'നാലാം നിലയിൽ നിന്ന് തള്ളിയിടുമെന്ന് പറഞ്ഞ് അഭിനേതാക്കളെ ഭീഷണിപ്പെടുത്തിയിട്ടുണ്ട്'; മണിരത്നം

തെന്നിന്ത്യൻ സിനിമാ മേഖലയിൽ മികച്ച രീതിയിൽ സംവിധാനം ചെയ്ത് നിരവധി ആരാധകരെ സ്വന്തമാക്കിയ വ്യക്തിയാണ് മണിരത്നം. അഭിനേതാക്കളോട് സംസാരിക്കുന്ന രീതിയെ കുറിച്ചും മികച്ച രീതിയിൽ സിനിമ ലഭിക്കുന്നതിനായി എന്തൊക്കെയാണ് ചെയ്യുന്നതെന്നും വിശദീകരിച്ചിരിക്കുകയാണ് മണിരത്നം. ത​ഗ്‌ലൈഫിന്റെ പ്രമോഷനുമായി ബന്ധപ്പെട്ട അഭിമുഖത്തിലാണ് മണിരത്നം തുറന്നു പറച്ചിൽ നടത്തിയത്.

താന്‍ ആഗ്രഹിച്ച പ്രകടനം ലഭിക്കുന്നതിനായി കെട്ടിടത്തില്‍നിന്ന് താഴേക്കെറിയുമെന്ന് അഭിനേതാക്കളെ ഭീഷണിപ്പെടുത്തിയിട്ടുണ്ടെന്നാണ് സംവിധായകന്‍ മണിരത്‌നം പറയുന്നത്. ആ​ഗ്ര​ഹിച്ചത് ലഭിക്കുന്നതിനായി അഭിനേതാക്കൾക്ക് പൂർണസ്വാതന്ത്ര്യം നൽകുന്ന സംവിധായകനാണോ എന്ന ചോദ്യത്തോട് പ്രതികരിക്കുകയായിരുന്നു മണിരത്നം.

എല്ലാവരോടും അങ്ങനെയല്ലെന്നാണ് സംവിധായകൻ ആദ്യം പറഞ്ഞത്. ചില ആളുകളെ നിങ്ങള്‍ക്ക് ഭീഷണിപ്പെടുത്തേണ്ടിവരുന്ന സാഹചര്യങ്ങളുണ്ട്. ഞാന്‍ ചോദിക്കുന്നത് ചെയ്തില്ലെങ്കില്‍ നാലാം നിലയില്‍നിന്ന് താഴേക്കിടുമെന്ന് ഭീഷണിപ്പെടുത്തിയിട്ടുണ്ടെന്നാണ് മണിരത്നം പറഞ്ഞത്.

അഞ്ചുവയസ്സുള്ള കുട്ടികള്‍ക്ക് അസമയത്ത് ജോലി ചെയ്യാമെങ്കില്‍ നിങ്ങള്‍ക്ക് എന്തുകൊണ്ട് പറ്റില്ല എന്ന് ചില അഭിനേതാക്കളോട് ചോദിക്കേണ്ടിവരും. എല്ലാത്തിനും ഒരൊറ്റ പരിഹാരമില്ലെന്നായിരുന്നു മണിരത്‌നത്തിന്റെ വാക്കുകള്‍.

എന്നാൽ, നടീനടന്മാര്‍ക്ക് അഭിനയിച്ചുകാണിച്ചുകൊടുക്കുന്നത് സംവിധായകരുടെ ജോലിയല്ലെന്നും മണിരത്‌നം വ്യക്തമാക്കി. നല്ലൊരു അഭിനേതാവിന് അത് അപമാനമായിട്ടാകും തോന്നുന്നത്. സംവിധായകനെ പൂര്‍ണ്ണമായി വിശ്വസിക്കുന്ന അഭിനേതാവാണ് കമല്‍ ഹാസനെന്നും മണിരത്‌നം വ്യക്തമാക്കി.