ഈദ് ആഘോഷത്തിന് മൂന്ന് ദിവസത്തെ ഔദ്യോഗിക അവധി അനുവദിക്കണം: സമസ്ത പ്രമേയം

രണ്ട് പെരുന്നാളുകൾക്കും ചുരുങ്ങിയത് മൂന്ന് ദിവസത്തെ ഔദ്യോഗിക അവധി പ്രഖ്യാപിക്കാൻ സർക്കാർ തയ്യാറാകണമെന്ന് സമസ്ത നൂറാം വാർഷിക സമ്മേളന പ്രമേയത്തിലൂടെ ആവശ്യപ്പെട്ടു. മുസ്ലിം സമുദായത്തിന്റെ ഏറ്റവും വലിയ ആഘോഷങ്ങളായ ഈദുൽ ഫിത്‌റിനും ( ചെറിയ പെരുന്നാള്‍) ഈദുൽ അദ്ഹയ്ക്കും(ബലി പെരുന്നാള്‍) നിലവിൽ നൽകുന്ന അവധി അപര്യാപ്തമാണെന്ന് സമസ്ത ചൂണ്ടിക്കാട്ടി. കുടുംബബന്ധങ്ങൾ പുതുക്കുന്നതിനും മതപരമായ കർമ്മങ്ങളിൽ ഏർപ്പെടുന്നതിനും പുറമെ, ദൂരസ്ഥലങ്ങളിൽ ജോലി ചെയ്യുന്നവർക്കും പഠിക്കുന്നവർക്കും നാട്ടിലെത്താൻ നിലവിലെ ഒന്നോ രണ്ടോ ദിവസത്തെ അവധി ഒട്ടും സഹായകരമല്ലെന്നും സംഘടന അഭിപ്രായപ്പെട്ടു.