പത്മരാജൻ പുരസ്ക്കാരം പ്രഖ്യാപിച്ചു: സുഭാഷ് ചന്ദ്രൻ, സാറാ ജോസഫ്, മധു സി. നാരായണൻ, സജിൻ ബാബു ജേതാക്കൾ

ചലച്ചിത്ര സംവിധായകൻ പത്മരാജന്റെ ഓർമ്മയ്ക്കായി പത്മരാജൻ മെമ്മോറിയൽ ട്രസ്റ്റ് ഏർപ്പെടുത്തിയ സാഹിത്യ ചലച്ചിത്ര പുരസ്കാരങ്ങൾ പ്രഖ്യാപിച്ചു. 2019ലെ പുരസ്കാരങ്ങളാണ് പ്രഖ്യാപിച്ചിരിക്കുന്നത്

കുമ്പളങ്ങി നൈറ്റ്സ് സംവിധാനം ചെയ്ത മധു സി നാരായണനാണ് മികച്ച സംവിധായകൻ

25,000 രൂപയും ശില്പവും പ്രശസ്തിപത്രവും അടങ്ങുന്നതാണ് പുരസ്കാരം

സുഭാഷ് ചന്ദ്രൻ രചിച്ച 'സമുദ്രശില' മികച്ച നോവലായി തിരഞ്ഞെടുക്കപ്പെട്ടു. 20,000 രൂപയും ശില്പവും പ്രശസ്തി പത്രവും ആണ് അവാർഡ്. നോവൽ പുരസ്ക്കാരം പത്മരാജൻ മെമ്മോറിയൽ ട്രസ്റ്റ് ഈ വർഷം മുതൽ പുതിയതായി ഏർപ്പെടുത്തിയതാണ്

സാറാ ജോസഫ് രചിച്ച 'നീ' മികച്ച ചെറുകഥയായി തിരഞ്ഞെടുത്തു. 15,000 രൂപയും ശില്പവും പ്രശസ്തിപത്രവും അടങ്ങുന്നതാണ് പുരസ്കാരം. പ്രസന്നരാജൻ ചെയർമാനും റോസ്മേരി, പ്രദീപ് പനങ്ങാട് എന്നിവർ അംഗങ്ങളുമായ പുരസ്കാര നിർണയ സമിതിയാണ് പുരസ്‌കാര ജേതാവിനെ തിരഞ്ഞെടുത്തത്

'ബിരിയാണി' എന്ന സിനിമയ്ക്ക് സജിൻ ബാബു മികച്ച തിരക്കഥാകൃത്തിനുള്ള പുരസ്കാരത്തിന് അർഹനായി

15,000 രൂപയും, ശിൽപവും, പ്രശസ്തിപത്രവുമാണ് പുരസ്കാരം

'ഉയരേ' സിനിമയുടെ തിരക്കഥാകൃത്തുക്കളായ ബോബി, സഞ്ജയ് എന്നിവർക്ക് പ്രത്യേക ജൂറി പരാമർശം ഉണ്ട്.  ശ്യാമപ്രസാദ് ചെയർമാനായ പുരസ്കാരനിർണയസമിതിയിൽ ജലജ, വിജയകൃഷ്ണൻ എന്നിവർ അംഗങ്ങളാണ്

മെയ് 23ന് പി. പത്മരാജന്റെ 75-ാം ജന്മവാർഷികമാണ്. അന്ന് നടത്താൻ നിശ്ചയിച്ചിരുന്ന വിപുലമായ ആഘോഷ പരിപാടികളിൽ വച്ച് പുരസ്കാരങ്ങൾ വിതരണം ചെയ്യാനിരുന്നത് നിലവിലെ കോവിഡ് സാഹചര്യത്തിൽ മറ്റൊരു സമയത്തേക്ക് മാറ്റി വച്ചു. കഴിഞ്ഞ 27 വർഷമായി പത്മരാജന്റെ ജന്മദിനത്തിൽ മുടങ്ങാതെ തിരുവനന്തപുരത്ത് വച്ചാണ് പുരസ്കാരദാന ചടങ്ങുകൾ നടത്തിയിരുന്നത്