കൊറോണ: യുഎഇയിൽ വിദ്യാഭ്യാസ സ്ഥാപനങ്ങൾക്ക് ഞായറാഴ്ച മുതൽ നാലാഴ്ചത്തെ അവധി

കൊറോണ: യുഎഇയിൽ വിദ്യാഭ്യാസ സ്ഥാപനങ്ങൾക്ക് ഞായറാഴ്ച മുതൽ നാലാഴ്ചത്തെ അവധി

എല്ലാ സർക്കാർ-സ്വകാര്യ സ്കൂളുകള്‍ക്കും കോളജുകൾക്കും അവധി ബാധകമായിരിക്കുമെന്നാണ് വിദ്യാഭ്യാസ മന്ത്രാലയം അറിയിച്ചിരിക്കുന്നത്.

കൊറോണ ഭീതിയുടെ പശ്ചാത്തലത്തിൽ സുരക്ഷാ മുൻകരുതല്‍ എന്ന നിലയ്ക്കാണ് പുതിയ തീരുമാനം.

വിദ്യാഭ്യാസ സ്ഥാപനങ്ങളുടെ വസന്തകാല അവധി നേരത്തെയാക്കുകയാണെന്നാണ് മന്ത്രാലയം പുറത്തിറക്കിയ പ്രസ്താവനയിൽ പറയുന്നത്.

വിദൂര വിദ്യാഭ്യാസ പദ്ധതിയും പരിഗണനയിലുണ്ടെന്നാണ് സൂചന.

വിദ്യാര്‍ഥികളുടെ സുരക്ഷ ഉറപ്പു വരുത്തുന്നതിനുള്ള പ്രതിരോധ മുൻകരുതൽ നടപടികളുടെ ഭാഗമായാണ് പുതിയ തീരുമാനം.

ദേശീയ തലത്തിൽ കോവിഡ് 19 വ്യാപനം തടയാൽ ലക്ഷ്യമിട്ടുള്ള ശ്രമങ്ങൾ നടന്നു വരികയാണ്. ഇതിന്റെ ഭാഗമായി വിദ്യാർഥികളുടെ സുരക്ഷ ഉറപ്പു വരുത്താനാണ് നീക്കമെന്നാണ് ആരോഗ്യ മന്ത്രാലത്തിൻ‌റെ പ്രസ്താവനയിൽ പറയുന്നത്.

സ്കൂളുകൾക്കും ഉന്നത വിദ്യാഭ്യാസ സ്ഥാപനങ്ങൾക്കും അവധി ബാധകമായിരിക്കുമെന്നും പ്രസ്താവനയില്‍ പറയുന്നു.

യുഎഇയുടെ ഔദ്യോഗിക വാർത്താ ഏജൻസിയായ WAM വഴിയാണ് അവധി വിവരം പുറത്തു വിട്ടിരിക്കുന്നത്.

നാലാഴ്ചത്തെ അവധി കാലത്തിനിടെ വിദ്യാഭ്യാസ സ്ഥാപനങ്ങൾ അണുവിമുക്തമാക്കാനുള്ള നടപടികളും ഉണ്ടാകും.

മാർച്ച് 29 മുതൽ ഏപ്രിൽ 12 വരെ നിശ്ചയിച്ചിരുന്ന വസന്തകാല അവധി ഇത്തവണ നേരത്തെ ആക്കുകയാണ്. മാർച്ച് 8 മുതൽ ആരംഭിക്കുന്ന നാലാഴ്ച അവധിക്കാലഘട്ടത്തിലെ അവസാന രണ്ട് ആഴ്ച വിദൂര പഠനത്തിനുള്ള സംവിധാനങ്ങൾ നടപ്പിലാക്കുമെന്നാണ് മന്ത്രാലയം അറിയിച്ചിരിക്കുന്നത്.