ക്യാമറ സെന്‍സറുകള്‍ക്കും ഡിസ്‌പ്ലേ പാനലുകള്‍ക്കും ക്ഷാമം; ഐഫോണ്‍ 15-ന്റെ ഉത്പാദനം ആപ്പിള്‍ കുറച്ചേക്കും

ചില ഘടകഭാഗങ്ങള്‍ക്ക് ക്ഷാമം നേരിടുന്നതിനാല്‍ ഐഫോണ്‍ 15-ന്റെ ഉത്പാദനം ആപ്പിള്‍ കുറയ്ക്കുമെന്ന് റിപ്പോര്‍ട്ട്. കാമറ സെന്‍സറുകള്‍, ഡിസ്‌പ്ലേ പാനലുകള്‍ എന്നിവയ്ക്ക് കടുത്ത ക്ഷാമം നേരിടുന്നതിനാലാണ് ഉത്പാദനം കുറയ്ക്കാന്‍ ആപ്പിള്‍ തീരുമാനിച്ചത്. സെപ്റ്റംബറിലാണ് ഐഫോണിന്റെ 15-ാം പതിപ്പിന്റെ ഔദ്യോഗിക ലോഞ്ച് നിശ്ചയിച്ചിരിക്കുന്നത്. 77 മില്യണ്‍ ഐഫോണുകള്‍ കയറ്റിയയക്കുമെന്ന് ആപ്പിളിന്റെ അനലിസ്റ്റായ ജെഫ് പു നിക്ഷേപകര്‍ക്ക് നല്‍കിയ കുറിപ്പില്‍ പറഞ്ഞു. നേരത്തെ 83 മില്ല്യണ്‍ ഐഫോണുകള്‍ കയറ്റി അയക്കുമെന്നാണ് പ്രതീക്ഷിച്ചിരുന്നത്. (Image: 9to5 Mac)

കാമറ സെന്‍സര്‍, പ്രോ മോഡലുകള്‍ക്കുപയോഗിക്കുന്ന ടൈറ്റാനിയം ഫ്രെയിം, കനം കുറഞ്ഞ പുതിയ ഒഎല്‍ഇഡി പാനലുകള്‍ എന്നിവയുള്‍പ്പടെ വിവിധ ഘടകഭാഗങ്ങളുടെ വിതരണ പ്രശ്‌നങ്ങള്‍ ആപ്പിളിന്റെ വന്‍തോതിലുള്ള ഉത്പാദനത്തിന് തടസമാകാന്‍ ഇടയുണ്ട്. ഇത് കൂടാതെ, ഐഫോണ്‍ 15 പ്രോ മോഡലുകള്‍ക്ക് വില അല്‍പം ഉയരുമെന്നാണ് കരുതുന്നത്. ഇതു മൂലം ഫോണിന് ആവശ്യക്കാര്‍ കുറയാനും സാധ്യതയുണ്ട്.

ഈ വര്‍ഷം മിങ് ഷി കുവോ ഉള്‍പ്പടെയുള്ള പ്രമുഖ അനലിസ്റ്റുമാര്‍ സാമാനമായ കാര്യം തന്നെ പ്രവചിച്ചിട്ടുണ്ട്. ഐഫോണ്‍ 15 പ്രോ ഫോണുകള്‍ക്ക് 1099 ഡോളറും (ഏകദേശം 91332 രൂപ) ഐഫോണ്‍ 15 പ്രോ മാക്‌സ് ഫോണുകള്‍ക്ക് 1,199 ഡോളറുമാണ് (ഏകദേശം 99643 രൂപ) വില പ്രതീക്ഷിക്കുന്നത്. (Image: 9to5 Mac)

നിലവില്‍ പുറത്തിറങ്ങിയ ഏറ്റവും പുതിയ മോഡലായ ഐഫോണ്‍ 14 പ്രോയെ അപേക്ഷിച്ച് ഐഫോണ്‍ 15 പ്രോ മാക്‌സില്‍ ഏതാനും മാറ്റങ്ങളുണ്ടാകുമെന്നാണ് സൂചന. യുഎസ്ബി-സി, പുതിയ ആക്ഷന്‍ ബട്ടണ്‍ ഉള്‍പ്പടെയുള്ള ഫീച്ചറുകള്‍ പുതിയ മോഡലില്‍ ഉണ്ടാകുമെന്ന് കരുതുന്നത്.

ഇത് കൂടാതെ, ആപ്പിളിന്റെ അടുത്ത തലമുറയില്‍പ്പെട്ട എ17 ബയോണിക് ചിപ്പും ഐഫോണ്‍ പ്രോ മോഡലുകള്‍ക്ക് ഉണ്ടാകും. അതേസമയം, ഐഫോണ്‍ 15 സ്റ്റാന്‍ഡേര്‍ഡ് മോഡലുകളില്‍ എ16 ബയോണിക് ചിപ്പു തന്നെയായിരിക്കും ഉപയോഗിക്കുക. ഐഫോണ്‍ 14 പ്രോ മോഡലുകളില്‍ ഇതേ ചിപ്പുതന്നെയാണ് ഉപയോഗിച്ചിരിക്കുന്നത്.

സെപ്റ്റംബര്‍ 12-ന് ആപ്പിള്‍ തങ്ങളുടെ പുതിയ മോഡല്‍ ഐഫോണ്‍ 15 മോഡലുകളും അടുത്ത തലമുറയില്‍പ്പെട്ട ആപ്പിള്‍ വാച്ച് സീരിസ് 9, ആപ്പിള്‍ വാച്ച് അള്‍ട്ര 2 എന്നിവയും പുറത്തിറക്കുമെന്ന് കരുതുന്നതായി ബ്ലൂംബെര്‍ഗിലെ അനലിസ്റ്റ് മാര്‍ക്ക് ജര്‍മന്‍ പറഞ്ഞു.