India Tour Of Australia 2020| ഓസ്ട്രേലിയയിൽ കുടുംബത്തോടൊപ്പം; മാസങ്ങൾക്ക് ശേഷം കുടുംബത്തിനൊപ്പം താരങ്ങൾ

എട്ട് മാസം നീണ്ട ഇടവേളയ്ക്ക് ശേഷം അന്താരാഷ്ട്ര ക്രിക്കറ്റ് മത്സരത്തിനായി ഇന്ത്യൻ താരങ്ങൾ ഓസ്ട്രേലിയയിലെത്തി. കുടുംബത്തിനൊപ്പമാണ് ഇന്ത്യൻ താരങ്ങൾ പര്യടനത്തിന് എത്തിയിരിക്കുന്നത്. ഇതിന്റെ ചിത്രങ്ങളും പുറത്തു വന്നിട്ടുണ്ട്.

കോവിഡ് ലോക്ക്ഡൗണും തുടർന്ന് കർശന മാനദണ്ഡങ്ങൾ പാലിച്ച് നടന്ന ഐപിഎല്ലും പിന്നാലെയുള്ള ഓസ്ട്രേലിയൻ പര്യടനവും മൂലം പല താരങ്ങളും മാസങ്ങളായി കുടുംബങ്ങളിൽ നിന്ന് അകന്ന് കഴിയുകയായിരുന്നു.

കുടുംബത്തേയും പര്യടനത്തിന് ഒപ്പം കൊണ്ടുപോകാൻ അനുമതി നൽകണമെന്ന് താരങ്ങൾ ബിസിസിഐയോട് ആവശ്യപ്പെട്ടിരുന്നു.

ഇന്നലെയാണ് താരങ്ങളും കുടുംബങ്ങളും ദുബായിൽ നിന്ന് ഓസ്ട്രേലിയയിൽ എത്തിയത്. നവംബർ 27 നാണ് ഇന്ത്യ-ഓസ്ട്രേലിയ പരമ്പര ആരംഭിക്കുന്നത്. മൂന്ന് ഏകദിനം, മൂന്ന് ടി-20, നാല് ടെസ്റ്റ് മത്സരങ്ങളാണ് പരമ്പരയിൽ ഉള്ളത്.

ഐപിഎല്ലിന് ശേഷം ദുബായിൽ നിന്നും പുറപ്പെടുന്ന ടീമംഗങ്ങളുടെ ചിത്രങ്ങൾ കഴിഞ്ഞ ദിവസം ബിസിസിഐ സോഷ്യൽമീഡിയയിൽ പങ്കുവെച്ചിരുന്നു. പ്രത്യേകം തയ്യാറാക്കിയ പിപിഇ കിറ്റ് ധരിച്ചായിരുന്നു യാത്ര.

ഓസ്ട്രേലിയയിൽ 14 ദിവസത്തെ ബയോ ബബിൾ നിരീക്ഷണത്തിന് ശേഷമാണ് പരമ്പര ആരംഭിക്കുക. രണ്ട് മാസം നീണ്ടു നിൽക്കുന്ന പരമ്പരയാണ്.

നവംബർ 27 നാണ് പരമ്പര ആരംഭിക്കുന്നത്. സിഡ്നി ക്രിക്കറ്റ് സ്റ്റേഡിയത്തിൽ ഏകദിന മത്സരങ്ങൾ നടക്കുക. ആദ്യ മത്സരത്തിന് ശേഷം നവംബർ 29, ഡിസംബർ 2 തീയ്യതികളിലാണ് മറ്റ് രണ്ട് ഏകദിനങ്ങൾ. ഡിസംബർ നാലിനാണ് ആദ്യ ടി-20 മത്സരം നടക്കുക.

ഡിസംബർ 6, 8 എന്നിങ്ങനെ അടുത്ത രണ്ട് മത്സരങ്ങളും നടക്കും. ഡിസംബർ 17 മുതൽ 21 വരെയാണ് ആദ്യ ടെസ്റ്റ് മത്സരം.