Accident | തിരുവനന്തപുരത്ത് നിയന്ത്രണംവിട്ട പിക്കപ്പ് വാനിടിച്ച് കാൽനടയാത്രക്കാരൻ മരിച്ചു

തിരുവനന്തപുരം (Thiruvananthapuram) നെയ്യാറ്റിൻകര (Neyyattinkara) കുറ്റിയാണിക്കാടിൽ വാഹനാപകടത്തിൽ കാൽനടയാത്രക്കാരൻ മരിച്ചു. കുറ്റിയാണിക്കാട് സ്വദേശി അജയൻ (54) ആണ് മരിച്ചത്.

ഇന്ന് പുലർച്ചെയായിരുന്നു സംഭവം. ഒറ്റശേഖരമംഗലം ഭാഗത്തുനിന്ന് നെയ്യാറ്റിൻകരയിലേക്ക് പോവുകയായിരുന്ന ഇറച്ചിക്കോഴിയുമായ് വന്ന പിക്കപ്പ് വാൻ നിയന്ത്രണംവിട്ടായിരുന്നു അപകടം.

കുറ്റിയാണിക്കാട് ക്ഷേത്രത്തിലെ ഉത്സവത്തിനോടനുബന്ധിച്ച് നടക്കുന്ന അന്നദാനത്തിന് സദ്യ വട്ടങ്ങൾ ഒരുക്കിയ ശേഷം അജയൻ വീട്ടിലേക്ക് മടങ്ങുന്നതിനിടയിൽ ആയിരുന്നു അപകടം.

ഗുരുതരമായി പരിക്കേറ്റ അജയനെ തിരുവനന്തപുരം മെഡിക്കൽ കോളജിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. ആര്യൻകോട് പോലീസ് മേൽനടപടി സ്വീകരിച്ചു. രണ്ടുമാസം മുമ്പും ഇവിടെ സമാനമായ അപകടം ഉണ്ടായിരുന്നു.

തുടർച്ചയായ രണ്ടാം ദിവസമാണ് രാവിലെയുണ്ടായ വാഹനാപകടത്തിൽ തിരുവനന്തപുരം ജില്ലയിൽ കാൽനട യാത്രികൻ കൊല്ലപ്പെടുന്നത്. വെമ്പായത്തിന് സമീപം കൊപ്പത്ത് ശനിയാഴ്ച രാവിലെ അജ്ഞാത വാഹനമിടിച്ച് പരിക്കേറ്റയാൾ മരിച്ചിരുന്നു. കൊപ്പം കട്ടയ്ക്കാൽ അൽ അബ്റാനിൽ അലികുഞ്ഞ് (80) ആണ് മരണപ്പെട്ടത്.