ചുട്ടുപൊള്ളി കോട്ടയം; ഫെബ്രുവരിയിലെ രാജ്യത്തെ ഏറ്റവും കൂടിയ ചൂട് രേഖപ്പെടുത്തി

കോട്ടയം: ഇന്ത്യയിൽ ഫെബ്രുവരിയിൽ ഇതുവരെ ഏറ്റവും കൂടിയ ചൂട് രേഖപ്പെടുത്തിയത് കോട്ടയത്ത്. ഞായറാഴ്ച 38.5 ഡിഗ്രിയാണ് റബർ ബോർഡ് കാലാവസ്ഥാ നിരീക്ഷണ കേന്ദ്രത്തിൽ രേഖപ്പെടുത്തിയത്.

ദേശീയ കാലാവസ്ഥാ നിരീക്ഷണ കേന്ദ്രത്തിന്റെ വെബ്സൈറ്റിലും ഇതേ കണക്ക് പ്രസിദ്ധീകരിച്ചിട്ടുണ്ട്. ഫെബ്രുവരി ഒന്നിന് കർണാടകയിലെ കൽബുർഗിയിലാണ് ഇതിന് തൊട്ടുതാഴെയുള്ള ചൂട് രേഖപ്പെടുത്തിയത്. 38.4 ഡിഗ്രി സെൽഷ്യസ്.

കോട്ടയത്ത് ആറുവർഷം മുമ്പ് മാർച്ച്, ഏപ്രിൽ മാസങ്ങളിൽ 38.5 ഡിഗ്രി സെൽഷ്യസ് ചൂട്, രേഖപ്പെടുത്തിയിരുന്നു. പക്ഷേ, ഫെബ്രുവരിയിൽ ഇത്ര ചൂട് മുൻപ് വന്നിട്ടില്ല.

ഈ മാസം 10 തവണ ചൂട് 37 ഡിഗ്രി കടന്നു. എന്നാൽ തിങ്കളാഴ്ച ചൂട് കുറഞ്ഞു, 36.5 ഡിഗ്രി. ഈ മാസം 37.8 ഡിഗ്രി സെൽഷ്യസ് ഫെബ്രുവരി 17നും 11നുമുണ്ടായി.

1999ലും 2018ലും 37.8 ഡിഗ്രി സെൽഷ്യസ് ചൂട് വന്നിരുന്നു. ആഴ്ചകൾ പിന്നിടുന്നതോടെ കോട്ടയത്തെ ചൂട് റെക്കോർഡ് ഭേദിക്കുമോ എന്നാണ് ഇനി അറിയേണ്ടത്.