അറിയാനുള്ള ആകാംഷയിലാണ് ആരാധകർ. ഇതിനു മുൻപ് കളക്ഷൻ റിപ്പോർട്ട് സംബന്ധിച്ച് റിപ്പോര്‍ട്ടുകള്‍ എക്സില്‍ പ്രചരിച്ചിരുന്നു.

എന്നാൽ ഇപ്പോഴിതാ നിര്‍മ്മാതാക്കളായ മമ്മൂട്ടി കമ്പനി കണക്കുകള്‍ ഔദ്യോഗികമായി പുറത്തുവിട്ടിരിക്കുകയാണ്.ചിത്രം മൂന്ന് വാരം പിന്നിടാനൊരുങ്ങുമ്പോള്‍ ആഗോള ബോക്സ് ഓഫീസില്‍ നിന്ന് ഇതുവരെ നേടിയത് 75 കോടി ആണെന്നാണ് നിര്‍മ്മാതാക്കള്‍ അറിയിക്കുന്നത്.

സെപ്റ്റംബര്‍ 28 നായിരുന്നു ചിത്രം റിലീസ് ചെയ്തത്. തുടക്കത്തിൽ കുറച്ച് തിയറ്ററുകളിൽ മാത്രം റിലീസ് ചെയ്ത കണ്ണൂർ സ്ക്വാഡ് പിന്നീട് തിയറ്ററുകളുടെയും സ്ക്രീനുകളുടെയും ഷോയുടെയുമൊക്കെ എണ്ണം കൂട്ടുകയായിരുന്നു. പിന്നീട് ഓരോ ദിവസവും തീയറ്റർ നിറഞ്ഞ് നിൽക്കുന്നതായിരുന്നു കണ്ടത്.

റിലീസ് ദിവസം തന്നെ 2.40 കോടി രൂപ കളക്ഷൻ നേടി കണ്ണൂർ സ്ക്വാഡ് വരവറിയിച്ചിരുന്നു. ആദ്യാവസാനം മമ്മൂട്ടി നിറഞ്ഞു നിൽക്കുന്ന ഒരു ത്രില്ലർ ചിത്രം തന്നെയാണ് കണ്ണൂർ സ്ക്വാഡ്.

ഇതോടെ എക്കാലത്തെയും മലയാള സിനിമകളുടെ വിജയ പട്ടികയില്‍ ഏഴാം സ്ഥാനം കൈവരിക്കാൻ ചിത്രത്തിനു സാധിച്ചു. ചിത്രത്തിന്റെ വിജയം അവിശ്വസനീയമെന്നാണ് ചിത്രത്തിന്റെ അണിയറ പ്രവർത്തകർ പറയുന്നത്.

ചിത്രത്തിൽ പ്രധാനവേഷം ചെയ്ത റോണി ഡേവിഡ് രാജിന്‍റെ സഹോദരൻ റോബി വർഗീസ് രാജ് സംവിധായകനാകുന്ന ആദ്യ ചിത്രമാണിത്. മമ്മൂട്ടി കമ്പനിയാണ് കണ്ണൂർ സ്ക്വാഡ് നിർമിച്ചിരിക്കുന്നത്. റോഷാക്ക്, നൻപകൽ നേരത്ത് മയക്കം എന്നീ ചിത്രങ്ങൾക്കുശേഷം മമ്മൂട്ടി കമ്പനി നിർമിക്കുന്ന ചിത്രം കൂടിയാണിത്.