3,000 കോടി ക്ലബ്ബിലെ മൂന്ന് ചിത്രങ്ങൾ; 16-ാം വയസ്സിൽ വെള്ളിത്തിരയിലെത്തി 18-ൽ മടക്കം! ആരാണ് ഈ നടി?

വെള്ളിത്തിരയിൽ എത്തുന്നതിനും മുൻപേ ക്യാമറയ്ക്ക് മുന്നിൽ തന്റെ സാന്നിധ്യമറിയിച്ച താരമാണ് സൈറ വസീം. ചില പ്രമുഖ ടെലിവിഷൻ പരസ്യങ്ങളിലൂടെയായിരുന്നു അവരുടെ തുടക്കം. ഒരു പ്രമുഖ ടിവി ബ്രാൻഡിന്റെയും സ്മാർട്ട്‌ഫോൺ ബ്രാൻഡിന്റെയും പരസ്യങ്ങളിൽ അഭിനയിച്ചുകൊണ്ടാണ് സൈറ കരിയർ ആരംഭിച്ചത്. പിന്നീട് ലോകമെമ്പാടുമുള്ള സിനിമാ പ്രേമികളെ അമ്പരപ്പിച്ച പ്രകടനമാണ് സൈറ നടത്തിയത്. ആമിർ ഖാൻ നായകനായ 'ദംഗൽ' എന്ന ചിത്രത്തിലൂടെയായിരുന്നു അരങ്ങേറ്റം. കോടിക്കണക്കിന് ഡോളർ മുതൽമുടക്കിൽ നിർമ്മിച്ച ഈ ചിത്രം ഇന്ത്യയിൽ മാത്രമല്ല, ചൈനയുൾപ്പെടെയുള്ള ആഗോള വിപണികളിൽ മെഗാ ഹിറ്റായി മാറി. 2,000 കോടിയിലധികം രൂപ ആഗോളതലത്തിൽ നേടിയ ദംഗൽ, ഇന്ത്യൻ സിനിമയിലെ തന്നെ ഏറ്റവും വലിയ വിജയങ്ങളിൽ ഒന്നായി ഇന്നും നിലനിൽക്കുന്നു. വെറും മൂന്ന് ചിത്രങ്ങൾ കൊണ്ട് 3,000 കോടിയുടെ ബോക്സ് ഓഫീസ് മൂല്യമുള്ള നടിയായി സൈറ മാറിയത് ഈ തുടക്കത്തിലൂടെയാണ്.

ഇന്ത്യയ്ക്കായി ഗുസ്തിയിൽ ഒരു സ്വർണ്ണമെഡൽ നേടുക എന്ന തന്റെ സ്വപ്നം പെൺമക്കളിലൂടെ സാക്ഷാത്കരിക്കാൻ പോരാടുന്ന ഒരു പിതാവിന്റെ ഹൃദയസ്പർശിയായ കഥയാണ് 'ദംഗൽ'. ഹരിയാനയിലെ യാഥാസ്ഥിതികമായ ഗ്രാമീണ പശ്ചാത്തലത്തിൽ, പുരുഷാധിപത്യത്തിന് മേൽക്കൈയുള്ള സാമൂഹിക സാഹചര്യങ്ങളെയും വെല്ലുവിളികളെയും അതിജീവിച്ച് തന്റെ പെൺമക്കളെ ലോകോത്തര ഗുസ്തി താരങ്ങളാക്കി മാറ്റിയെടുക്കുന്ന മഹാവീർ സിംഗ് ഫോഗട്ടിന്റെ യാത്രയാണ് ചിത്രം ദൃശ്യവൽക്കരിക്കുന്നത്. ഇന്ത്യൻ ഗുസ്തി താരം മഹാവീർ സിംഗ് ഫോഗട്ടിന്റെയും അദ്ദേഹത്തിന്റെ മക്കളായ ഗീത ഫോഗട്ടിന്റെയും ബബിത കുമാരിയുടെയും യഥാർത്ഥ ജീവിതകഥയെ ആസ്പദമാക്കിയാണ് ഈ ചിത്രം നിർമ്മിച്ചിരിക്കുന്നത്. അസാധ്യമായതിനെ സാധ്യമാക്കിയ ഒരു കുടുംബത്തിന്റെ നിശ്ചയദാർഢ്യത്തിന്റെ കഥ എന്ന നിലയിൽ ഈ ചിത്രം ആഗോളതലത്തിൽ തന്നെ വലിയ പ്രശംസ പിടിച്ചുപറ്റി.

ബോക്സ് ഓഫീസ് റെക്കോർഡുകൾ തകർത്ത 'ദംഗൽ' എന്ന ചിത്രത്തിൽ മഹാവീർ സിംഗ് ഫോഗട്ടായി ആമിർ ഖാനും, ബബിത കുമാരിയായി സാന്യ മൽഹോത്രയുമാണ് വേഷമിട്ടത്. എന്നാൽ ചിത്രത്തിന്റെ ആദ്യ പകുതിയിൽ ഗീത ഫോഗട്ടിന്റെ കൗമാരകാലം അവിസ്മരണീയമാക്കിയത് കശ്മീരിൽ നിന്നുള്ള യുവതാരം സൈറ വസീം ആയിരുന്നു. 15-ാം വയസ്സിൽ ഈ ചിത്രത്തിൽ അഭിനയിക്കുമ്പോൾ തന്റെ മികവുറ്റ പ്രകടനത്തിലൂടെ മികച്ച സഹനടിക്കുള്ള ദേശീയ ചലച്ചിത്ര പുരസ്കാരവും സൈറ സ്വന്തമാക്കി. ഈ കഥാപാത്രത്തിനായുള്ള തെരഞ്ഞെടുപ്പ് ഒട്ടും എളുപ്പമായിരുന്നില്ല. ഗീത ഫോഗട്ടിന്റെ വേഷത്തിനായി ഇന്ത്യയിലുടനീളം ഏകദേശം 19,000 പെൺകുട്ടികളെയാണ് അണിയറപ്രവർത്തകർ ഓഡിഷൻ നടത്തിയത്. സ്ക്രീനിൽ ആമിർ ഖാന്റെയും സാക്ഷി തൻവാറിന്റെയും മകളായി തോന്നിപ്പിക്കുന്ന തരത്തിലുള്ള സാമ്യം വേണമെന്നതായിരുന്നു പ്രധാന നിബന്ധന. ആ കടുത്ത മത്സരത്തിനൊടുവിലാണ് സൈറ വസീം ഈ വേഷത്തിലേക്ക് തിരഞ്ഞെടുക്കപ്പെട്ടത്.

തുടക്കത്തിൽ സൈറ സിനിമയിൽ അഭിനയിക്കുന്നതിനോട് അവളുടെ കുടുംബാം​ഗങ്ങൾക്ക് താല്പര്യമില്ലായിരുന്നു. എന്നാൽ സൈറയിലെ പ്രതിഭയെ തിരിച്ചറിഞ്ഞ സ്കൂൾ പ്രിൻസിപ്പലും അമ്മായിയുമാണ് സിനിമയിലേക്ക് അയക്കാൻ മാതാപിതാക്കളെ പ്രേരിപ്പിച്ചത്. ആ പ്രചോദനമാണ് ഒടുവിൽ കശ്മീരിൽ നിന്നുള്ള ആ പെൺകുട്ടിയെ ഇന്ത്യൻ സിനിമയുടെ ചരിത്രത്തിന്റെ ഭാഗമാക്കിയത്. വേഷം ലഭിച്ചുകഴിഞ്ഞപ്പോൾ പരിപൂർണ്ണമായ സമർപ്പണത്തോടെയാണ് സൈറ അതിനായി തയ്യാറെടുത്തത്. ഒരു യഥാർത്ഥ ഗുസ്തിക്കാരിയെപ്പോലെ തോന്നിക്കാൻ തന്റെ നീളമുള്ള മുടി മുറിക്കാൻ അവൾ തയ്യാറായി. വെറുമൊരു അഭിനയത്തിനപ്പുറം, ആറ് മാസത്തോളം നീണ്ട കഠിനമായ പരിശീലനമാണ് അവൾ നടത്തിയത്. ഗുസ്തിക്ക് പുറമെ നീന്തലും ജിം വർക്കൗട്ടുകളുമായി തന്റെ ശരീരത്തെ അവൾ പാകപ്പെടുത്തിയെടുത്തു. ആ ആത്മാർത്ഥതയ്ക്ക് ലഭിച്ച ഏറ്റവും വലിയ അംഗീകാരമായിരുന്നു പിന്നീട് രാജ്യം നൽകിയ ആദരവ്.

ലോകമെമ്പാടുമായി 2070 കോടി രൂപ കളക്ഷൻ നേടിയാണ് 'ദംഗൽ' ചരിത്രം കുറിച്ചത്. ചൈനീസ് വിപണിയിൽ റിലീസ് ചെയ്ത് വൻ വിജയം നേടുന്ന ആദ്യ ഇന്ത്യൻ ചിത്രം കൂടിയായിരുന്നു ഇത്. ചിത്രത്തിന്റെ ആദ്യ പകുതിയിൽ ഗീത ഫോഗട്ടായി വിസ്മയിപ്പിക്കുന്ന പ്രകടനം കാഴ്ചവെച്ച സൈറ വസീമിനെ തേടി പിന്നീട് നിരവധി അവസരങ്ങളെത്തി. 2017-ൽ സൈറ കേന്ദ്രകഥാപാത്രമായി എത്തിയ 'സീക്രട്ട് സൂപ്പർസ്റ്റാർ' പുറത്തിറങ്ങി. മുൻനിര നായികമാരുടെ സാന്നിധ്യമില്ലാതെ തന്നെ, സൈറയുടെ പ്രകടന മികവിൽ ചിത്രം ശ്രദ്ധിക്കപ്പെട്ടു. സംഗീത ലോകത്ത് സ്വന്തമായൊരിടം സ്വപ്നം കാണുന്ന, എന്നാൽ യാഥാസ്ഥിതിക ചുറ്റുപാടുകളിൽ പെട്ടുപോയ ഒരു കൗമാരക്കാരിയുടെ കഥയാണിത്. മുഖം മറച്ച് ബുർഖ ധരിച്ച് തന്റെ പാട്ടുകൾ യൂട്യൂബിൽ അപ്‌ലോഡ് ചെയ്യുന്ന അവൾക്ക് തന്റെ സ്വപ്നങ്ങൾ സാക്ഷാത്കരിക്കാൻ കഴിയുമോ എന്നതാണ് ചിത്രത്തിന്റെ പ്രമേയം. ആഗോളതലത്തിൽ ഈ ചിത്രവും വൻ സാമ്പത്തിക വിജയം കൈവരിച്ചു.

പുരുഷാധിപത്യം, ഗാർഹിക പീഡനം തുടങ്ങിയ ഗൗരവമേറിയ സാമൂഹിക വിഷയങ്ങളെ പക്വതയോടെ കൈകാര്യം ചെയ്ത 'സീക്രട്ട് സൂപ്പർസ്റ്റാർ' സൈറ വസീം എന്ന നടിയുടെ കരിയറിലെ സവിശേഷമായ നാഴികക്കല്ലായിരുന്നു. വെറും 15 കോടി രൂപ ബജറ്റിൽ നിർമ്മിച്ച ഈ ചിത്രം, ലോകമെമ്പാടുമുള്ള പ്രേക്ഷകരെ സ്വാധീനിക്കുകയും 969 കോടി രൂപ എന്ന അവിശ്വസനീയമായ തുക ബോക്സ് ഓഫീസിൽ നിന്ന് സ്വന്തമാക്കുകയും ചെയ്തു. ഒരു യുവതാരത്തെ സംബന്ധിച്ചിടത്തോളം ഇത് അത്യപൂർവ്വമായ നേട്ടമാണ്. ഒരു വർഷത്തെ ഇടവേളയ്ക്ക് ശേഷം, യഥാർത്ഥ ജീവിതത്തിലെ പോരാളിയായ ആയിഷ ചൗധരിയുടെ കഥ പറഞ്ഞ 'ദി സ്കൈ ഈസ് പിങ്ക്' എന്ന ചിത്രത്തിലൂടെ സൈറ വീണ്ടും വെള്ളിത്തിരയിലെത്തി. മാരകമായ രോഗത്തോട് പോരാടുമ്പോഴും ജീവിതത്തെ പോസിറ്റീവായി സമീപിച്ച ആയിഷയുടെ വേഷം നിരൂപക പ്രശംസ പിടിച്ചുപറ്റി. എന്നിരുന്നാലും, വാണിജ്യപരമായി ചിത്രത്തിന് വലിയ ചലനമുണ്ടാക്കാൻ സാധിച്ചില്ല; ഏകദേശം 28 കോടി രൂപയാണ് ഈ ചിത്രം നേടിയത്. എങ്കിലും, സൈറയുടെ അഭിനയ മികവ് ഒരിക്കൽ കൂടി അടിവരയിടുന്നതായിരുന്നു ഈ ചിത്രം.

18 വയസ്സ് പോലും തികയുന്നതിന് മുൻപേ ഇന്ത്യൻ സിനിമയിലെ ഏറ്റവും വിലപിടിപ്പുള്ള താരമായി മാറിയ സൈറ വസീം, തന്റെ മൂന്നാം ചിത്രം പുറത്തിറങ്ങാനിരിക്കെയാണ് അപ്രതീക്ഷിതമായി വിരമിക്കൽ പ്രഖ്യാപിച്ചത്. വെറും മൂന്ന് ചിത്രങ്ങളിലായി ഏകദേശം 3,000 കോടി രൂപ ബോക്സ് ഓഫീസ് കളക്ഷൻ നേടിയിട്ടുള്ള അവർ, ദേശീയ പുരസ്‌കാരമുൾപ്പെടെയുള്ള വലിയ അംഗീകാരങ്ങൾ സ്വന്തമാക്കിയിട്ടും പ്രശസ്തിയിൽ തനിക്ക് താല്പര്യമില്ലെന്ന് ലോകത്തെ അറിയിച്ചു. അഞ്ച് വർഷത്തെ സിനിമാ ജീവിതം നൽകിയ അംഗീകാരങ്ങളും പ്രശസ്തിയും തന്നെ സന്തോഷവതിയാക്കുന്നില്ലെന്ന് സൈറ വെളിപ്പെടുത്തി. സിനിമാ മേഖലയിലെ തന്റെ പ്രവർത്തനം മതവിശ്വാസങ്ങളുമായി ഒത്തുപോകുന്നില്ലെന്നതായിരുന്നു വിരമിക്കലിന് കാരണമായി അവർ ചൂണ്ടിക്കാട്ടിയത്. ഈ വ്യവസായത്തിന് താൻ അനുയോജ്യയാണെന്ന് ലോകം കരുതിയെങ്കിലും, തന്റെ മനസാക്ഷി ഇവിടെ ഉൾക്കൊള്ളുന്നില്ലെന്ന് തിരിച്ചറിഞ്ഞതോടെയാണ് കരിയറിന്റെ ഉന്നതിയിൽ നിൽക്കുമ്പോൾ താരം അഭിനയം ഉപേക്ഷിക്കാൻ തീരുമാനിച്ചത്.

സിനിമയോട് വിടപറയാനുള്ള തീരുമാനം പെട്ടെന്നുണ്ടായ ഒന്നല്ലെന്നും ദീർഘകാലത്തെ ആത്മസംഘർഷങ്ങൾക്കും പോരാട്ടങ്ങൾക്കും ഒടുവിലാണ് ഇത്തരമൊരു നിലപാടിലെത്തിയതെന്നും സൈറ വെളിപ്പെടുത്തിയിരുന്നു. തന്റെ ആത്മീയ പാതയിലും മതപരമായ മൂല്യങ്ങളിലും പൂർണ്ണമായി ശ്രദ്ധ കേന്ദ്രീകരിക്കാനാണ് താൻ ആഗ്രഹിക്കുന്നതെന്ന് അവർ വ്യക്തമാക്കി. സിനിമാ ലോകത്തെ ജീവിതസാഹചര്യങ്ങൾ തന്റെ സമാധാനത്തെയും ദൈവവുമായുള്ള ബന്ധത്തെയും പ്രതികൂലമായി ബാധിക്കുന്നുവെന്ന തിരിച്ചറിവാണ് കരിയർ ഉപേക്ഷിക്കാൻ അവരെ പ്രേരിപ്പിച്ചത്. ഇപ്പോൾ 25 വയസ്സുള്ള സൈറ, തന്റെ പ്രഖ്യാപനത്തിന് ശേഷം മാധ്യമങ്ങളിൽ നിന്നോ പൊതുപരിപാടികളിൽ നിന്നോ യാതൊരുവിധ ശ്രദ്ധയും ആഗ്രഹിക്കാതെ പൂർണ്ണമായും മാറിനിൽക്കുകയാണ്. അടുത്തിടെ പുറത്തുവന്ന റിപ്പോർട്ടുകൾ പ്രകാരം സൈറ വിവാഹിതയായതായും പറയപ്പെടുന്നു.