Tamannaah| കജോളിനേക്കാൾ വലിയ സ്റ്റാർ; ലസ്റ്റ് സ്റ്റോറീസ് 2 ൽ അഭിനയിക്കാൻ തമന്ന പ്രതിഫലമായി വാങ്ങിയത് കോടികൾ

തമന്ന, കജോൾ, മൃണാൽ ഠാക്കൂർ, നീന ഗുപ്ത, വിജയ് വർമ എന്നിവർ പ്രധാന വേഷത്തിലെത്തിയ ലസ്റ്റ് സ്റ്റോറീസ് 2 ദിവസങ്ങൾക്ക് മുമ്പാണ് നെറ്റ്ഫ്ലിക്സിൽ പുറത്തിറങ്ങിയത്.

സ്ത്രീകളുടെ പ്രണയത്തേയും ആഗ്രഹങ്ങളേയും കേന്ദ്രീകരിച്ച് നാല് സംവിധായകർ ഒരുക്കിയ നാല് ചെറു ചിത്രങ്ങൾ അടങ്ങുന്നതാണ് ലസ്റ്റ് സ്റ്റോറീസ് 2.

സോയ അക്തർ, ദിബാകർ ബാനർജി, കരൺ ജോഹർ, അനുരാഗ് കശ്യപ് എന്നീ സംവിധായകർ 2018 ൽ ഒരുക്കിയ ലസ്റ്റ് സ്റ്റോറീസിന്റെ രണ്ടാം ഭാഗമായാണ് പുതിയ ചിത്രം എത്തിയിരിക്കുന്നത്.

രണ്ടാം ഭാഗത്തിൽ, ബാൽകി, സുജോയ് ഘോഷ്, അമിത് രവീന്ദർനാഥ് ശർമ്മ, കൊങ്കണ സെൻ ശർമ്മ എന്നിവരാണ് സംവിധായകരായി എത്തുന്നത്. മൃണാൽ ഠാക്കൂർ, തമന്ന ഭാട്ടിയ, കാജോൾ, നീന ഗുപ്ത, വിജയ് വർമ, തിലോത്തമ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.

ആദ്യ ഭാഗത്തെ അപേക്ഷിച്ച്, ലസ്റ്റ് സ്റ്റോറീസ് രണ്ടിന് സമ്മിശ്ര പ്രതികരണമാണ് ലഭിച്ചുകൊണ്ടിരിക്കുന്നത്. കങ്കണ സെൻ ശർമയുടെ മിറർ എന്ന സിനിമയാണ് ആന്തോളജിയിൽ ഏറ്റവും മികച്ചു നിൽക്കുന്നത്.

ചിത്രത്തിൽ തമന്നയും വിജയ് വർമയും ഒന്നിച്ചുള്ള ഇന്റിമേറ്റ് സീൻ വലിയ ചർച്ചയായിരുന്നു. പതിനെട്ട് വർഷത്തെ സിനിമാ ജീവിതത്തിൽ തമന്ന ആദ്യമായാണ് ഇത്രയും ബോൾഡായ രംഗങ്ങളിൽ അഭിനയിക്കുന്നത്.

നാല് ചിത്രങ്ങളിൽ ഏറ്റവും കൂടുതൽ പ്രതിഫലം വാങ്ങിയ താരവും തമന്ന തന്നെയാണ്. സുജയ് ഘോഷിന്റെ സംവിധാനത്തിലാണ് തമന്നയും വിജയ് വർമയും എത്തുന്നത്. നാല് കോടിയാണ് ഈ ചിത്രത്തിൽ അഭിനയിക്കാൻ തമന്ന വാങ്ങിയ പ്രതിഫലം.

കജോളാണ് കൂടുതൽ പ്രതിഫലം വാങ്ങിയ മറ്റൊരു താരം. മൂന്ന് കോടിയാണ് കാജോളിന് ലഭിച്ചത്. സീതാരാമത്തിലൂടെ ശ്രദ്ധേയയായ മൃണാൽ ഠാക്കൂറും മൂന്ന് കോടിയാണ് പ്രതിഫലമായി വാങ്ങിയത്.