ശ്രീലങ്കയില്‍ മുസ്‌ലീം പള്ളികള്‍ക്ക് നേരെ വ്യാപക അക്രമം; വാഹനങ്ങളും കടകളും തകര്‍ക്കപ്പെട്ടു

മുസ്ലീം വിരുദ്ധ കലാപം രൂക്ഷമായ ശ്രീലങ്കയില്‍ ഒരാള്‍ കൊല്ലപ്പെട്ടു. കുത്തേറ്റ നിലയില്‍ ആശുപത്രിയില്‍ പ്രവേശിപ്പിച്ചിരുന്ന 42കാരനാണ് കൊല്ലപ്പെട്ടത്.

പുട്ടാലം ജില്ലാ സ്വദേശി മുഹമ്മദ് അമീര്‍ മുഹമ്മദ് സാലി എന്നയാളാണ് മരിച്ചത്. മരപ്പണിക്കാരാനായ ഇയാളെ കൂട്ടമായെത്തിയ സംഘം കൂര്‍ത്ത ആയുധം ഉപയോഗിച്ച് ആക്രമിക്കുകയായിരുന്നു.

കലാപം പൊട്ടിപ്പുറപ്പെട്ട ശ്രീലങ്കയില്‍ ആദ്യം റിപ്പോര്‍ട്ട് ചെയ്യപ്പെടുന്ന മരണമാണിത്.

അതേസമയം സംഘര്‍ഷം രൂക്ഷമായ സാഹചര്യത്തില്‍ കനത്ത സുരക്ഷയാണ് ശ്രീലങ്കയില്‍ പൊലീസും സൈന്യവും ചേര്‍ന്ന് ഒരുക്കിയിരിക്കുന്നത്.

രാജ്യ വ്യാപകമായി നിരോധനാജ്ഞയും പ്രഖ്യാപിച്ചിട്ടുണ്ട്. അക്രമികളെ ഒഴിവാക്കാന്‍ പൊലീസ് കണ്ണീര്‍ വാതകം അടക്കം പ്രയോഗിക്കുന്നുണ്ട്.

പരമാവധി സേനയെ ഉപയോഗപ്പെടുത്തി അക്രമ സംഭവങ്ങള്‍ നിയന്ത്രിക്കണമെന്നാണ് സുരക്ഷാ ഉദ്യോഗസ്ഥര്‍ക്ക് നല്‍കിയിരിക്കുന്ന നിര്‍ദേശം.

ഈസ്റ്റര്‍ ദിനത്തില്‍ രാജ്യത്തെ വിവിധയിടങ്ങളില്‍ നടന്ന ചാവേര്‍ ആക്രമണത്തിന്റെ ഉത്തരവാദിത്തം ഭീകര സംഘടനയായ ഇസ്ലാമിക് സ്റ്റേറ്റ് ഏറ്റെടുത്തതിന് പിന്നാലെയാണ് ശ്രീലങ്കയില്‍ മുസ്ലീം വിരുദ്ധ വികാരം ഉടലെടുത്തത്.

മുസ്ലീം പള്ളികള്‍ക്കും മുസ്ലീം മതസ്ഥരുടെ വ്യാപാര സ്ഥാപനങ്ങള്‍ക്കും നേരെ വ്യാപക ആക്രമണമാണ് നടക്കുന്നത്.

നിരവധി വാഹനങ്ങളും തകര്‍ക്കപ്പെട്ടിട്ടുണ്ട്‌