‘ഏതെങ്കിലും പത്തു പേരു കണ്ടു മാർക്കിടാനല്ല, സിനിമ എടുക്കുന്നത് പ്രേക്ഷകർക്ക് വേണ്ടിയെന്ന് പൃഥ്വിരാജ്

ഏതെങ്കിലും പത്തു പേരു കണ്ടു മാർക്കിടാനല്ല, സിനിമ എടുക്കുന്നത് പ്രേക്ഷകർക്ക് വേണ്ടിയെന്ന് നടൻ പൃഥ്വിരാജ്. ഷാർജയിൽ നടന്ന ഒരു പൊതുപരിപാടിയിൽ വെച്ച് 'ആടുജീവിതം' സിനിമയ്ക്ക് ദേശീയ അവാർഡ് ലഭിക്കാത്തതിനെക്കുറിച്ച് പ്രതികരിക്കുകയായിരുന്നു അദ്ദേഹം.

'ആടുജീവിത'ത്തിന് പ്രേക്ഷകർ നൽകിയ പിന്തുണയാണ് ഏറ്റവും വലിയ അവാർഡെന്നും പൃഥ്വിരാജ് കൂട്ടിച്ചേർത്തു. സിനിമ ഏതെങ്കിലും ഒരു ജൂറിയോ പത്ത് പേരോ കണ്ട് മാർക്കിടാനോ, ഏതെങ്കിലും രാജ്യാന്തര ഫെസ്റ്റിവലുകളിൽ പ്രദർശിപ്പിക്കാനോ വേണ്ടിയല്ല.

തീർച്ചയായും അതൊക്കെ നല്ലതാണ്. പക്ഷേ സിനിമ എടുക്കുന്നത് പ്രേക്ഷകർക്ക് വേണ്ടിയാണ്. അവർ തിയറ്ററിൽ പോയി സിനിമ കണ്ട് ആസ്വദിക്കാൻ വേണ്ടിയാണ്. അപ്പോൾ പ്രേക്ഷകർ ആ സിനിമയ്ക്ക് ഏറ്റവും വലിയ അവാർഡ് തന്നുകഴിഞ്ഞു. അതിന് പ്രേക്ഷകർക്ക് നന്ദി. പൃഥ്വിരാജ് പറഞ്ഞു.

ലോകോത്തര നിലവാരത്തിൽ ഒരുക്കിയ 'ആടുജീവിതം' ദേശീയ അവാർഡുകളിൽ അവഗണിക്കപ്പെട്ടത് വലിയ വിമർശനങ്ങൾക്ക് കാരണമായിരുന്നു. 14 വിഭാഗങ്ങളിലാണ് ചിത്രം മത്സരിച്ചത്.

തിയറ്ററുകളിൽ വൻ വിജയമായിരുന്നിട്ടും, ഒമ്പത് സംസ്ഥാന അവാർഡുകൾ നേടിയ ഈ സിനിമയ്ക്ക് ഒരു ദേശീയ അവാർഡ് പോലും ലഭിച്ചിരുന്നില്ല. മികച്ച ചിത്രം, സംവിധായകൻ, ഛായാഗ്രാഹകൻ, നടൻ എന്നീ വിഭാഗങ്ങളിലെ പുരസ്കാര പ്രഖ്യാപനത്തിന് ശേഷം സമൂഹമാധ്യമങ്ങളിൽ 'ആടുജീവിത'ത്തിലെ രംഗങ്ങൾ വലിയ രീതിയിൽ പ്രചരിച്ചിരുന്നു.