Pushpa 2 | തലൈവാ, നീങ്കളാ! അല്ലുവിന്റെ പുഷ്പയിൽ ഈ തമിഴ് സൂപ്പർസ്റ്റാർ ഉണ്ടാകുമോ?

അല്ലു അർജുൻ (Allu Arjun) നായകനായ, രശ്‌മിക മന്ദാന (Rashmika Mandanna) നായികയായ 'പുഷ്പ: ദി റൈസ്' (Pushpa: The Rise) തെന്നിന്ത്യയിൽ മാത്രമല്ല, രാജ്യമെമ്പാടും തരംഗം തീർത്ത ചിത്രമാണ്. പ്രേക്ഷകരും നിരൂപകരും ഒരുപോലെ അഭിനന്ദനം കൊണ്ട് മൂടിയ സിനിമ ബോക്സ് ഓഫീസിൽ വമ്പൻ കൊയ്‌ത്ത്‌ കഴിഞ്ഞ ശേഷമേ ഓട്ടം നിർത്തിയുള്ളൂ. ചിത്രത്തിന്റെ രണ്ടാം ഭാഗമായ 'പുഷ്പ: ദി റൂൾ' (Pushpa: The Rule) അണിയറയിൽ പുരോഗമിക്കുകയാണ്

പുഷ്പ രണ്ടാം ഭാഗം കൊണ്ടും അവസാനിക്കില്ലെന്നും, മൂന്നാം ഭാഗവും അണിയറയിൽ ഒരുങ്ങും എന്നും സ്ഥിരീകരിക്കാത്ത റിപോർട്ടുകൾ സൂചിപ്പിക്കുന്നു. കൂടാതെ മറ്റൊരു വിശേഷം കൂടി പുറത്തുവന്നു. പ്രേക്ഷകർക്ക് ഏറെ ഇഷ്‌ടപ്പെട്ട തമിഴ് സൂപ്പർതാരം ഈ സിനിമയുടെ ഭാഗമാകും എന്നാണ് റിപ്പോർട്ട് (തുടർന്ന് വായിക്കുക)

'പുഷ്പ: ദി റൂൾ' ആക്ഷൻ രംഗങ്ങൾ കൊണ്ട് നിറഞ്ഞ ചിത്രമായിരിക്കും എന്ന് റിപ്പോർട്ടുകളുണ്ട്. തമിഴ് നടന്റെത് അതിഥിവേഷമാകുമെന്നും, വളരെ കുറച്ചു നേരത്തേക്ക് മാത്രമേ അതുണ്ടാകൂ എന്നും ഇനിയും സ്ഥിരീകരണം ലഭിക്കാത്ത റിപ്പോർട്ടിൽ പരാമർശിക്കുന്നു

നടൻ സൂര്യ ആയിരിക്കും ഈ സിനിമയുടെ ഭാഗമാവുകയത്രേ. മൂന്നാം ഭാഗം ഇറങ്ങുകയാണെങ്കിൽ, അത് 2025ലാവും ഇറങ്ങുക. സുകുമാർ തിരക്കഥയെഴുതി സംവിധാനം ചെയ്യുന്ന ചിത്രമാണ് പുഷ്പ 2. ഈ ചിത്രത്തിന്റെ ഫസ്റ്റ് ലുക്ക് പോസ്റ്ററും കുറച്ച് മാസങ്ങൾക്ക് മുമ്പ് റിലീസ് ചെയ്തിരുന്നു. അല്ലു അർജുൻ സാരി ധരിച്ച് മുഖത്ത് നീലയും ചുവപ്പും മേക്കപ്പ് ഇട്ടു കാണാമായിരുന്നു. വളകൾ, ആഭരണങ്ങൾ, മൂക്കുത്തികൾ, ജുമുക്കകൾ എന്നിവ ആഭരണമായിട്ടുണ്ട്

അല്ലു അർജുനും രശ്മിക മന്ദാനയും കൂടാതെ വിജയ് സേതുപതി, അനസൂയ ഭരദ്വാജ്, ധനഞ്ജയ് എന്നിവരും ചിത്രത്തിൽ അഭിനയിക്കും. 10 മിനിറ്റ് ദൈർഘ്യമുള്ള വേഷത്തിനായി സായ് പല്ലവി ഉണ്ടാകുമെന്ന് റിപ്പോർട്ടുകളുണ്ടായിരുന്നു. ഇത് നിർമ്മാതാക്കൾ നിഷേധിച്ചു

പുഷ്പ 2 വിന്റെ അവസാന റിലീസ് തീയതി ഇതുവരെ പ്രഖ്യാപിച്ചിട്ടില്ല. 2024 വേനൽക്കാലത്ത് ചിത്രം റിലീസ് ചെയ്യുമെന്ന് 'പിങ്ക് വില്ല' പറയുന്നു. ഒരു ബോളിവുഡ് നടനെയും ടീമിൽ കൊണ്ടുവരാൻ ടീം പദ്ധതിയിടുന്നതായി റിപ്പോർട്ടുകൾ ഉണ്ട്, എന്നാൽ ഇതുവരെ ഔദ്യോഗിക സ്ഥിരീകരണം ഉണ്ടായിട്ടില്ല