ഉറങ്ങുന്നത് ലൈവായി കാണാൻ എത്തിയത് 60 ലക്ഷം ആളുകൾ; വൈറലായി BTS താരം ജങ്കൂക്കിന്റെ ഉറക്കം

ലൈവിൽ എത്തി ആരാധകരുമായി നിരന്തരം സംവദിക്കുന്ന താരമാണ് ബിടിഎസ് അംഗം ജങ്കൂക്ക്. കഴിഞ്ഞ ദിവസവും വിവേഴ്സ്സ് ലൈവിൽ ജങ്കൂക്ക് ലൈവിൽ എത്തി.

ജൂൺ 12 ന് പുലർച്ചെയായിരുന്നു അപ്രതീക്ഷിതമായി താരം ലൈവിൽ എത്തിയത്. എങ്കിലും താരം ലൈവിൽ ഉണ്ടെന്ന് അറിഞ്ഞ ഉടൻ തന്നെ ലക്ഷക്കണക്കിന് ആരാധകരും ലൈവ് സ്ട്രീമിങ് കാണാനുണ്ടായി.

രസകരമായ കാര്യം ലൈവിനിടയിൽ താരം ഉറങ്ങിപ്പോയതാണ്. ഇതിനു മുമ്പും ലൈവ് സ്ട്രീമിങ്ങിൽ ജങ്കൂക്ക് ഉറങ്ങിയിരുന്നെങ്കിലും ഇത് അൽപം ദൈർഘ്യമേറിയ ഉറക്കമായെന്നാണ് ആരാധകർ പറയുന്നു.

ലൈവ് ആരംഭിച്ച് മിനുട്ടുകൾക്കുള്ളിൽ തന്നെ താരം ഉറക്കത്തിലേക്ക് വീണു. താൻ ഉറങ്ങിപ്പോകാൻ സാധ്യതയുണ്ടെന്ന് പറഞ്ഞതിനു പിന്നാലെയാണ് ജങ്കൂക്കിന്റെ കൂർക്കം വലിച്ചുള്ള ഉറക്കം.

21 മിനുട്ടോളം ജങ്കൂക്കിന്റെ ഉറക്കം ലോകം മുഴുവൻ കണ്ടു. രസകരമായ കാര്യം, ജങ്കൂക്ക് ലൈവിൽ ഉറങ്ങുന്നതറിഞ്ഞ് 60 ലക്ഷം പേരാണ് ഈ ലൈവ് കാണാനുണ്ടായത് എന്നതാണ്.

ഇതോടെ, ട്വിറ്ററിലും ജങ്കൂക്കിന്റെ ഉറക്കം വൈറലായി. സോഷ്യൽമീഡിയയിൽ നിറയെ ജങ്കൂക്കിന്റെ ഉറക്കമാണ്.

ലൈവിനിടയിൽ പാചകവും പാത്രം കഴുകലും പാട്ടുമെല്ലാമായി ആരാധകരെ രസിപ്പിക്കാറുള്ള താരമാണ് ജങ്കൂക്ക്. ജങ്കൂക്കിന്റെ വീടിന്റെ അടുക്കളയും ലിവിങ് റൂമും കണ്ടു. പുതിയ ലൈവിൽ അദ്ദേഹത്തിന്റെ കിടപ്പുമുറിയും കണ്ടുവെന്നാണ് ആർമിയുടെ സന്തോഷം.