കോവിഡ് ബാധിച്ച് വീട്ടിൽ കുഴഞ്ഞ് വീണ ബിജെപി പ്രവർത്തകനെ ആശുപത്രിയിലെത്തിച്ച് ഡിവൈഎഫ്ഐ പ്രവർത്തകർ

കോവിഡ് സ്ഥിരീകരിച്ചതിനെ തുടർന്ന് വീട്ടിൽ നിരീക്ഷണത്തിൽ കഴിയുകയായിരുന്നു വിഭൂഷും ഭാര്യ അജനയും. ഇന്നലെ വിഭൂഷ് വീട്ടിൽ കുഴഞ്ഞ് വീണതോടെ വേഗത്തിൽ ആശുപത്രിയിലെത്തിക്കാനുള്ള ശ്രമത്തിലായിരുന്നു വീട്ടുകാരും നാട്ടുകാരും. പ്രദേശവാസികളിലൊരാൾ പെരുവെമ്പ് പഞ്ചായത്തിൻ്റെ ഹെൽപ് ഡെസ്കിലേക്ക് വിളിച്ചു പറഞ്ഞു.  ജില്ലാ ആശുപത്രിയിൽ നിന്നും ആംബുലൻസ് എത്താൻ അര മണിക്കൂറോളമാകുമെന്നറിയിച്ചു. തുടർന്ന് പഞ്ചായത്തിലെ സ്വകാര്യ ആബുലൻസ് സർവ്വീസ് നടത്തുന്ന ആളെ വിളിച്ചെങ്കിലും രോഗിയേയും കൊണ്ട് നെന്മാറയിലേക്ക് പോയിരുന്നു. ഈ വാഹനം തിരിച്ചെത്താനും ഏറെ സമയം ആകുമെന്ന് ബോധ്യമായതോടെ വാർഡ് മെമ്പർ സുരേഷിൻ്റെ സ്വകാര്യ വാഹനത്തിൽ വിഭൂഷിനെ കൊണ്ടുപോവാൻ തീരുമാനിയ്ക്കുകയായിരുന്നു. സുരേഷിനൊപ്പം ഡിവൈഎഫ്ഐ പ്രവർത്തകരായ കെ. സന്ദീപ്,  ആർ തേജസ് എന്നിവരും ഒപ്പം ചേർന്നു. തുടർന്ന് സുരേഷിൻ്റെ ഒമ്നി വാനിൽ പി പി ഇ കിറ്റ് ധരിച്ചെത്തിയ സന്ദീപും തേജസും അത്യാസന്ന നിലയിലായ വിഭൂഷിനെ വീട്ടിൽ നിന്നും ആശുപത്രിയിലെത്തിയ്ക്കുകയായിരുന്നു.

advertisement

Also Read- കോവിഡ് വ്യാപനം; അടിയന്തര പ്രാധാന്യത്തോടെ ഇടപെടേണ്ട വിഷയങ്ങളിൽ നിർദേശങ്ങളുമായി KGMOA

ആംബുലൻസിനായി ഏറെ നേരം കാത്തിരുന്നുവെങ്കിൽ വിഭൂഷിൻ്റെ ആരോഗ്യസ്ഥിതി ഏറെ ഗുരുതരമാവുകയായിരുന്നു. പെരുവെമ്പിൽ ഓട്ടോ ഡ്രൈവറായ വിഭൂഷ് സജീവ ബിജെപി പ്രവർത്തകനാണ്. ഭാര്യ അജന കഴിഞ്ഞ പഞ്ചായത്ത് തെരഞ്ഞെടുപ്പിൽ പെരുവെമ്പ് അഞ്ചാം വാർഡിൽ ബിജെപി സ്ഥാനാർത്ഥിയായി മത്സരിച്ചിരുന്നു. രണ്ടു പേരും കോവിഡ് സ്ഥിരീകരിച്ചതിനെ തുടർന്ന് കഴിഞ്ഞ ഒരാഴ്ചയായി വീട്ടിൽ നിരീക്ഷണത്തിൽ കഴിഞ്ഞു വരികയായിരുന്നു. ഇന്നലെയാണ് വിഭൂഷന് വലിയ തോതിൽ ക്ഷീണം അനുഭവപ്പെട്ടത്. പിന്നീട് കുഴഞ്ഞ് വീഴുകയായിരുന്നു.എന്നാൽ രക്ഷാദൗത്യത്തിന് രാഷ്ട്രീയം ഒരു തടസ്സമേയല്ല എന്ന് തെളിയിച്ചാണ് കോവിഡ് ബാധിതനായ വിഭൂഷിനെ ഡിവൈഎഫ്ഐ പ്രവർത്തകരായ  സുരേഷും, തേജസും, സന്ദീപും ആശുപത്രിയിലെത്തിച്ച് രക്ഷകരായത്.

Also Read- കോവിഡിനെ കുറിച്ചുള്ള കങ്കണ റണൗട്ടിന്റെ പോസ്റ്റ് നീക്കം ചെയ്ത് ഇൻസ്റ്റഗ്രാം

ആശുപത്രിയിലെത്തിയ്ക്കുമ്പോൾ അബോധാവസ്ഥയിലായിരുന്ന വിഭൂഷൻ്റെ ആരോഗ്യനില ഇപ്പോൾ ഏറെ മെച്ചപ്പെട്ടിട്ടുണ്ട്. ഡിവൈഎഫ്ഐ പുതുശ്ശേരി ബ്ലോക്ക് വൈസ് പ്രസിഡന്റാണ് വാർഡ് മെമ്പർ കൂടിയായ സുരേഷ്. പെരുവെമ്പ് ഈസ്റ്റ് മേഖലാ സെക്രട്ടറിയായ സന്ദീപ് പാലക്കാട്ടെ ഒരു സ്വകാര്യ സ്ഥാപനത്തിൽ ജോലി ചെയ്യുന്നു. ഡിവൈഎഫ്ഐ പെരുവെമ്പ് വെസ്റ്റ് മേഖലാ ട്രഷറർ ആയ തേജസ് യുവ കർഷകനാണ്.

വിഭൂഷൻ അവശ നിലയിൽ ആണെന്നറിഞ്ഞപ്പോൾ ജീവൻ രക്ഷിയ്ക്കുക എന്നത് മാത്രമായിരുന്നു ചിന്തയെന്നും മറ്റൊന്നും നോക്കിയില്ലെന്നും ഇവർ പറയുന്നു.