12 വർഷത്തിനുശേഷം പ്രതിപക്ഷ നേതാവ് വി ഡി സതീശൻ ശബരിമല ദർശനം നടത്തി; ഇത് 26-ാം തവണ

ശബരിമല: 12 വർഷത്തെ ഇടവേളയ്ക്ക് ശേഷം പ്രതിപക്ഷ നേതാവ് വി ഡി സതീശൻ മലകയറി ശബരിമലയിലെത്തി അയ്യപ്പനെ തൊഴുതു. തിങ്കളാഴ്ചയാണ് സതീശൻ ദർശനം നടത്തിയത്. സുഹൃത്തുക്കൾക്കും പേഴ്സണൽ സ്റ്റാഫിനുമൊപ്പം കറുപ്പ് ധരിച്ചാണ് അയ്യപ്പ ഭക്തനായ സതീശൻ മല കയറിയത്. (photo: vd satheesan/facebook)

തിങ്കളാഴ്ച അതിരാവിലെ പറവൂരിലെ വീട്ടിൽ നിന്ന് കെട്ടുകെട്ടിയാണ് യാത്ര തിരിച്ചത്. രാവിലെ 8 മണിയോടെ പമ്പയിലെത്തി. അവിടെ പമ്പാ സ്നാനം നടത്തി. തുടര്‍ന്ന് ഗണപതി ക്ഷേത്രത്തിൽ തൊഴുത് പ്രസാദവും വാങ്ങി മലകയറി. 11 മണിയോടെ ശബരിമലയിലെത്തി. (photo: vd satheesan/facebook)

സോപാനത്തെ ഒന്നാം നിരയിൽ മറ്റു തീർത്ഥാഥാടകർക്ക് ഒപ്പം വരി നിന്നാണ് അയ്യപ്പനെ കണ്ടു തൊഴുതത്. തിരക്കിനിടയിൽ ഒരു മിനിറ്റോളം അയ്യനെ തൊഴുതു. പ്രസാദം വാങ്ങി. നേരെ മാളികപ്പുറത്ത് എത്തി ദർശനം നടത്തി. (photo: vd satheesan/facebook)

പിന്നീട് സന്നിധാനത്ത് മാധ്യമപ്രവര്‍ത്തകരെ കണ്ടു. വഖഫ് വിഷയത്തിലെ പ്രതികരണം അടക്കം മാധ്യമപ്രവർത്തകരുടെ എല്ലാ ചോദ്യങ്ങൾക്കും വിശദമായ മറുപടി നൽകി. (photo: vd satheesan/facebook)

ഉച്ചകഴിഞ്ഞ് മല ഇറങ്ങി. വൈകിട്ടോടെ പമ്പയിലെത്തി. അവിടെ നിന്ന് നേരെ തിരുവനന്തപുരത്തേക്ക് തിരിച്ചു. (photo: vd satheesan/facebook)

തിരുവനന്തപുരം ലോ അക്കാദമിയിൽ പഠിക്കുന്ന കാലത്താണ് ആദ്യമായി ശബരിമല ദർശനത്തിന് എത്തിയത്. കോളേജ് യൂണിയൻ ചെയർമാന്റെ നൂറനാട്ടെ വീട്ടിൽ നിന്നാണ് കെട്ടു മുറുക്കി ആദ്യമായി ശബരിമല ദർശനം നടത്തുന്നത്. (photo: vd satheesan/facebook)

പലതവണയായി 25 തവണ ശബരിമലയിലെത്തി അയ്യപ്പനെ തൊഴുതു. ഏറ്റവും ഒടുവിൽ പോയത് 12 വർഷം മുൻപായിരുന്നു. കാൽമുട്ട് വേദനയെ തുടർന്ന് പിന്നീട് മലകയറാൻ വയ്യാതെയായത്. (photo: vd satheesan/facebook)

ഇപ്പോൾ മുട്ടുവേദന കുറഞ്ഞതോടെ മലകയറാൻ തീരുമാനിക്കുകയായിരുന്നു. ഇത്തവണ മല നടന്നു കയറുമ്പോൾ പ്രയാസം തോന്നിയില്ലെന്നും വി ഡി സതീശൻ പറയുന്നു. (photo: vd satheesan/facebook)