Asian Games 2023| സ്വർണത്തിളക്കത്തിൽ ഇന്ത്യ; 3000 മീറ്റര്‍ സ്റ്റീപ്പിള്‍ചേസിലും ഷോട്ട് പുട്ടിലും സ്വര്‍ണം

ഹാങ്ചോ: ഏഷ്യൻ ഗെയിംസിൽ‌ സ്വര്‍‌ണ കുതിപ്പ് തുടർന്ന് ഇന്ത്യ. ഇന്ന് നടന്ന 3000 മീറ്റര്‍ സ്റ്റീപ്പിള്‍ചെയ്‌സിലും ഷോട്ട് പുട്ടിലും ഇന്ത്യക്ക് സ്വർണം നേടാൻ സാധിച്ചു.

ഇതോടെ ഗെയിംസിൽ 13 സ്വർണ മെഡലാണ് ഇന്ത്യ നേടിയത്. നിലവിൽ 13 സ്വര്‍ണവും 16 വീതം വെള്ളിയും വെങ്കലവുമടക്കം 45 മെഡലുകളുമായി ഇന്ത്യ നാലാം സ്ഥാനത്താണ്.

പുരുഷൻമാരുടെ 3000 മീറ്റര്‍ സ്റ്റീപ്പിള്‍ചെയ്‌സില്‍ അവിനാഷ് സാബ്ലെയാണ് സ്വർണം കരസ്ഥമാക്കിയത്. 8 മിനിറ്റ് 19.50 സെക്കന്റിൽ ഫിനിഷ് ചെയ്‌ത് റെക്കോർഡോഡെയാണ് അവിനാഷ് സ്വർണ മെഡല്‍ നേടിയത്.

അതേസമയം ഷോട്ട് പുട്ടില്‍ തജീന്ദര്‍പാല്‍ സിങ്ങും സ്വര്‍ണം നേടി. 20.36 മീറ്റര്‍ കണ്ടെത്തിയാണ് താരം സ്വര്‍ണ മെഡല്‍ സ്വന്തമാക്കിയത്.

അതേസമയം വനിതാ വിഭാഗം ഷൂട്ടിങ് ട്രാപ് ഇനത്തിൽ ഇന്ത്യ വെള്ളി മെഡൽ നേടി. മനിഷ കീർ, പ്രീതി രജക്, രാജേശ്വരി കുമാരി എന്നിവരാണ് ഇന്ത്യക്കായി വെള്ളി മെഡൽ നേടിയത്.