ചുട്ടു കൊല്ലപ്പെട്ട വനിതാ പൊലീസ് ഉദ്യോഗസ്ഥ സൗമ്യയുടെ സംസ്കാരം ഇന്ന്

മാവേലിക്കര: കൊലചെയ്യപ്പെട്ട വനിതാ പൊലീസ് ഉദ്യോഗസ്ഥ സൗമ്യയുടെ സംസ്കാരം ഇന്ന്.രാവിലെ ഒൻപത് മണിയോടെ മൃതദേഹം വള്ളിക്കുന്നം പൊലീസ് സ്റ്റേഷനിൽ പൊതുദർശനത്തിന് വയ്ക്കും. ഇതിനു ശേഷം രാവിലെ 11ന് വള്ളിക്കുന്നത്തെ വീട്ടുവളപ്പിലാണ് സംസ്കാര ചടങ്ങുകള്‍

സൗമ്യയുടെ ഭർത്താവ് സജീവ് വിദേശത്തു നിന്ന് കഴിഞ്ഞ ദിവസം നാട്ടിലെത്തിയിരുന്നു. ഇക്കഴിഞ്ഞ പതിനഞ്ചാം തീയതിയാണ് ജോലി കഴിഞ്ഞ് മടങ്ങി വരികയായിരുന്ന സൗമ്യ കൊലചെയ്യപ്പെട്ടത്.

വഴിയിൽ തടഞ്ഞുനിർത്തി വെട്ടിവീഴ്ത്തിയ ശേഷം പെട്രോളൊഴിച്ച് കത്തിക്കുകയായിരുന്നു.

കൊലപാതകത്തിനിടെ ഗുരുതര പരിക്കേറ്റ പ്രതി അജാസും ചികിത്സയിലിരിക്കെ കഴിഞ്ഞ ദിവസം മരണത്തിന് കീഴടങ്ങിയിരുന്നു. അഞ്ചുദിവസമായി വണ്ടാനം മെഡിക്കൽ കോളേജിൽ ചികിത്സയിലായിരുന്നു

വൃക്കകളുടെ പ്രവർത്തനം നിലച്ചതും ശ്വാസകോശത്തിലെ അണുബാധയുമാണ് മരണകാരണം. കഴിഞ്ഞ രണ്ടു ദിവസമായി മരുന്നുകളോട് ശരീരം പ്രതികരിച്ചിരുന്നില്ല

സൗമ്യ വിവാഹ അഭ്യർത്ഥന നിരസിച്ചതാണ് കൊലപാതകത്തിന് കാരണമെന്ന് അജാസ് മജിസ്ട്രേറ്റിന് മൊഴി നൽകിയിരുന്നു.

സൗമ്യയെ കൊലപ്പെടുത്തി ആത്മഹത്യ ചെയ്യുകയായിരുന്നു ലക്ഷ്യമെന്നായിരുന്നു വെളിപ്പെടുത്തൽ