Benefits of Black Tea: രക്തസമ്മർദ്ദം കുറയ്ക്കും ഹൃദയത്തെ സംരക്ഷിക്കും; കട്ടൻ ചായയുടെ അതിശയിപ്പിക്കും ​ഗുണങ്ങൾ

ആളുകൾ ഏറ്റവും കുടിക്കാൻ ഇഷ്ടപ്പെടുന്ന പാനീയങ്ങളിൽ ഒന്നാണ് കട്ടൻ ചായ. അതിരാവിലെ ഒരു കട്ടൻ ചായയോടെ ആരംഭിക്കുന്നവരാണ് നമ്മിൽ പലരും. ഊർജ്ജം നൽകുന്ന പാനീയങ്ങളിൽ പലപ്പോഴും മുൻപന്തിയിൽ നിൽക്കുന്നതും കട്ടൻ തന്നെ. ഒരു ക്ഷീണം തോന്നിയാൽ കട്ടൻ കുടിച്ച് മാറുമോന്ന് ടെസ്റ്റ് ചെയ്യുന്നവരാണ് നമ്മിൽ പലരും. അതിനു ശേഷമേ മറ്റ് ചികിത്സകളിലേക്ക് കടക്കാറുള്ളു.

യഥാർത്ഥത്തിൽ നിസ്സാരമായി നാം കണക്കാക്കുന്ന കട്ടൻ ചായയ്ക്ക് നിരവധി ആരോ​ഗ്യ ​ഗുണങ്ങളാണ് ഉള്ളത്. വിട്ടുമാറാത്ത രോഗങ്ങളിൽ നിന്നും സംരക്ഷണം നൽകുന്ന ആൻ്റിഓക്‌സിഡൻ്റുകൾ കട്ടൻ ചായയിൽ അടങ്ങിയിരിക്കുന്നു. അതിനാൽ തന്നെ മിതമായ അളവിൽ ദിവസവും കട്ടൻ ചായ കഴിക്കുന്നത് ആരോ​ഗ്യത്തിന് നല്ലതായി കണക്കാക്കുന്നു.

ഹൃദയാരോഗ്യം പ്രോത്സാഹിപ്പിക്കുന്നതിൽ കട്ടൻ ചായ വലിയ പങ്കുവഹിക്കുന്നു. പതിവായി കട്ടൻ ചായ കുടിക്കുന്നതിലൂടെ രക്തസമ്മർദ്ദം കുറയ്ക്കുമെന്നാണ് പല പഠനങ്ങളും പറയുന്നത്. അതിലൂടെ ഹൃദയസംബന്ധമായ രോ​ഗങ്ങളുടെ സാധ്യത കുറയും. സ്ട്രോക്ക് സാധ്യത കുറയ്ക്കുന്നുവെന്നും പഠനങ്ങൾ.

കട്ടൻ ചായയിൽ കഫീൻ അടങ്ങിയിരിക്കുന്നു. കൂടാതെ ഇതിൽ എൽ-തിയനൈൻ എന്ന അമിനോ ആസിഡും അടങ്ങിയിട്ടുണ്ട്. ഈ ഘടകങ്ങൾ നമ്മുടെ ഏകാ​ഗ്രത വർദ്ധിപ്പിക്കാൻ സഹായിക്കും. ബുദ്ധിയുടെ ഫോക്കസ് വർദ്ധിപ്പിക്കാൻ സഹായിക്കുമെന്നാണ് പല പഠനങ്ങളും പറയുന്നത്. മധുരം ചേർക്കാതെ കട്ടൻ ചായ കുടിക്കുന്നത് രക്തത്തിലെ ഗ്ലൂക്കോസ് കുറയ്ക്കുകയും പഞ്ചസാര നിയന്ത്രിക്കാനുള്ള ശരീരത്തിൻ്റെ കഴിവ് മെച്ചപ്പെടുത്തുകയും ചെയ്യും.

അതിനാൽ കട്ടൻ ചായ പതിവാക്കുന്നത് നല്ലതാണ്. കഴിവതും പഞ്ചസാര ചേർക്കാത്ത കട്ടൻ ചായ കുടിക്കുക. ചായയിലെ പോളിഫെനോളുകൾ ക്യാന്ഡസറിനുള്ള സാധ്യത കുറയ്ക്കുന്നതായി ചില പഠനങ്ങൾ പറയുന്നു. ബ്രസ്റ്റ് ക്യാൻസർ, ഗൈനക്കോളജിക്കൽ, ശ്വാസകോശം, തൈറോയ്ഡ് കാൻസറുകൾക്കുള്ള സാധ്യത കുറയ്ക്കാൻ കട്ടൻ ചായ സഹായിക്കുമെന്നും ചില ​ഗവേഷണങ്ങൾ ചൂണ്ടിക്കാണിക്കുന്നു.

അതേസമയം അധികമായ അളവിൽ കട്ടൻ ചായ കുടിക്കുന്നതും ആരോ​ഗ്യത്തിന് നല്ലതല്ല. കാരണം അത് നമ്മുടെ ഉറക്കത്തെ നഷ്ടപ്പെടുത്തും. കാരണം കട്ടൻ ചായയിൽ കഫീൻ അടങ്ങിയിരിക്കുന്നു. അതിനാൽ മിതമായ അളവിൽ മാത്രം കുടിക്കുക.