IPL 2020 | എം.എസ് ധോണിക്ക് കോവിഡ് പരിശോധന; ജഡേജയ്ക്ക് ചെന്നൈ ക്യാംപ് നഷ്ടമാകും

ഐപിഎൽ മത്സരങ്ങൾക്കായി പുറപ്പെടുന്നതിന് മുന്നോടിയായി ചെന്നൈ സൂപ്പർകിങ്സ് നായകൻ മഹേന്ദ്ര സിങ് ധോണി കോവിഡ് ടെസ്റ്റിന് വിധേയനായി. റാഞ്ചിയിൽവെച്ച് നടത്തിയ ധോണിയുടെ കോവിഡ് പരിശോധന ഫലം ഇന്നു വൈകുന്നേരത്തോടെ ലഭിക്കുമെന്നാണ് പ്രതീക്ഷ. ഫലം നെഗറ്റീവ് ആണെങ്കിൽ, ഐ‌പി‌എൽ 2020 നായി യുഎഇയിലേക്കു പുറപ്പെടുന്നതിന് മുന്നോടിയായി ധോണി ചെന്നൈ സൂപ്പർ കിങ്സ് ടീമിന്റെ പരിശീലന ക്യാമ്പിനായി ചെന്നൈയിലേക്ക് പോകും.

അതേസയം ചെന്നൈയിൽ നടക്കുന്ന ടീം ക്യാംപിൽ ഓൾറൌണ്ടർ രവീന്ദ്ര ജഡേജ പങ്കെടുക്കില്ലെന്ന് ഉറപ്പായി. വ്യക്തിപരമായ അസൌകര്യം മൂലമാണ് ജഡേജ ക്യാംപിൽനിന്ന് വിട്ടുനിൽക്കുന്നതെന്ന് ചെന്നൈ സൂപ്പർകിങ്സ് ഫ്രാഞ്ചൈസി സിഇഒ കാശി വിശ്വനാഥൻ പറഞ്ഞു.

എം‌എ ചിദംബരം സ്റ്റേഡിയത്തിൽ നടക്കുന്ന ക്യാമ്പ് ഓഗസ്റ്റ് 15 ന് ആരംഭിച്ച് ഓഗസ്റ്റ് 20 വരെ തുടരും.

പിറ്റേദിവസം ടീം യു‌എഇയിലേക്ക് പുറപ്പെടും. കോവിഡ് -19 മൂലം രാജ്യം ലോക്ക്ഡൌൺ ആകുന്നതിന് മുമ്പ് മാർച്ച് ആദ്യം പരിശീലന ക്യാമ്പുകൾ തുടങ്ങാൻ ചെന്നൈ ടീം പദ്ധതിയിട്ടിരുന്നു. എന്നാൽ ലോക്ക്ഡൌൺ ആയതിന് പിന്നാലെ ഐപിഎൽ ഉപേക്ഷിക്കുകയും ക്യാംപ് റദ്ദാക്കുകയും ചെയ്യുകയായിരുന്നു.

ടീമിന്‍റെ ബൌളിംഗ് പരിശീലകനായ എൽ ബാലാജിയാണ് ക്യാമ്പിന് നേതൃത്വം നൽകുന്നത്. നീണ്ട ഇടവേളയ്ക്ക് ശേഷം കളിക്കാർക്ക് ഫിറ്റ്നസ് വീണ്ടെടുക്കുക എളുപ്പമല്ലെന്ന് അദ്ദേഹം ബുധനാഴ്ച പറഞ്ഞു. “ഏതൊരു കായികരംഗത്തും 100 ശതമാനം മികവോടെ ഫിറ്റ്നസ് നിലനിർത്തുക എളുപ്പമല്ല. ഓരോ ആഴ്ചയും കായികക്ഷമത മെച്ചപ്പെടുത്തുന്നതിനുള്ള ശ്രമമാണ് കളിക്കാരിൽനിന്ന് ഉണ്ടാകേണ്ടത്,” അദ്ദേഹം പിടിഐയോട് പറഞ്ഞു.

ധോണി, സുരേഷ് റെയ്‌ന, പീയൂഷ് ചൌള എന്നിവരുൾപ്പെടെയുള്ള ഇന്ത്യൻ കളിക്കാർ അണിനിരക്കുന്ന ഹ്രസ്വ ക്യാമ്പിന്റെ ചുമതല ബാലാജിക്കായിരിക്കും. നെറ്റ് ബൌളർമാർ ബുധനാഴ്ച കോവിഡ് -19 ടെസ്റ്റുകൾക്ക് വിധേയരായതിനാൽ എട്ട് തമിഴ്‌നാട് കളിക്കാരെ യുഎഇയിലേക്ക് പോകാൻ തിരഞ്ഞെടുത്തിട്ടുണ്ട്. വരാനിരിക്കുന്ന സി‌എസ്‌കെ ക്യാമ്പിൽ ഇവരും ഉണ്ടാകും.

അശ്വിൻ ക്രിസ്റ്റ്, ജെ കൌശിക്, എം മുഹമ്മദ്, ഓഷിക് ശ്രീനിവാസ്, എൽ വിഘ്‌നേഷ്, അഭിഷേക് തൻവർ എന്നിവരാണ് തിരഞ്ഞെടുക്കപ്പെട്ട നെറ്റ് ബൌളർമാർ. ഓഗസ്റ്റ് 21 ന് ടീം യുഎഇയിലേക്ക് പുറപ്പെടും.