ക്ഷീണവും ശരീരത്തിൽ സൂചി കുത്തുന്നപോലുള്ള വേദനയും തോന്നാറുണ്ടോ? കാരണം ഈ വിറ്റാമിന്റെ കുറവ്

ഇന്ന് വ്യാപകമായി കണ്ടുവരുന്ന ഒരു ആരോഗ്യപ്രശ്നമാണ് വിറ്റാമിൻ ഡിയുടെ (Vitamin D deficiency) അപര്യാപ്തത, പ്രായഭേദമന്യേ ചെറുപ്പക്കാരിലും പ്രായമായവരിലും ഇത് ഒരുപോലെ കാണപ്പെടുന്നു. പലരും നേരിടുന്ന നിരവധി ആരോഗ്യപ്രശ്നങ്ങൾക്ക് വിറ്റാമിൻ ഡിയുടെ കുറവ് ഒരു പ്രധാന കാരണമായിരിക്കാമെന്ന് വിദഗ്ദ്ധർ അഭിപ്രായപ്പെടുന്നു. രക്തത്തിലെ കാത്സ്യം, ഫോസ്ഫറസ് എന്നിവയുടെ അളവ് നിയന്ത്രിക്കുന്നതിനും അസ്ഥികളുടെ ആരോഗ്യം നിലനിർത്തുന്നതിനും വിറ്റാമിൻ ഡി അത്യന്താപേക്ഷിതമാണ്. കൊഴുപ്പിൽ ലയിക്കുന്ന ഒരു വിറ്റാമിനായ വിറ്റാമിൻ ഡി ഹൃദയാരോഗ്യം ഉൾപ്പെടെ നിരവധി ശാരീരിക പ്രവർത്തനങ്ങൾക്ക് അനിവാര്യമാണ്. ജീവിതശൈലിയിലെ മാറ്റങ്ങളാണ് വിറ്റാമിൻ ഡിയുടെ കുറവിന് പ്രധാന കാരണമായി വിദഗ്ദ്ധർ ചൂണ്ടിക്കാണിക്കുന്നത്. ശരീരത്തിലെ പ്രധാന അവയവങ്ങളുടെ പ്രവർത്തനത്തെ വിറ്റാമിൻ ഡിയുടെ കുറവ് പ്രതികൂലമായി ബാധിക്കും എന്നത് ഗൗരവമേറിയതാണ്. വിറ്റാമിൻ ഡിയുടെ കുറവിന്റെ ലക്ഷണങ്ങൾ എല്ലായ്പ്പോഴും വ്യക്തമായിരിക്കില്ല. അസ്ഥികളുടെ ബലഹീനത, ക്ഷീണം തുടങ്ങി നാം അവഗണിക്കുന്നതും അറിയപ്പെടാത്തതുമായ നിരവധി ലക്ഷണങ്ങള്‍ ഉണ്ട്

വിറ്റാമിൻ ഡിയുടെ അപര്യാപ്തത വിവിധ ലക്ഷണങ്ങളിലൂടെ പ്രകടമാകാം. ശരീരത്തിന്റെ വിവിധ ഭാഗങ്ങളിൽ അനുഭവപ്പെടുന്ന സൂചി കുത്തുന്നതുപോലുള്ള വേദന, അമിതമായ ശരീരഭാരം, സമ്മർദ്ദം, മുടി കൊഴിച്ചിൽ, വിഷാദരോഗം, ശാരീരിക ക്ഷീണം, ഉറക്കമില്ലായ്മ എന്നിവ ഇവയിൽ ചിലതുമാത്രമാണ്. പേശികളുടെ ബലഹീനത മൂലം കോണിപ്പടികൾ കയറുമ്പോഴോ, തറയിൽ നിന്നോ കുറഞ്ഞ ഉയരമുള്ള കസേരയിൽ നിന്നോ എഴുന്നേൽക്കുമ്പോഴോ ബുദ്ധിമുട്ട് അനുഭവപ്പെടുന്നതും വിറ്റാമിൻ ഡിയുടെ കുറവിന്റെ സൂചനയാകാം. ഇത്തരം ലക്ഷണങ്ങൾ അനുഭവപ്പെടുന്നവർ രക്തപരിശോധനയിലൂടെ വിറ്റാമിൻ ഡിയുടെ അളവ് പരിശോധിക്കേണ്ടത് അത്യാവശ്യമാണ്. ശരീരത്തിൽ വിറ്റാമിൻ ഡിയുടെ അളവ് വർദ്ധിപ്പിക്കുന്നതിന് ഏറ്റവും ഫലപ്രദമായ മാർഗ്ഗം സൂര്യപ്രകാശം സ്വീകരിക്കുക എന്നതാണ്. രാവിലെയും വൈകുന്നേരം 5 മണിക്ക് ശേഷവുമുള്ള സൂര്യപ്രകാശം ഏറെ ഗുണം ചെയ്യും. ഇതോടൊപ്പം, ദൈനംദിന ഭക്ഷണക്രമത്തിൽ വിറ്റാമിൻ ഡി സമ്പുഷ്ടമായ ഭക്ഷണങ്ങൾ ഉൾപ്പെടുത്തേണ്ടതും അത്യന്താപേക്ഷിതമാണ്.

വിറ്റാമിൻ ഡി അപര്യാപ്തതയുടെ ഒരു പ്രധാന ലക്ഷണം പേശികളിൽ അനുഭവപ്പെടുന്ന കഠിനമായ വേദനയാണ്. ഈ ലക്ഷണം പലപ്പോഴും ക്ഷീണമോ പ്രായമായവരിൽ വാർദ്ധക്യത്തിന്റെ സാധാരണ ലക്ഷണമോ ആയി തെറ്റിദ്ധരിക്കപ്പെടാറുണ്ട്. പേശീ പ്രവർത്തനത്തിൽ വിറ്റാമിൻ ഡി ഒരു നിർണായക പങ്ക് വഹിക്കുന്നു, അതിന്റെ അഭാവം പേശികളുടെ ബലഹീനതയ്ക്കും മലബന്ധത്തിനും കാരണമാകും. നിങ്ങൾക്ക് നിരന്തരമായ അസ്വസ്ഥത അനുഭവപ്പെടുന്നുണ്ടെങ്കിൽ, അത് വിറ്റാമിൻ ഡിയുടെ കുറവിന്റെ സൂചനയായിരിക്കാം. മാനസികാരോഗ്യത്തിലും വിറ്റാമിൻ ഡി പ്രധാന പങ്കു വഹിക്കുന്നു. തലച്ചോറിന്റെ ശരിയായ പ്രവർത്തനത്തിനും സെറോടോണിൻ പോലുള്ള മാനസികാവസ്ഥയെ നിയന്ത്രിക്കുന്ന ഹോർമോണുകളുടെ ഉത്പാദനത്തിനും ഇത് അത്യന്താപേക്ഷിതമാണ്. വിറ്റാമിൻ ഡിയുടെ അഭാവം മാനസികാവസ്ഥയെ പ്രതികൂലമായി ബാധിക്കുകയും ഉത്കണ്ഠ, വിഷാദം എന്നിവയ്ക്ക് കാരണമാവുകയും ചെയ്യും.

ഇന്ന് കുട്ടികളിലും പ്രായമായവരിലും ഒരുപോലെ കണ്ടുവരുന്ന ഒരു പ്രധാന ആരോഗ്യപ്രശ്നമാണ് മുടികൊഴിച്ചിൽ. ശരീരത്തിൽ പുതിയ രോമവളർച്ചയെ നിയന്ത്രിക്കുന്നതിൽ നിർണായക പങ്ക് വഹിക്കുന്ന ഒരു ഘടകമാണ് വിറ്റാമിൻ ഡി. വിറ്റാമിന്റെ അഭാവം അലോപ്പീസിയ ഏരിയ പോലുള്ള ഓട്ടോ ഇമ്മ്യൂൺ രോഗങ്ങൾക്ക് കാരണമാകുന്നു. ഇത് കഠിനമായ മുടികൊഴിച്ചിലിലേക്ക് നയിച്ചേക്കാം. വിറ്റാമിൻ ഡിയുടെ കുറവ് ദഹനവ്യവസ്ഥയെയും പ്രതികൂലമായി ബാധിക്കും. വയറിളക്കം, മലബന്ധം തുടങ്ങിയ കുടൽ സംബന്ധമായ പ്രശ്നങ്ങൾ ഇതിന്റെ അനന്തരഫലങ്ങളാണ്. കൂടാതെ വിറ്റാമിൻ ഡിയുടെ അപര്യാപ്തത ദഹനസംബന്ധമായ അസ്വസ്ഥതകൾക്കും അണുബാധകൾക്കുമുള്ള സാധ്യത വർദ്ധിപ്പിക്കുന്നു.

ദൈനംദിന ഭക്ഷണത്തിൽ വിറ്റാമിൻ ഡി അടങ്ങിയ ഭക്ഷണങ്ങൾ ഉൾപ്പെടുത്തുന്നത് വഴി ഒരു പരിധി വരെ ഇവ പരിഹരിക്കാൻ സാധിക്കും. ചീസ് വിറ്റാമിൻ ഡിയുടെ മികച്ച ഉറവിടങ്ങളിൽ ഒന്നാണ്. വിറ്റാമിൻ ഡിയുടെ കുറവ് പരിഹരിക്കുന്നതിന് ഭക്ഷണത്തിൽ കൂടുതൽ ചീസ് ഉൾപ്പെടുത്തുക എന്നതാണ് ഏറ്റവും എളുപ്പവും രുചികരവുമായ മാർഗം. മുട്ടയുടെ മഞ്ഞക്കരു ശരീരത്തിന് ആവശ്യമായ വിറ്റാമിൻ ഡി നൽകുമെന്ന് പഠനങ്ങൾ സൂചിപ്പിക്കുന്നു. കൊളസ്‌ട്രോൾ പോലുള്ള അസുഖങ്ങൾ ഉള്ളവർ വിദഗ്ധരുടെ ഉപദേശപ്രകാരം മാത്രം ഇത് കഴിക്കാൻ ശ്രദ്ധിക്കേണ്ടതാണ്. കൂണുകളിൽ വിറ്റാമിൻ ഡി സമ്പുഷ്ടമാണ്. അൾട്രാവയലറ്റ് വികിരണങ്ങൾക്ക് വിധേയമാകുന്ന കൂണുകളുടെ ഒരു ഭാഗം വിറ്റാമിൻ ഡി ഉപഭോഗം 100% വർധിപ്പിക്കുമെന്ന് പഠനങ്ങൾ തെളിയിച്ചിട്ടുണ്ട്. (ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ആഹാരക്രമത്തില്‍ മാറ്റം വരുത്തുക.)