Online class|ചാലിയാറിനെ മറികടന്ന് വാണിയംപുഴയില്‍ ടിവി എത്തി; online പഠനത്തിന് സഹായവുമായി യൂത്ത് ലീഗ്

കഴിഞ്ഞ പ്രളയത്തിൽ കനത്ത നാശം ഉണ്ടായനിലമ്പൂർ മുണ്ടേരി വാണിയമ്പുഴ ആദിവാസി കോളനിയിലെ കുട്ടികൾക്ക് ഓൺലൈൻ പഠനത്തിനായി ടിവിയും ഡിഷ് ടിവിയും എത്തിച്ചു നൽകി യൂത്ത് ലീഗ്. പ്ലസ് ടു വരെ വിവിധ ക്ലാസുകളിൽ പഠിക്കുന്ന കുട്ടികൾ കോളനിയിൽ ഉണ്ട് .

കഴിഞ്ഞ പ്രളയത്തിൽ നടപ്പാലം തകർന്ന സാഹചര്യത്തിൽ കുത്തിയൊഴുകുന്ന ചാലിയാർ ചങ്ങാടത്തിൽ കടന്ന് ആണ് മുനവ്വർ അലി ശിഹാബ് തങ്ങൾ, പികെ ഫിറോസ്, ടിപി അഷ്റഫ് അലി തുടങ്ങിയവരുടെ നേതൃത്വത്തിലുള്ള സംഘം കോളനിയിൽ എത്തിയത്.

ടിവി സൗകര്യം ഇല്ലാത്തതിനാൽ കോളനിയിലെ 40 ലധികം കുട്ടികൾക്ക് ഓൺലൈൻ പഠനം മുടങ്ങിയ വിവരം അറിഞ്ഞാണ് യൂത്ത് ലീഗ് ഇവിടേക്ക് സഹായം എത്തിക്കാൻ തീരുമാനിച്ചത്.

കോളനിയിൽ വീടുകൾ എല്ലാം താമസ യോഗ്യമല്ലാത്ത അവസ്ഥയിൽ ആണ്. വൈദ്യുതിയും ഇല്ല. ഈ സാഹചര്യത്തിൽഫോറസ്റ്റ് ഉദ്യോഗസ്ഥർ കുട്ടികൾക്ക് ടിവി കാണാൻ വേണ്ട സൗകര്യം ഒരുക്കിയത്.

കോളനിക്ക് അടുത്ത് ഉള്ള ഫോറസ്റ്റ് ഓഫീസിൽ ആണ് ടിവി സ്ഥാപിച്ചത്. ഡിഷ് ടിവിയും കുട്ടികൾക്ക് എല്ലാവർക്കും ക്ലാസ്സ് കേൾക്കാൻ ഉള്ള സൗകര്യത്തിന് ഹോം തിയേറ്ററും ഒരുക്കി.

ഏറെ വൈകാതെകുട്ടികൾ വിക്ടേഴ്സ് ചാനലിൽ പഠനം തുടങ്ങി.കുട്ടികളുടെ സംശയങ്ങൾക്ക് മറുപടി നൽകിയ ശേഷം ആണ് യൂത്ത് ലീഗ് നേതാക്കൾ തിരികെ മടങ്ങിയത്.

" ഡിജിറ്റൽ സാമഗ്രികളുടെ അപര്യാപ്തത ഓൺലൈൻ വിദ്യാഭ്യാസം തടസ്സപ്പെടുത്തുന്ന വിദ്യാർഥികൾ നമുക്ക് ചുറ്റിലുമുണ്ടെങ്കിൽ അവർക്ക് വേണ്ടി നമുക്ക് കൈകോർക്കാം. ഇനിയുമൊരു ദേവിക നമുക്കിടയിൽ ഉണ്ടാവാതെ ശ്രദ്ധിക്കാം" ഇക്കാര്യങ്ങൾ വിശദമാക്കി മുന്നവ്വർ അലി ശിഹാബ് തങ്ങൾ ഫേസ്ബുക്കിൽ കുറിച്ചു.