Ente KSRTC യാത്രക്കാർക്ക് 'ആപ്പു'മായി ആനവണ്ടി; ആരും പേടിക്കണ്ട ഉപകാരത്തിനാണ്

തിരുവനന്തപുരം: കെ.എസ്.ആർ.ടി.സി യാത്രകൾക്കുള്ള സീറ്റുകൾ ഇനി മൊബൈലിൽ ആപ്പ് വഴി ബുക്ക് ചെയ്യാം. "എന്റെ കെ.എസ്.ആർ.ടി.സി" എന്ന മൊബൈൽ റിസർവേഷൻ ആപ്പ് തയ്യാറായിക്കഴിഞ്ഞു. ചൊവ്വാഴ്ച മുഖ്യമന്ത്രി പിണറായി വിജയൻ ആപ്പ് പുറത്തിറക്കും.

ആൻഡ്രോയ്ഡ്/ഐ.ഒ.എസ് പ്ലാറ്റ്ഫോമുകളിൽ ഉപയോഗിക്കാൻ കഴിയുന്ന മൊബൈൽ റിസർവേഷൻ ആപ്പ് "എന്റെ കെ.എസ്.ആർ.ടി.സി" (Ente KSRTC) എന്ന പേരിൽ ലഭിക്കും. ആധുനിക പേയ്മെന്റ് സംവിധാനങ്ങൾ ഉൾപ്പെടുത്തിയിട്ടുള്ളതാണ് ആപ്ലിക്കേഷൻ.

ലളിതമായി ഉപയോഗിക്കാൻ സാധിക്കുന്ന തരത്തിലാണ് രൂപകൽപന. ദിവസേന പതിനായിരത്തിലധികം യാത്രക്കാരാണ് കെ.എസ്.ആർ.ടി.സി ഓൺലൈൻ റിസർവേഷൻ സംവിധാനം ഉപയോഗിച്ച് ടിക്കറ്റ് ബുക്ക് ചെയ്ത് യാത്ര ചെയ്തിരുന്നത്.

മിക്ക യാത്രക്കാരും മൊബൈൽ ഫോണാണ് ബുക്കിംഗിന് ഉപയോഗിച്ചിരുന്നത്. എന്നാൽ കെ.എസ്.ആർ.ടി.സിക്ക് ഓൺലൈൻ റിസർവേഷനായി സ്വന്തമായി മൊബൈൽ ആപ്പ് ഉണ്ടായിരുന്നില്ല. പുതിയ ആപ്പ് യാഥാർഥ്യമായതോടെ വളരെ വേഗത്തിൽ ടിക്കറ്റ് ബുക്ക് ചെയ്യാനാകും.

ആപ്പിന്റെ ഉദ്ഘാടനത്തോടൊപ്പം തന്നെ "കെ.എസ്.ആർ.ടി.സി ജനതാ സർവ്വീസ്" ലോഗോ, "കെ.എസ്.ആർ.ടി.സി ലോജിസ്റ്റിക്സ്" ലോഗോ എന്നിവയും മുഖ്യമന്ത്രി ഉദ്ഘാടനം ചെയ്യും.

കോവിഡ‍് കാലത്തെ കെ.എസ്.ആർ.ടി.സിയുടെ "അൺലിമിറ്റഡ് സ്റ്റോപ്പ് ഓർഡിനറി" ബസുകൾ. ഈ സർവീസിനെയാണ് "കെ.എസ്.ആർ.ടി.സി ജനത സർവ്വീസ്" എന്ന് നാമകരണം ചെയ്യുന്നത്. സപ്ളൈകോ യ്ക്ക് വാഹനങ്ങൾ പ്രതിമാസ വാടകയ്ക്ക് അനുവദിച്ചു കൊണ്ടാണ് കെഎസ്ആർടിസി ലോജിസ്റ്റിക്സ് മേഖലയിലേക്ക് കടന്നത്.