ഖമനയിയുടെ വധം: ഇറാൻ അമേരിക്കയെ നേരിട്ട് ആക്രമിച്ചേക്കുമെന്ന് യുഎസ് രഹസ്യാന്വേഷണ മുന്നറിയിപ്പ്

Published by:Rajesh V
news18-malayalam

Last Updated:Mar 03, 2026 9:05 PM IST

ഫെബ്രുവരി 28ന് ഇറാൻ പരമോന്നത നേതാവ് അലി ഖമനയി കൊല്ലപ്പെട്ടതിന് പ്രതികാരമായി ഇറാൻ അമേരിക്കയെ ലക്ഷ്യം വെച്ചേക്കുമെന്ന് രഹസ്യാന്വേഷണ റിപ്പോർട്ട്. സൈബർ ആക്രമണങ്ങൾക്കും ടാർഗറ്റഡ് ആക്രമണങ്ങൾക്കും സാധ്യതയുണ്ടെങ്കിലും അമേരിക്കൻ മണ്ണിൽ ഒരു വൻകിട സായുധ ആക്രമണത്തിന് സാധ്യത കുറവാണെന്ന് ഉദ്യോഗസ്ഥർ വിലയിരുത്തുന്നു

ഇസ്രായേലും അമേരിക്കയും ചേർന്ന് നടത്തിയ ആക്രമണത്തിൽ ഇറാൻ പരമോന്നത നേതാവ് അലി ഖമനയി കൊല്ലപ്പെട്ടതിന് പ്രതികാരമായി ഇറാനും അവരുടെ സഖ്യകക്ഷികളും അമേരിക്കയെ ലക്ഷ്യമിട്ടേക്കാമെന്ന് യുഎസ് രഹസ്യാന്വേഷണ വിഭാഗം മുന്നറിയിപ്പ് നൽകി. റോയിട്ടേഴ്സ് പുറത്തുവിട്ട ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റിയുടെ വിലയിരുത്തലിലാണ് ഇക്കാര്യമുള്ളത്.

അമേരിക്കൻ മണ്ണിൽ വലിയ തോതിലുള്ള ഭൗതിക ആക്രമണങ്ങൾ നടക്കാൻ സാധ്യത കുറവാണെങ്കിലും, സൈബർ ആക്രമണങ്ങൾക്കും തിരഞ്ഞെടുത്ത വ്യക്തികളെ ലക്ഷ്യമിട്ടുള്ള ആക്രമണങ്ങൾക്കും ഇറാൻ ശ്രമിച്ചേക്കാം. വെബ്‌സൈറ്റുകൾ തകർക്കുക, നെറ്റ്‌വർക്കുകളെ നിശ്ചലമാക്കുക തുടങ്ങിയ സൈബർ നീക്കങ്ങൾക്ക് 'ഹാക്കർമാർ' ശ്രമിക്കാനിടയുണ്ടെന്നും റിപ്പോർട്ട് വ്യക്തമാക്കുന്നു.

"അമേരിക്കൻ മണ്ണിലെ ഭീഷണികളെ ഞങ്ങൾ സൂക്ഷ്മമായി നിരീക്ഷിച്ചുവരികയാണെന്നും അവ തടയാൻ ഫെഡറൽ ഏജൻസികളുമായി ചേർന്ന് പ്രവർത്തിക്കുന്നുണ്ടെന്നും" ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോം റോയിട്ടേഴ്സിനോട് പറഞ്ഞു.

ഇതും വായിക്കുക: ചെലവ് ഒരു ദിവസം 7000 കോടിയിലേറെ; ഇറാനുമായുള്ള സംഘർഷം അമേരിക്കയെ ബാധിക്കുന്നതെങ്ങനെ?

പശ്ചിമേഷ്യയിലെ യുഎസ് താവളങ്ങൾക്കും സഖ്യകക്ഷികൾക്കും നേരെ ഇറാൻ ആക്രമണം തുടരുമെന്നും റിപ്പോർട്ട് മുന്നറിയിപ്പ് നൽകുന്നു. ഇറാനിൽ ഭരണമാറ്റത്തിന് യുഎസ് പ്രസിഡന്റ് ഡോണൾഡ് ട്രംപ് ആഹ്വാനം ചെയ്ത സാഹചര്യത്തിൽ, അവിടെ പ്രതിഷേധങ്ങൾ പൊട്ടിപ്പുറപ്പെട്ടാൽ അതിന്റെ ഉത്തരവാദിത്തം അമേരിക്കൻ ഉദ്യോഗസ്ഥരുടെ മേൽ കെട്ടിവെക്കാനും ഇറാൻ ശ്രമിച്ചേക്കാം.

അതിനിടെ, ഇറാന്റെ വ്യോമപ്രതിരോധ സംവിധാനങ്ങളും നാവികസേനയും നേതൃത്വവും തകർക്കപ്പെട്ടതായി ട്രംപ് തന്റെ സോഷ്യൽ മീഡിയ പ്ലാറ്റ്‌ഫോമായ 'ട്രൂത്ത് സോഷ്യലിൽ' കുറിച്ചു. "അവർക്ക് ഇപ്പോൾ ചർച്ചകൾ നടത്തണം. പക്ഷേ അത് വൈകിപ്പോയി എന്നാണ് ഞാൻ പറഞ്ഞത്," എന്നും ട്രംപ് കൂട്ടിച്ചേർത്തു. ഇറാനെതിരായ സൈനിക നടപടിയെ ന്യായീകരിച്ചുകൊണ്ടുള്ള ലേഖനവും അദ്ദേഹം ഇതോടൊപ്പം പങ്കുവെച്ചിട്ടുണ്ട്.

Summary: Following the death of Iranian Supreme Leader Ali Khamenei on February 28, 2026, a US intelligence assessment from the Department of Homeland Security (DHS) has warned of potential retaliatory strikes on American soil. While a large-scale physical assault on the US mainland is considered "unlikely," the report warns of a "persistent threat" of targeted attacks and cyber operations.