അമ്മയുടെ ജന്മദിനത്തിന് സർപ്രൈസ് നല്‍കാൻ കാത്തിരുന്ന ക്യാപ്റ്റന്‍ ദീപക് സാഥെ; 84കാരിയായ അമ്മയെ തേടിയെത്തിയത് ദുരന്തവാർത്ത

എൺപത്തിനാലുകാരിയായ അമ്മയുടെ ജന്മദിനത്തിന് സർപ്രൈസ് സന്ദര്‍ശനം നടത്താനിരിക്കെയാണ് ക്യാപ്റ്റൻ ദീപക് സാഥെയെ തേടി ദുരന്തം എത്തിയത്

കഴിഞ്ഞ ദിവസമായിരുന്നു ദീപക് സാഥെയുടെ അമ്മ നീള സാഥെയുടെ ജന്മദിനം. വിമാന സൗകര്യം ഉണ്ടെങ്കിൽ അതേ ദിവസം അമ്മയെ സന്ദർശിക്കാനെത്തുമെന്ന് അദ്ദേഹം ബന്ധുക്കളെ അറിയിച്ചിരുന്നു.. എന്നാൽ അവരെ തേടിയെത്തിയത് സാഥെയുടെ മരണവാർത്തയായിരുന്നു

കരിപ്പൂർ വിമാനത്താവളത്തിൽ അപകടത്തിൽപ്പെട്ട എയർ ഇന്ത്യാ എക്സ്പ്രസ് വിമാനത്തിലെ പൈലറ്റായിരുന്നു ദീപക് സാഥെ. വന്ദേ ഭാരത് ദൗത്യത്തിന്റെ ഭാഗമായി ദുബായിൽനിന്ന് 190 യാത്രക്കാരുമായി വന്ന എയർ ഇന്ത്യ എക്സ്പ്രസിന്റെ എഎക്സ്ബി1344 ബി737 വിമാനം വെള്ളിയാഴ്ച രാത്രി 7.45ഓടെയാണ് അപകടത്തിൽപ്പെട്ടത്. 

തീരാത്ത നഷ്ടമാണെങ്കിലും ധീരനായ മകനെയോർത്ത് അഭിമാനിക്കുകയാണ് ദീപക് സാഥെയുടെ മാതാപിതാക്കളായ വസന്ത് സാഥെയും നീള സാഥെയും. 'ആവശ്യം വേണ്ട ആരെയും സഹായിക്കാൻ അവൻ മുന്നിലുണ്ടാകും' എന്നാണ് ആ അമ്മയുടെ വാക്കുകൾ. 

എല്ലാവർക്കും വളരെ പ്രിയപ്പെട്ടവനായിരുന്നു തന്‍റെ മകനെന്നും ആ അമ്മ ഓർത്തെടുക്കുന്നു. നാഗ്പുരിലെ ഭരത് നഗറിലാണ് ദീപക് സാഥെയുടെ മാതാപിതാക്കൾ കഴിയുന്നത്. ക്യാപ്റ്റൻ കുടുംബത്തിനൊപ്പം മുംബൈയിലും

അകലെയായിരുന്നുവെങ്കിലും മാതാപിതാക്കളുമായി വളരെ ആഴത്തിലുള്ള ബന്ധം ദീപക് സൂക്ഷിച്ചിരുന്നു. ഇക്കഴി‍ഞ്ഞ മാർച്ചിലാണ് ഇവരെ അവസാനമായി കണ്ടു മടങ്ങിയത്. എന്നാൽ എല്ലാ ദിവസവും ഫോണിൽ സംസാരിക്കാൻ സമയം കണ്ടെത്തിയിരുന്നു

എന്നാൽ മാസങ്ങളുടെ ഇടവേളയ്ക്ക് ശേഷം അമ്മയുടെ ജന്മദിനത്തിന് സർപ്രൈസ് സന്ദർശനം നൽകാൻ കാത്തിരുന്ന സാഥെയെെ തേടി വിമാന അപകടത്തിന്‍റെ രൂപത്തിൽ മരണം എത്തുകയായിരുന്നു.