ഇന്ത്യയിലെ ഏറ്റവും വിലകൂടിയ താരം; ജയിലറിൽ അഭിനയച്ചതിന് രജനീകാന്തിന് ലഭിച്ചത് 200 കോടിയിലധികം രൂപ!

പുറത്തിറങ്ങി ഒരു മാസമാകുമ്പോഴും തിയേറ്ററുകളിൽ ജയിലർ ഉണ്ടാക്കിയ ഓളം അവസാനിച്ചിട്ടില്ല. ഇന്ത്യയിൽ മാത്രം 328 കോടി രൂപയാണ് ഇതുവരെ ജയിലർ സ്വന്തമാക്കിയത്. ആഗോള തലത്തിൽ നെൽസൺ-രജനീകാന്ത് ചിത്രത്തിന്റെ കളക്ഷൻ 600 കോടി കവിഞ്ഞു.

ഈ ചിത്രത്തിലൂടെ രാജ്യത്തെ ഏറ്റവും വിലകൂടിയ താരമായി മാറിയിരിക്കുകയാണ് രജനീകാന്ത്. നിലവിൽ നൂറ് കോടിക്കു മുകളിൽ പ്രതിഫലം വാങ്ങുന്ന നടന്മാരിൽ ഒരാളായ രജനീകാന്തിന് ജയിലറിൽ നിന്നും ലഭിച്ചത് ഇരുന്നൂറ് കോടിക്കു മുകളിലാണ്.

110 കോടിയാണ് ജയിലറിൽ രജനീകാന്തിന് പ്രതിഫലമായി ലഭിച്ചത്. ഇതുകൂടാതെ വീണ്ടുമൊരു നൂറ് കോടി കൂടി താരത്തിന് ജയിലറിൽ നിന്ന് ലഭിച്ചതായാണ് റിപ്പോർട്ടുകൾ. ചിത്രത്തിന്റെ ലാഭവിഹിതമായാണ് രജനീകാന്തിന് ഇത്രയും വലിയ തുക ലഭിച്ചത്.

ഇതോടെ ഒരു ചിത്രത്തിന് മാത്രം രജനിക്ക് ലഭിച്ച പ്രതിഫലം 210 കോടി രൂപയാണ്. ഇന്ത്യയിൽ ഒരു സിനിമയ്ക്ക് ഒരു നടന് ലഭിക്കുന്ന ഏറ്റവും ഉയർന്ന പ്രതിഫലമാണിത്. ചിത്രത്തിന്റെ സംവിധായകൻ നെൽസണും ലാഭവിഹിതത്തിന്റെ ഒരു പങ്ക് കണ്ടിരുന്നു.

നൂറ് കോടി ലാഭവിഹിതത്തിനു പുറമേ, സൺ പിക്ചേഴ്സ് മേധാവി കലാനിധി മാരൻ രജനീകാന്തിന് BMW X7 ആഢംബര കാറും സമ്മാനിച്ചിട്ടുണ്ട്. ചെന്നൈയിലെ പോയസ് ഗാർഡനിലെ രജനീകാന്തിന്റെ വീട്ടിലെത്തിയാണ് കലാനിധി മാരൻ കാർ സമ്മാനിച്ചത്.